1 Wòŋ 16 - ŊWÀʼ NYÙY

¹ Á wìy e ŋkùv mensàŋ Nyùy bèy, e nèn tìír e mvə̀m kibàn ke Davir‑iì bàʼrìn ji wù yíi a tiy a sho. Áwune nèn cù Nyùy e cu ye tonèné, e kfə̀n cù e yé kikòŋnìne.

² Davir màysì, e yiì cu sìy, e səə̀vì wíri e Nyùy Tǎr yir,

³ e nèn tàr wir dzə̀m woó Isray, à vilum à vikìy, a wìr mòʼón mòʼón sə́ ntuʼ kiban, sə́ nyám, kfə̀n sə́ shintuʼ she baŋ se *vayin se saŋèn sí.

⁴ Davir‑iì lò, e shòʼtí wír veé ram Levi ámóʼó ji á wáa lìm a vinyo ve ŋkùv mensàŋ. Áwune‑eè yíi a beèrì Nyùy, a yòv luŋ si, a burí Nyùy Tàr woo Nyùy wìr veé Isray sho.

⁵ Vé‑eè shòʼ Asav ji kilìmbìy, Sekariya wáa dzə ŋgaà ntom və. Jeyel wùn à Shemiramot, à Jehiel, à Mattitia, à Eliav, à Benaya, à Obed‑Edom, à Jeyel wùmòʼ, áwune wáa dzə wír ve vé‑eè yíi a kùm lúŋ sí. Asav‑iì yíi a kwaʼ viŋkwaʼ,

⁶ é Benaya wùn Jahasiel vee atàá cùu wáa toŋ sóŋ é mbìy ŋkùv mensàŋ Nyùy, ghán sidzə̀m se á lèmèn.

Luŋ wo Fòn Davir foon ji á wáa burí Nyùy sho

⁷ Kù dzə̀ é kishiíy fóo fèy ke Davir‑iì tòmbìy wày nsər yee ji á kù wíy a yòv luŋ wó a burí Nyùy Tàr shó, e nèn wày kinyo kee shoon e Asav wùn à ŋgoo rə́ kiwo. A luŋ və̀ne dzə̀ jii:

⁸ «Vèn wáa fo vibeerì e Nyùy Tàr, a kwa wun, a sàmèr vinyo ve wù yii e vitúm vi vidzə̀m.

⁹ Vèn wáa yòv luŋ si, a burí wun sho, a fìʼtì viŋgaʼnìn ve lìm ve wù yii vidzə̀m.

¹⁰ Vèn kú a tuy shwín bìʼ Nyùy Tàr, wù dzə̀ e ránén. Wìr dzə̀m wo wù kóʼti e wun si kú a seŋ, a sàvnìn.

¹¹ Vèn wáa tiír vifií e Nyùy Tǎr wùn, wun wo dzəə̀n vitaáví vén, a koʼtí e wun si ghán sidzə̀m.

^12-13 Ven vee rám Abraham woo ŋgaà lìm və, ven vee wón Jakov ve wù‑uù shoʼon, vèn kuúmé lim se ghaʼtín se Nyùy Tàr‑iì yiìn sí, viŋgaʼnìn ve vinyò ve wù‑uù dìnèn, a kuumé vinyo ve wù‑uù tinen fo wun shuù.

¹⁴ «Dzə̀ wun Nyùy Tàr, wun woo Nyùy wòsən. Sáʼ rəə́ dzə̀ kitú ke nsay kidzə̀m.

¹⁵ Wù kù yii tíy e wun *mensàŋ me wù‑uù gwàrìn ghán sidzə̀m, a bó yòʼ dzə̀ féyì viyá viyá là may, wù làysìn ŋkàʼmé woo shooy.

¹⁶ Kù dzə̀ mensaŋ me wù‑uù gwàrìn wùn Abraham, ŋkàʼmé wo wù‑uù kàʼàn Aysi sho, e lìʼ,

¹⁷ e bìnsí e Jakov ji sáʼ ye wun foon aáwune, e bìnsí sa ji mensaŋ mee là may, e wír veé Israyi.

¹⁸ Wù‑uù kàʼ Jakov jii, ‹M wíy fo woŋ Kanan e wò, é vèn à wón véné yí fó ji vitsə́ʼ vén.›

¹⁹ «E ghan fóo fèy, áwune‑eè dzə̀ə́ wír ashàr, là ndzə̀n, aá kfə̀n dzə̀ viŋgwìy e wòŋ foo fèy.

²⁰ Vé‑eè ján fo wòŋ wúmóʼó, du e wúmóʼó, lo fo fòn wùmǒʼ kitum, du e ké wùmòʼ kí,

²¹ a bó Nyùy Tàr yòʼ‑oò lo fò kintóʼ ji wìr nəʼsi áwune. Wù‑uù kàntì afon ji lá á yòʼ làʼ á kiwó e wír vìné kitu.

²² Kantì bèy, suuy jii, ‹Lá wìr yòʼ làʼ kiwó e wír vém ve m yoʼoné kitu. Wìr wáa yen fó yiì kinyo ke bi kí aàŋgàa ntum vémé.›

²³ «Wìr dzə̀m woó kitu ke nsay wáa yòv luŋ, a burí Nyùy Tàr, a fìʼtì kishiíy kidzə̀m mo wù luŋèr wíri.

²⁴ Á kú a fìʼtì vikuʼùy və́ e vitúm vi vidzə̀m, a fèr viŋgaʼnìn ve lìm ve wù yii, é wíri yú adzə̀m.

²⁵ «Nyùy Tàr dzə̀ e gháʼtín, a dzə̀ á wàa burí wun feyì. Á wáa fàn a dzə̀ wun, e shaà anyùy.

²⁶ Anyùy ve vitúm vi cúu dzə̀ mebvə̀m. Yii bèy, a Nyùy Tàr dzə̀ kfə́, a yì‑iì bòm wun yúv.

²⁷ Wù kù dzə̀ wùn à viwìr vi, à vikuʼùy ve ghaʼán ví. Kirə́ʼ kfə́ kí din vitaáví və́, kfə̀n din vijuŋ və́.

²⁸ «Ven vee wír veé kitu ke nsay adzə̀m, vèn wáa kwa Nyùy Tàr, a binsí vikuʼùy wùn à vitaáví və́ ví.

²⁹ Vèn wáa kwa wun, a sùyrì yír rə́ ye ghaʼáné, a wìy e cúu, a koʼtí e wun si. Wù bvə́yí, vèn tsə̀m é si wo, e fò ghvə́m e wun.

³⁰ Ven vee wír veé kitu ke nsay, vèn wáa fàn, a yàʼ e wun si. Rúrú, kù tùúy wun kitú ke nsay, a bó yòʼ dzə̀ kifá ki sə̀ʼsì.

³¹ Yúví kú a sheʼrí, é nsay wáa yu vijuŋ. Á kú a suúy e vitúm vi jii, ‹Nyùy Tàr dzə̀ fon.›

³² Rìbà ndzə̀v wáa yòrkìr, à kifá kidzə̀m ke kí dzəə̀n shó ki. Kwáʼa wáa sàvnìn, à kifá kidzə̀m ke kí dzəə̀n shó ki.

³³ Vicí veé kòv vidzə̀m vi wáa yòv luŋ, a sheʼrí Nyùy Tàr. Á kú a sheʼrí wun, bìʼ fo wù sí wiyì, a wù wiy ji wun sáʼ kitú ke nsay.

³⁴ «Á kú a beèrì Nyùy Tàr, bìʼ fo wù dzəə̀n e juŋ. Koŋ ye wù koŋ wír vəə́ yòʼ wíy mày.

³⁵ Vèn wáa toŋ jii, ‹Éè Nyùy woo Ŋgaà Lùŋèr wor, lùŋèr ri ver. Báʼtí ver, e fə̀ə́r fo vitúm ví wo, é vèr wáa beèrì wò woo Ŋgaà wo Ránén, a sheʼrí lim yé, a burí wò.›

³⁶ Á wáa burí Nyùy Tàr, Nyùy wìr veé Isray. Á wáa burí wun, viyá viyá là may.» Wìr dzə̀m nèn bìnsí jii, «Amen.» Bínsi bèy, búri Nyùy Tàr.

Fòn Davir shóʼtí vilìmbìy veé virə̀ʼ vé cù

³⁷ Á bèy, Fòn Davir nèn lèm Asav wùn à wír vəə́ é shùu ŋkùv mensàŋ Nyùy Tàr, ji á wáa lìm vinyo vee fó ghán sidzə̀m mo vé‑eè kér mó a lìm e kishiíy.

³⁸ Wù kfən lèm Obed‑Edom wo dzəə̀n wan Jedutun, wùn à wír və́ vee nshòv waamé e mntuùfuú ji á wáa tom a áwune. Obed‑Edom və̀n wùn Hosa wáa dzə anshìy veé shùu kày.

³⁹ Fòn Davir lém sá Tsadok woo taà cù wùn aàtàá cù ve wùn áwune‑eè yíi a lìm vinyo veé kibàn ké Nyùy Tàr é kirə̀ʼ ké cù ke kí dzəə̀n é Gibeon.

⁴⁰ Vé‑eè yíi a cù Nyùy Tàr e cu se tonèn sí e kitu ke *kiy woo wó cù ye tonèné. Vé‑eè yíi a yiì bèy vijàvndzə vidzə̀m wùn aàŋkuùri adzə̀m, a ŋeèvì vinyo vidzə̀m réŋréŋ mo vé‑eè saŋen é Ŋwàʼ Nsər Nyùy Tàr wo wù‑uù foon e wír veé Israyi.

⁴¹ Wír ve vé‑eè dzəə̀n wùn áwuneé‑eè dzə̀ Heman wùn à Jedutun, à kibér ke wìr ve vé‑eè shoʼtin, e yòŋrì yír sév ji á wáa yòv luŋ, a beèrì Nyùy Tàr shó, bìʼ fo koŋ ye wù koŋ wír vəə́ yòʼ wíy mày.

⁴² Heman wùn Jedutun‑eè leey sa fo sòŋ ye toŋéné wùn à viŋkwaʼ ve kwaʼán ví, à visháʼáy vímóʼ ví ve vé‑eè lo, á wàa sùyrì Nyùy sho e kibàn. Vé‑eè lèm wón Jedutun ji á wáa dzə anshìy veé shùu kày.

⁴³ Á màysì, wíri nèn a kfənkír aáwuné melaʼ. Fòn Davir kfə́n é bàm é ntoʼ, e səə̀vì kfə́ə rə́.