1 Wòŋ 17 - ŊWÀʼ NYÙY

Nyùy káʼ Fòn Davir

¹ Mo Fòn Davir dzə̀ʼə̀mèn e wun ntoʼ, e nèn lò, a ghay e Natan woo *ŋgaà ntum Nyùy jii, «Mo və̀ne, a m dzə́ e ntoʼ ye á bàʼrìn e kicí kee *sidar ki, a ŋkùv mensàŋ Nyùy Tàr dzə́ kfə́ a dzə̀ é kibàn.»

² Natan suúy e Fòn Davir jii, «Yiì kinyo ke kí dzəə̀n e wò kwàʼtì ki, bìʼ fo Nyùy Tàr dzəə̀n vèn wun.»

³ Wáa dzə vitsə́ʼ vee shooy, Nyùy Tàr nèn sùŋnín e Natan jii,

⁴ «Dù, e sùúy e Davir woo ŋgaà lìm wom ji yòʼ dzə̀ bàʼrì á wun lav ye m wáa dzə sho.

⁵ Kèʼ fo ghan se mò‑oò danèr wír veé Isray, kóʼ sho, e wìy shem lán, m yòʼ‑oo ghán ne a dzə e lav. M kù‑uù dzə́ a dzə̀ é kibàn virə́ʼ vidzə̀m fo vé‑eè du.

⁶ Vé‑eè rə́si du e virə̌ʼ virə̀ʼ, a kù ghán vèr áwune, aá kér vé saʼa ve mò‑oò yòŋèn ji á wáa leéy a fo wíri, a bó m yòʼ‑oò yiì ne dzə̀r aáwune jii, sà yiì ka la á yòʼ bàʼrì lav yem e kicí kee *sidar ki á?

⁷ Á bèy, dù ri, e sùúy e ŋgaà lìm wom Davir ji Nyùy Tàr woo Taà Mànjòŋ suuy a jii, ‹Mò‑oò lì wò fo kwaʼ fo wò‑oò dzə́, shiy njiì, e lèm wò ji kilìmbìy ke wìr vém veé Isray.

⁸ Mò‑oò dzə̀ wòsò virə́ʼ vidzə̀m ve wò‑oò du, a m kù laar aŋgàa vibàn vé adzə̀m. M yíi yiì, aá kiíynín yír yé moo yé antav ve ghaʼtíné veé kitu ke nsay.

⁹ M yíi lèm kirə́ʼ kin ji ké wìr veé Isray ŋkuuŋkùŋ, e yiì, aáwune tuúy fó ji sì á láʼ yév, é la vé kighèʼe yòʼ dzə́ə a jivír áwune mo vé‑eè jívir fo mbìy,

¹⁰ e kèʼ fo ghan se mò‑oò shóʼti vilìmbìy ve ví wáa saʼ wír vém veé Isray. M yíi tòn aŋgàa vibàn vé adzə̀m. Mo woo Nyùy Tàr, m kfə́n a yòŋ e wò woo Davir jii, mómò kitú kém, m yíi kùʼùr kfə́ə yé,

¹¹ à wíy kpú ji à sí jumrì a atàr vé, é m nèn kòʼór wan wò wùmòʼ, wo dzəə̀n vitó vé, é wù li kirə́ʼ ké ji fon. M wíy yiì é sáʼ rəə́ wáa tiy.

¹² Dzə̀ wun wo wù wíy bàʼrì lav yem. M wíy yiì, é sáʼ rəə́ wáa tiy fo ghán sidzə̀m.

¹³ M wíy a dzə tàr wov, é wù wáa dzə wán wom. Yòʼ dzə̀ m wìy yàr fó a dìn koŋ yém e wun mo mò‑oò yàrìn fó a dìn e ŋgaà wo à yiin ntaʼ və.

¹⁴ M wíy dzə̀ʼə̀r wun e mǒ lav, e way sáʼ yém e wun kiwo, é wù wáa saʼ, e wìy dù, e mày. Kàvàʼ və kù wíy a tiy fo ŋkuuŋkùŋ.› »

¹⁵ Natan ku nèn dù, e fèr vinyo vìn vidzə̀m e Davir mo Nyùy Tàr kì ghemen ndzə, e dìn e wun.

Davir búnrí Nyùy

¹⁶ Davir nèn dù, e nə̀ə́ e *kibàn ké ntàsín ké Nyùy Tàr, e dzə̀ʼə̀m, a bùnrì jii, «Éè Nyùy, wò woo Nyùy Tàr, m dzə̀ ka, a kfə́ə yémé dzə̀ ka, bo à yii kinyo kee ben e mò?

¹⁷ Éè Nyùy, à kfə̀n siì dzə̀sì ne lèn aŋkàʼmé vee kùm kfə́ə ŋgaà lìm wò veé ghan se sí wíy a wìy. Éè Nyùy, wò woo Nyùy Tàr, à dìn ne ndzə kibvəə̀shí.

¹⁸ A dzə̀ m kfə̀n sùúy ka e wò, fo nàn ye à nànèn mo woo ŋgaà lìm wò. À kì ne kifá ke dzəə̀n ŋgaà lìm wò.

¹⁹ Vimà vé vinyò ve à yiìn e mò vin, éè Nyùy Tàr, à yiì a kù dzə̀ ve kwàʼtìn wò, e bóo yiì, é ŋgaà lìm wò kiíy lèn.

²⁰ Éè Nyùy Tàr, wìr woo moo wò yòʼ dzə̀. Kù jòʼ wò Nyùy. Á kinyo ke vèr‑iì yiìn ne yù, e kìíy.

²¹ Kitúm ki yòʼ dzə̀ shó e kitu ke nsay kee moo Isray, ke wò‑oò fəərin fó vikwàn, e lì ji wír vé. Viŋgaʼnìn ve vinyò wùn à virom ve wò‑oò shóʼ vi yiì ne, yír yée ghánén kitú ke nsay kidzə̀m. Wò‑oò jum vitúm vinín fo wír vée mbìy, aáwune ve wò‑oò fəərin fó Ejivi kù sə̀ ne nsay yev.

²² À lì ne wír vé veé Isray ji wír vé ŋkuuŋkùŋ, a wò woo Nyùy Tàr sì Nyùy wov.

²³ Éè Nyùy Tàr, ké lèn ki, ku yiì, é ŋkàʼmé wo à kàʼàn ŋgaà wò lìm wùn à kfə́ə rəə́ shó və̀n wìy ghèén, é kí wìy a tiy fo, e dù, e jòʼsì. Ku yiì mo à kàʼàn,

²⁴ é wíri fiʼ bìnsí yír yé, a wùʼsì ghán sidzə̀m, a kwa jii, Nyùy Tàr woo Taà Mànjòŋ, Nyùy wìr veé Isray, kù dzə̀ wun wo wù kér wír veé Isray. Rúrú, à kù wíy kìŋsìn rám ŋgaà lìm wò woo Davir, é ŋgaà saʼ wáa fəə fo fo ghán sidzə̀m.

²⁵ Éè Nyùy wom, kù yiì wò, é bo ŋgaà lìm wò kiíy vinyo vìn, vee ji à wíy yiì, é kfə́ə yémé wìy a dzə yé afòn. Á kinyo ke kí yiìn, é bo m wáa ker shilív shé a bùnrì, a neŋ e wò si.

²⁶ Éè Nyùy Tàr, kù dzə̀ wò Nyùy. À kàʼ ne ŋgaà lìm wò e vinyo ve juŋ vìn vi.

²⁷ Bìʼ bey, ku səə̀vì kfə́ə ŋgaà lìm wòo, a leéy fo fo, e wìy dù, e mày. Éè Nyùy Tàr, kinyo ke à səə̀vìn kí kù gòʼ ne kisəəvìn, e wìy dù, e mày.»