1 Wòŋ 20 - ŊWÀʼ NYÙY

Fòn Davir tón Rabba

¹ Wìy lòo dzə e sáné, a dzə̀ ghán se afone‑eè lo, á fəə̀ rə́r, Joav lì vé rərí, e dù, e nə̀ə́ rə́r é Ammon, e nèn lò, e gìm ŋkàlaʼ yev yee Rabba. Áwune gìm bèy, e tòn fó, e sə̀ʼsí. Vé‑eè lòo fəə rə́r bey, Fòn Davir kitú kfə́ gòʼ e Jerusalem.

² Fòn Davir nèn yiì sə̀ ntáráʼ wo vé‑eè shoʼon fo fòn woo fó kitu, aá fér e *kisha ke mbàm ke baar kí, e tùúy sa *síbaŋ shó, a vidzəəsì vé ntáráʼ ví dzə̀ moo akilu nshòv sitàn e mtaár bèy. Vé‑eè sòv e Fòn Davir kitu, wù kfən kùúy nsàʼmboʼ fo mvə̀mlaʼ foo fèy, e gháʼán.

³ Wù‑uù lì wír vee fó, á wáa lìm lim se tavkín sí. Vé‑eè lim lim aàsòó wùn à e visoó vi, à njàm sí. Kù dzə̀ mo wù‑uù lóvti bèy e ŋkà se laʼ se wìr veé Ammon si sidzə̀m. Wùn à wír vəə́ nèn wìy lò, e kfə̀n é bàm é Jerusalem.

Wír veé Israyi máʼ rə́r wùn aàntav veé Filistiàa

⁴ Shintàm shi lòo dàr, wír veé Israyi kfən tsə̀ŋén rə́r wùn à wír veé Filistiàa é Geser, e tòn áwune. Kin ki‑iì dzə̀ é ghan se Sibbekay woo wír woó Hushat‑iì yuyrin Sippay wo rám yéví dzəə̀n yé viŋgáʼ ve wíri.

⁵ Rə́r símóʼ sí wáa dzə se á kfə̀n‑eè màʼàn wùn à wír veé Filistiàa. Elhanan woo wan Jayir yúyrí Laami woo fər Goliat woo wír woó Gat, wo wù‑uù kér kòŋ, a shwáne dzə̀ moo mbàŋ kirèŋrèŋ bey.

⁶ Símóʼ sí kfən wìy ŋàʼáy e Gat, a kiŋgáʼ ke wìr kímóʼ kí dzə̀ fó. Wù‑uù kér wón wo ntuùfú ntuùfú, kér sa wón wuù ntuùfú ntuùfú, adzə̀me wáa dzə nshòv sikweè e mbaà. Wù‑uù dzə̀ rám viŋgáʼ ve wíri.

⁷ Wù nèn a kuùrì wír veé Isray, Jonatan woo wan Shimea yúyrí wun, a Shimea və̀n dzə̀ fər Fòn Davir.

⁸ Wír ve Davir wùn à wír vəə́‑əə̀ yuyrin víne dzə̀ rám ye dzəə̀n viŋgáʼ ve wìr vee lò fó Gat.