1 Wòŋ 19 - ŊWÀʼ NYÙY

Fòn Davir tón wír veé Ammon wùn à veé Siiriàa

¹ Ghán sí lòo koʼtí, Fòn Nahash woó Ammon nèn lày. Á nèn kòʼór wán və, wù wáa saʼ e wun ntaʼ.

² Fòn Davir nèn lò, e sùúy ji bòŋ é wun din á koŋ e Hanun réŋréŋ mo Nahash woo tàr à Hanun‑eè dìnèn e wun. Wù nèn tsə̀nsí nsheèlav sə́ ji sí du, e shàm á Hanun bìʼ kpú tàr wov. Áwune nèn dù e wòŋ woo Ammon, e yèn Hanun ji á shám á wun.

³ Atǎr ntoʼ veé Ammone nèn dù, e bùn Fòn Hanun jii, «Fòn sà kwaʼtì ji Davir tsə̀nsí wír vìn ji á wiy, e shàm fon bèn ji wù‑uù koŋ tàr à fòn a? Nyàr, bó á yòʼ sà kì ji wù tsə̀nsí wír vìn ji á wiy, e nə̀ə́ e ŋkàlaʼ, e kìy, e fíʼ yìi tòn a?»

⁴ Fòn Hanun nèn koò vé ntum Fòn Davir vìy, e sheèsì vighev vév, e tiìné vikúm vév fó ntuʼ se kinyè, e jùm.

⁵ Áwune lòo dù, Davir yú kinyo ke kí kooyin áwune, aá sí woóme fó a kfən e bàm fó laʼ, wù tsə́nsí ntum fo áwuné wùn ji á goʼ á e Jeriko, e dzə̀ʼə̀m a fo, é vighev vév ví wàá kwiíy, é bo á wáa wìy.

⁶ Wír veé Ammone ló, e yèn ji ké wùn à Davir ki fòy a ne fòyìn, Hanun wùn à wír veé Ammone nèn tsə̀nsí *kisha ke mbàm ke fəvír kí akilu nsə̀kì nshòv sikweè e mtaár (34,000) ji á laʼ á viténtén wùn à vé rər veé nyàm se ŋkoʼo shó fo Aram‑Maaka, à fó Tsoba e nsay Mesopotamia.

⁷ Áwune nèn dù, e làʼ *viténtén vé rər, a ví dzə̀ nsə̀kì nshòv sibaà e mtaár, e kfə̀n làʼ mànjòŋ fòn woó Maaka, wù wìy, e tàm kiláʼáy é ghaa ŋkàlaʼ yee Medeba. Wír veé Ammone nèn fəə̀kír fo áwuné ntèʼ sí, e wìy, a baʼtí rə́r.

⁸ Davir yú kinyo kìn, e tsə̀nsí Joav wùn à vé rər və́ ve tavkíné fó adzə̀m.

⁹ Wír veé Ammone fəə́, e tìír shúu rər é dzəə ye yì nəə aáwuné ŋkàlaʼ ye kuʼùn, aàfon ve vé‑eè wìykìné sáŋrí kév é mvə̀m wòŋ.

¹⁰ Joav lòo sìn, a rə́r sí gím ne wun, à fó mbìy, à fó bàm, wù nèn shòʼtí vé rər veé Isray ve tavkíné, e tìír áwune, á wáa kìʼ wír veé Siiria,

¹¹ e nèn lì kibér ke wìr və́, e wày e Abishay woo fə́r və́ kiwo, e tìír, á wáa kìʼ wír veé Ammon.

¹² Wù nèn sùúy e Abishay jii, «Aà yèn, a wír veé Siiriàa sí gháʼ mo, à wìy, e tòm mo. M yén, a wír veé Ammone sí gháʼ sa wò, é m wiy, e tòm wò.

¹³ Kúr shilív shí, e tìím kitávín, é vèsən funen bìʼ wír vesən. Á ku fùnèn bìʼ ŋkà se laʼ se Nyùy wo wù kér vèsən, é wun woo Nyùy Tàr yii kinyo ke kiìn wun.»

¹⁴ Joav wùn à wír vəə́ nèn a woóy wír veé Siiria ji rə́r sí wàá tsə́ŋén. Sí tsə́ŋén, veé Siiriàa tókír é kòv.

¹⁵ Wír veé Ammon ve vé‑eè kiʼ Abishay woo fər Joavi yén ji wír veé Siiriàa tò á ne e kòv, e nèn a leʼ sa, a kfən e ŋkàlaʼ. Joav nèn kfə̀n é bàm é Jerusalem.

¹⁶ Á lò, e yù é Siiria ji wír veé Israyi ghàʼ á ne wír vév, e nèn tùm wíri, á dù, e rəə̀mé afə́r vév ve vé‑eè dzəə̀n é ndzə̀n ndzə̀v yee Yufret. Shofak woo mfòóme Fòn Hadadeser nèn lì áwune, e wìy sho.

¹⁷ Davir yú ji á kinyo ke kí waà dzəə̀n, e nèn bàʼtí vé rər veé Isray adzə̀m, e lìysín ndzə́v yee Jordan ji wun nəə́ á áwune e rə́r sí. Wù dù, e tìír shúu rər, wú wáa kìʼ wír veé Siiria, rə́r sí nèn tsə̀ŋén.

¹⁸ Sí gháʼ wír veé Siiria, á tó é kòv. Davir wùn à wír vəə́ yúyrí wír veé Siiria veé vitentén vé rər, wír nsə̀kì saàmbà, e yùyrí vé rə́r vee kiwuú kí, wír nsə̀kì mkweè. Á kfən yùyrí Shofak woo mfòómé wov rə̀r.

¹⁹ Afon ve vé‑eè fó nshwì e Hadadeseri yú ji wír veé Israyi tòn a ne wír veé Siiria, á nèn gbù Fòn Davir, a fo nshwì e wun. Á bèy, la wír veé Siiriàa yòʼ kfə̀n a kòŋ a tom wír veé Ammon.