1 Wòŋ 23 - ŊWÀʼ NYÙY

¹ Fòn Davir wìy dzə̀n, e kòŋrí, e nèn kòʼór Solomon woo wán və ji fon woó Isray.

Fòn Davir síysí lim wìr veé ram Levi

² Fòn Davir‑iì lò, e bàʼtí vilìmbìy veé Isray vidzə̀m wùn aàtàá cùu, à wír veé ram Levìi,

³ e sùúy, á táŋ wír veé ram Levi vee kèʼ fó kiya mtaár, e koʼ koʼón. Á táŋ, á wáa dzə nsə̀kì nshòv waamé e mtaár (38,000).

⁴ Wù nèn yòŋ ji wír vee nsə̀kì nshòv sikweè e mbàá (24,000) yíi a yiì a lim seé mvə̀m lav cù, é vee nsə̀kì ntuùfuú wáa dzə a wír ve á lem vinyo, kfə̀n tínen nsaʼ si,

⁵ é vee ansə̀kì akwèe wáa dzə anshìy, é vee ansə̀kì akweè ámóʼó wáa dzə ve á wíy a sùyrì Nyùy e visháʼáy vé yòv ve wun woo fon baʼtin ji á wáa yòv yòv sho vi.

⁶ Fòn Davir nèn jàv wír veé ram Levi akáŋ ataár, kù mo lav sév sí dzə̀kìn, a sí dzə̀ jii, ye Gershon, ye Kohat, à ye Merari.

⁷ Wón Gershone‑eè dzə̀ abaà, a dzə̀ Ladan wùn Shimey.

⁸ Ladan wáa ker wón ataár, a wo mbìy dzə̀ Jehiel, e bóo lì Setam wùn Joel.

⁹ Áwune nèn wìy a dzə atǎr kfəə see lò fo Ladan. Wír vee ràm fo Shimeyi‑iì dzə̀ ataár ji Shelomot, Hasiel wùn à Haran.

¹⁰ Wír ámóʼó akweè vee ràm fo Shimeyi wáa dzə Jahat, Sisaa, Jeush wùn à Beria.

¹¹ Jahat‑iì dzə̀ wan Shimey wo mbìy, kiróʼtí kfə́ kí wáa dzə Sisaa. Jeush wùn Beria yòʼ‑oò lò a ker wón anín, á nèn tàŋ áwune ji kfəə́ e mòʼón.

¹² Kohat‑iì kér wón akweè, aá dzə̀ ji Amram, Ishar, Hebron, wùn à Ussiel.

¹³ Wón Amrame‑eè dzə̀ Aaron wùn Mooser. Vé‑eè lèm Aaron wùn à rám rəə́ jeéy ji wáa kiíy a áwune fó vifa vee jeéy féyì vi. A kù‑uù wíy a tòn áwune cu si ghán sidzə̀m, a yiì lim see Nyùy Tǎr si, a səə̀vì wíri e Nyùy Tǎr yir, e wìy dù, e mày.

¹⁴ Vé‑eè lì wón wón Mooser woo wir Nyùy, e tàŋ ji mbìv rǎm Levi yìmòʼ.

¹⁵ Wón Mooseri‑iì dzə̀ Gershom wùn Elieser.

¹⁶ Gershom wìy a ker wón, a wo mbìy dzə̀ Shebuel.

¹⁷ Elieser‑iì kér kfə́ wán e mòʼón, a dzə̀ Rehabia. Rehabia nèn wìy a ker wón anín.

¹⁸ Wan Kohat wo wù meen ji baà, wo dzəə̀n Ishar wáa ker wan mbìy, a dzə̀ Shelomit.

¹⁹ Wan Kohat wo wù meen ji taár wo dzəə̀n Hebron wáa ker wón akweè, a wo mbìy dzə̀ Jeria, e bóo lì Amaria, Jahasiel wùn à Jekameam.

²⁰ Wan Kohat wo wù meen ji kweè wo dzəə̀n Ussiel wáa ker wón abaà, a wo mbìy dzə̀ Mika, e bóo lì Ishia.

²¹ Merari‑iì kér wón abaà, a dzə̀ Mali wùn Mushi. Maali wìy a ker sa wón abaà, a dzə̀ Eleasar wùn Kish.

²² Eleasar‑iì kpù, a wù yòʼ kér wán woo lumèn. Kù‑uù mày vee vikìy. Wón və́ víne‑eè yèn alúm a dzə̀ wón Kish woo fə́r və.

²³ Wan Merari wo bàm woo Mushi‑iì kér wón ataár, aá dzə̀ ji Maali, Eder wùn à Jeremot.

²⁴ Á wír veé ram Levi, mo vé‑eè dzəə̀n é melav melav, e kfəə sí kfəə si, aá táŋ e yír yir, e kitu kitu. A wìr dzə̀m woo kèʼ fó kiya mbaà, e koʼ koʼón dzə̀ wo wù‑uù yíi a yiì lim see Nyùy Tǎr lav.

²⁵ Kí‑iì dzə̀ bey, bìʼ fo Fòn Davir‑iì suuyin jii, «Nyùy Tàr woo Nyùy wìr veé Isray fò ne nyaáŋ e wír vəə́, a wù sí wìy a dzə e Jerusalem, e wìy dù, e jòʼsì.

²⁶ Á bèy, é la wír veé ram Levìi yòʼ dzəə wìy a beʼ kibàn ké Nyùy wùn à vifá ve ker ve á yii lim sho e kibàn ví, a ghan sho e virə̌ʼ virə̀ʼ.»

²⁷ Kí nèn a dzə jii, a dzə̀ mo Fòn Davir‑iì yòŋèn, e bó a lày, bo á sí táŋ wír veé ram Levi vee ji vé lìme, a dzə̀ vee kèʼ fó kiya mbaà, e koʼ koʼón.

²⁸ A lim yéví dzə̀ ji á wáa sə a atàá cù vee wón Aaron e lìm see Nyùy Tǎr lav. Vé‑eè yíi a leéy vinyo veé maàndzə wùn à veé mewon me lav meé lav cù, e kfə̀n a leéy ji vifá vee jeéy vidzə̀m vi wáa dzə a là *kifàn. Aáwune kfə̀n‑eè yíi a yiì lim símóʼ sí é lav cù.

²⁹ Yì‑iì kiiy áwune kinyo ke kiban kee neèr e Nyùy Tǎr si, kinyo ke meŋkfə̀ŋ me cù, vifá ve yi, à ké kiban kee là nyaà kee tòn, e vèmèr, à ké kiban ke tonèn kímóʼ kí, e bóo lì ké meŋkfə̀ŋ mee shwír e meŋgvə́r me *oliv mè. Áwune kfə̀n‑eè yíi a fìʼ vidzəəsì wùn à vikuʼùy vé vifa ve cù vi.

³⁰ Aáwune kfə̀n‑eè yíi a tiím e Nyùy Tǎr lav vijàvndzə vidzə̀m wùn aàŋkuùri adzə̀m, a beèrì wun, a sùyrì wun,

³¹ e kù a yiì bèy ghán sidzə̀m se á cu Nyùy Tàr e cu ye tonèné, e vishiíy vé bam wùn ǎ *Ŋkǎʼ Ŋwee wo Fíyi, ǎ vishiíy vé ŋkàʼ símóʼ sí. Áwune kù‑uù yíi a lìm e Nyùy Tǎr lav ghán sidzə̀m, mo kijav ki‑iì dzəə̀n jii, vin vee wíri limè, aá nèn fò kilíŋ aámóʼó.

³² Á mo vé‑eè wayin lim seé *kibàn ké ntàsín, à seé kirə̀ʼ kee jeéy kí, e wír veé ram Levìí kiwo, aá fíʼ a sə afə́r vév vee wón Aaron, aá wáa lìm e Nyùy Tǎr lav.