1 Wòŋ 14 - ŊWÀʼ NYÙY

Vifon ve Davir wùn à kfə́ə rəə́

¹ Hiram wo yì‑iì dzəə̀n fon woó Taya nèn lò, e tsə̀nsí wíri fo Fòn Davir wùn, á wáa dù, a ker vicí vee *sidar, kfə̀n du wùn à vé kimbome, à vé kintaa ji á baʼri á ntoʼ Fòn Davir.

² Fòn Davir nèn kìíy ji Nyùy Tàr bìysí ne a wun ji fon wìr veé Isray, e kfə̀n kòʼór a vifon və́ bìʼ wír veé Isray ve dzəə̀n wír wun woo Nyùy Tàr.

³ Mo Davir wìyìn é Jerusalem, e kòóy vikìy ámóʼó fó, e nèn a ker wón vee vilum wùn à vee vikìyí anín.

⁴ Yír sé won ve wù‑uù kér e Jerusalem si dzə̀ jii, Shammua wùn à Shobav, à Natan, à Solomon,

⁵ à Ibhar, à Elishua, à Elpelet,

⁶ à Noga, à Nefeg, à Jafia,

⁷ à Elishama, à Beeliada, e lì Elifelet.

Davir tón wír veé Filistia

⁸ Wír veé Filistiàa yú ji á kòʼór a ne Davir ji fon wìr woó Isray e dzə̀m, e nèn kòʼ ji á jwím á wun, e koò. Davir yú bey, e nèn fəə̀, e kìʼ áwune.

⁹ A wír veé Filistiàa kì wìy é Kiwoóy ké Refayim, a faàsì vifá fo wíri.

¹⁰ Davir nèn beè Nyùy Tàr, e dzə̀r jii, «A dzə̀ m dù, e fùnèn wír veé Filistia a? À yíi way áwune e mǒ kiwo a?» Nyùy Tàr biímé jii, «Kóʼ fó, m yíi way áwune e wò kiwo.»

¹¹ Davir nèn kòʼ, e tòn áwune é Baal Perasim. Wù tòn bèy, a saarí jii, «Nyùy yiì ne, m tsə́y aŋgaà vém vibàn mo tsə̀y kúŋ bey.» Á kinyo ke kí‑iì yiìn, bo á yoŋ yír kirə̀ʼ kee shooy ji Baal‑Perasim.

¹² Wír veé Filistiàa‑aà nyèŋ, e màʼày mebvə̀m mev fó, Davir yòŋ, á táyrí, e tòn.

¹³ Shintàm shi lòo dàr, wír veé Filistiàa sii kfə̀n wìy, a faàsì vifá fo wíri é kiwoóy fóo fèy.

¹⁴ Davir kfən dù, e beè Nyùy Tàr. Wù suúy e wun jii, «Lá à yòʼ kòʼ fó tìítiy. Dù, e nə̀ə́ áwune a dzə̀ fó bàm, e ŋkìʼnìn vicì vé *balsam.

¹⁵ À yií yú kiléŋléŋ ké nsən se givìn sí é kitu ke vici vé *balsam, à nèn fəə̀ é shùu rər. Bo m shèm ne mbìy, ji m ton á shúu rər woó Filistia.»

¹⁶ Davir nèn yiì mo Nyùy Tàr kì suuyin, e jùm mànjòŋ woó Filistia, e kèʼ fo Gibeon, e dù, e meé e Geser.

¹⁷ Léŋ Daviri ku nèn a dù duùn virə́ʼ vidzə̀m, Nyùy Tàr yií, vitúm vidzə̀m vi wáa fàn wun.