1 Wòŋ 27 - ŊWÀʼ NYÙY

Akáŋ rər wùn aàmfòómé véví

¹ Wír veé Isray ve vé‑eè rə́si fon, leey kinyo ke akáŋ ve rərí ámóʼó‑oò dzə̀ atǎr kfəə, ámóʼó amfòómé ve á wám wíri nsə̀kì nsə̀kì, à ve á wám wíri wií wií, e bóo lì antav vév. Vé rərí‑iì dzə̀ akáŋ jeéy jeéy, aá wiy e kitu ke ŋwee, e kitu ke ŋwee, kiyá kidzə̀m, a káŋ mòʼón mòʼón kér wíri nsə̀kì nshòv sikweè e mbaà (24,000).

² Fo ŋwee mbìyi, mfòómé‑eè dzə̀ Jashobeam woo wan Sabdiel. Káŋ və kù‑uù kér wíri nsə̀kì nshòv sikweè e mbaà.

³ Jashobeam‑eè ràm fo Peres, a kù sáʼ wun amfòómé veé ŋwee mbìyi adzə̀m.

⁴ Fo ŋwee woo baà, mfòómé wáa dzə Doday woo ràm fo Ahohi. Ŋgaà və ntom‑eè dzə̀ Miklot. E Doday káŋ, wíri kù‑uù dzə̀ nsə̀kì nshòv sikweè e mbaà.

⁵ Fo ŋwee woo taár, mfòómé wáa dzə Benaya woo wan taà cù woo Jehoyiada. Wù kfə̀n‑eè dzə̀ mfòómé wo wù meen ji taár. E wun káŋ, wíri kù‑uù dzə̀ nsə̀kì nshòv sikweè e mbaà.

⁶ Benaya və̀n dzə̀ wo yì‑iì dzəə̀n wír wo tavín fo wír vee mtaári, a kù sáʼ wun wír vee mtaár. Ammisabad nén a saʼ káŋ və.

⁷ Fo ŋwee woo kweè, mfòómé wáa dzə Asahel woo fər Joav. Wan və woo Sebadiya nen wìy sìíy, e yì ntaʼ və. Wír vee Asahel káŋe kù‑uù dzə̀ nsə̀kì nshòv sikweè e mbaà.

⁸ Fo ŋwee woo tàn, mfòómé wáa dzə Shamhut woo ràm fo Isra. E wun káŋ, wíri kù‑uù dzə̀ nsə̀kì nshòv sikweè e mbaà.

⁹ Fo ŋwee woo ntuùfú, mfòómé wáa dzə Ira woo wan Ikkesh woo wír woó Tekoa. E wun káŋ, wíri kù‑uù dzə̀ nsə̀kì nshòv sikweè e mbaà.

¹⁰ Fo ŋwee woo saàmbà, mfòómé wáa dzə Heles woó Pelon, a dzə̀ wír woó ram Efrayim. E wun káŋ, wíri kù‑uù dzə̀ nsə̀kì nshòv sikweè e mbaà.

¹¹ Fo ŋwee woo waamé, mfòómé wáa dzə Sibbekay woo wír woó Hushat, a dzə̀ wir kfəə Sera. E wun káŋ, wíri kù‑uù dzə̀ nsə̀kì nshòv sikweè e mbaà.

¹² Fo ŋwee woo bvə̀ʼə̀, mfòómé wáa dzə Abieser woó Anatot. Wù‑uù dzə̀ wír woó rám Benjamin. E wun káŋ, wíri kù‑uù dzə̀ nsə̀kì nshòv sikweè e mbaà.

¹³ Fo ŋwee woo ghvə̀m, mfòómé wáa dzə Maharay woó Netofa woo wir kfəə Sera. E wun káŋ, wíri kù‑uù dzə̀ nsə̀kì nshòv sikweè e mbaà.

¹⁴ Fo ŋwee woo nshòv mòʼón e ghvə̀m, mfòómé wáa dzə Benaya woó Piraton, e nsay Efrayim. E wun káŋ, wíri kù‑uù dzə̀ nsə̀kì nshòv sikweè e mbaà.

¹⁵ Fo ŋwee woo nshòv sibaà e ghvə̀m, mfòómé wáa dzə Helday woó Netofa, a dzə̀ rám Otniel. E wun káŋ, wíri kù‑uù dzə̀ nsə̀kì nshòv sikweè e mbaà.

Atǎr saʼ veé ram seé Isray

¹⁶ Atǎr saʼ veé ram seé Israyi dzə̀ jii, Fo rám Ruben, taà saʼ‑aà dzə̀ Elieser woo wan Sikri. Fo rám Simeon, á wáa ker a dzə̀ Shefatia woo wan Maaka.

¹⁷ Fo rám Levi, yì‑iì dzə̀ Hashabia woo wan Kemuel. Fo kfəə Aaron yì‑iì dzə̀ Tsadok.

¹⁸ Fo rám Juda, yì‑iì dzə̀ Elihu woo fər Davir. Fo rám Issakar, nén a dzə Omri woo wan Mayker.

¹⁹ Fo rám Sebulun, yì‑iì dzə̀ Ishmayia woo wan Obadia. Fo rám Navtali, yì‑iì dzə̀ Jerimot woo wan Asriel.

²⁰ Fo rám Efrayim, wáa dzə Hoshea woo wan Asasia. Fo kintoʼnìn ke rám Manasse, yì‑iì dzə̀ Joel woo wan Pedayia.

²¹ Fo kintoʼnìn ke rám Manasse keé Gilead ki, yì‑iì dzə̀ Iddo woo wan Sekariya. Fo rám Benjamin, yì‑iì dzə̀ Jaasiel woo wan Abner.

²² Fo rám Dan, nén a dzə Asarel woo wan Jeroham. Wír vìne dzə̀ wír ve vé‑eè sáʼ rám seé Isray.

²³ Fòn Davir yòʼ‑oò lo tàŋ wír vee kèʼ fó kiya mbaà, e səy səyín, bìʼ fo Nyùy Tàr‑iì yiì ne kàʼ ji wun wíy yiì é Isray wáa dzə a nyanyày moo mejiy meé yuv.

²⁴ Joav wo yè wov dzəə̀n Tsəruyia‑aà lo kèʼ a taŋ wíri. Nyùy nèn màʼ ŋgeʼ e wír veé Israyí kitu bìʼ kintaŋ kìn. Á bèy, la mfìʼ wìr ve vé‑eè taŋen yòʼ dzəə nə̀ə́ e Fòn Davir aŋwàʼ veé wòŋ, bìʼ fo Joav yòʼ‑oò lo màysì kintaŋ.

Wír ve á leey fo keŋ yeé ntoʼ

²⁵ Asmavet woo wan Adiel‑iì dzə̀ wír wo wù‑uù leey fo vitàv veé ntoʼ, a Jonatan woo wan Ussiya leey fo vitàv veé vishev ve wòŋ, à veé ŋkà se laʼ, à veé ntèʼ sí, e bóo lì veé ntèʼ sé ŋkiy.

²⁶ Esri woo wan Keluv nèn a leéy fo wír ve vé‑eè lim súm fòne.

²⁷ Shimey woó Ramat wáa leéy fo sum sé vitiír vé *vayin, aá koy, fer meluʼ sho, a Sabdi woo lò fó Shifmi nèn leey fo melùʼ me vé‑eè fer, lemè.

²⁸ Baal‑Hanan woó Geder‑iì leey fo vici vé *oliv wùn à vé *sikamor vi, ve ví‑iì dzəə̀n é mbìv bvəm agwan yee Shefela, a Joash nèn lem meŋgvə́r me oliv.

²⁹ Shitray woó Sharon‑eè leey fo nyàm se sí‑iì dzəə̀n é Mboʼ Sharon, a Shafat woo wan Adlay leey fo nyàm se sí‑iì dzəə̀n é viwoóy.

³⁰ Obil woo wir kfəə Ishmael‑iì leey fo akameri, a Jehdeya woó Meronot leey fo vimbèʼbìy ví, a Jasir woó Hagri nèn leey fo bvə́y si.

³¹ Wír vìn adzə̀me dzə̀ wír ve vé‑eè leey fo kéŋ Fòn Daviri.

Vé ntir Fòn Davir

³² Jonatan woo fər tàr à Davir‑iì dzə̀ ŋgaà ntir, a wù kér vifií, a kfə̀n dzə̀ wir ŋwàʼ wo tavín. Wùn Jehiel woo wan Hakmoni‑iì yéʼey wón ntoʼ.

³³ Ahitofel‑iì dzə̀ ŋgaà ntir woó ntoʼ, a Hushay woó Arek dzə̀ ŋkar fòn.

³⁴ Ahitofel‑iì kpù, Abiyatar wùn Jehoyiada woo wan Benaya lì kirə́ʼ kfə́, e nèn a dzə ji aŋgàa ntir fòn. Joav nèn a dzə kfə́ mfòómé woó ntoʼ.