1 Wòŋ 11 - ŊWÀʼ NYÙY

Á kóʼór Davir ji wù wáa saʼ woŋ Isray e dzə̀m

¹ Wír veé Isray adzə̀me nèn wìy, e yèn Davir e Hebron, e sùúy e wun jii, «Vèr dzə̀ jav yè wùn, e kfə̀n a dzə mensə mè.»

² Yì‑iì dzə̀ é ghan se sí‑iì shaàn, a Saul dzə̀ə́ fon, yì‑iì li wò wír veé Isray, du sho e shùu rər. A Nyùy Tàr woo Nyùy wò‑oò lo kàʼ wò ji à wíy a leéy a fo wír və́ veé Israyi mo nshìy lèéy fo njiì.

³ Mo kfə́m sé wìr veé Isray sidzə̀m si wìyìn fo Davir wùn é Hebron bèy, wù gwàr *mensaŋ wùn áwune e Nyùy Tǎr si. Á nèn yòʼ wun, e kòʼór ji fon woó Isray réŋréŋ mo Nyùy Tàr‑iì yiìn ne kàʼ, e shaà fo Samuel.

Fòn Davir tón Jerusalem

⁴ Fòn Davir wùn à wír veé Isray adzə̀me nèn dù e Jerusalem, wo vé‑eè yoŋ ji Jebus, a dzə́ wír veé Jebus fo mo yì‑iì dzəə̀n nsay yev.

⁵ Áwune nèn a suúy e Davir jii, «Yòʼ dzə̀ à làʼ kiwuú ké fèn.» Yii bèy, Davir ku yòʼ tòn ŋkàlaʼ yee Sion rə̀n, ye á bomen yì táv, e tòn bèy, e nèn fò yír ji Ŋkàlaʼ Davir.

⁶ Davir‑iì sùúy jii, «Wìr wo wù tombìy nəə́ wír veé Jebus e rə́r sí, e tòn, dzə̀ wo m lo, e lèm ji mfòómé.» Á bèy, Joav wo dzəə̀n wan Tsəruyia nèn tòmbìy nə̀ə́, á nèn fò vimfòómé e wun.

⁷ Davir ku nèn a dzə e ŋkàlaʼ ye á bomen kay, e kaàrí sho rə̀n, á nèn kù a yòŋ fó ji Ŋkàlaʼ Davir.

⁸ Wù lò, e bòm gháŋ si, e kaàrí, e tàr, e kèʼ fo vé‑eè wayin a dzə̀ nsay ye wayín é wǔn gwan, e mbìv ye shùy yii tó fo fo, Joav nèn màysì, e nàŋsín kibér ke ŋkàlaʼ.

⁹ Davir ku nèn a tav, a dù duùn fó mbìy, bìʼ fo Nyùy Tàr woo Taà Mànjòŋ kù‑uù dzəə̀n wùn wun.

Antav Fòn Davir

¹⁰ Vitú ve antav Fòn Davir vi víne. Dzə̀ áwune ve yì‑iì dzəə̀n kóy və́ wo tavíné, é bo wùn à wír veé Israyi tátí, e kòʼór wun ji fon, e kfə̀n tòm sáʼ rə́, yí táv réŋréŋ mo Nyùy Tàr‑iì yiìn ne kàʼ.

¹¹ Ntav mbìy‑iì dzə̀ Jashobeam woo wír woó Hakmoni, a dzə̀ kitú ke antav vee ataár. Wù‑uù lì kòŋ rə́, e laàr wíri shó ghii taár e shùu rər.

¹² Ntav wo wù batin fo antav vee ataári, wáa dzə Eleasar woo wan Dodo woo wir Ahohi.

¹³ Wù‑uù dzə̀ wùn Davir e Pas‑Dammim e ghan se wír veé Filistiàa‑aà baʼtin fó, wùn à wír veé Israyi wáa màʼ rə́r. Rə́r sí távkír, e fəə̀ é kwaʼ saŋ yee *barli, wír veé Israyi léʼkír.

¹⁴ Yii bèy, wù ku tìím kfə́ kitávín é kintìntìn ke kwaʼ, e kìŋ fó, e laàr wír veé Filistia. Nyùy Tàr nèn yiì, wír veé Israyi tòn wír veé Filistia e dzəə ye tavín.

¹⁵ Wáa dzə e ghan símóʼ sí, antav vee ataár fo vee mtaári sə́y, e dù yèn Davir e kirùmèn fo wù‑uù dzə́ e mbvə̀ʼ yeé Adullam, a mànjòŋ woó Filistia báʼtí rə́r é Kiwoóy ké Refayim.

¹⁶ Yì‑iì dzə̀ é ghan sin, Davir kù‑uù dzə́ kfə́ a dzə̀ é kirə̀ʼ ké kilìr, a kiláʼáy ké wìr veé Filistia ki dzə̀ é Betlehem.

¹⁷ Davir nèn lò, e yàr jiŋ Betlehem, e njàʼàm, e sùúy jii, «Wìr‑íì lo fó feé, wóo fo mo mendzə́v me mè loòn fó ndzəv ye tuŋéné, ye yí dzəə̀n é shùu kày e Betlehem?»

¹⁸ Á bèy, antav vee ataár vìyi nèn dù, e tòʼnín kiláʼáy ké wìr veé Filistia e vitaáví ví, e tù mendzə́v fó ndzəv ye tuŋén rəy, e wìy sho, e fò e Fòn Davir. Yii bèy, la wù yòʼ fə̀m nò. Wù cuùrì fo nsay ji wun cu a Nyùy Tàr shó,

¹⁹ e sùúy jii, «Nyùy, teér fo m nó mendzə́v mèn. Kù sì mensə́ me wìr ve á kì foon vitú vév ji á du, e tù mendzə́v mèn.» Wù nèn kù tèn fóo no. Á vinyo ve ghaʼtín ví ve antav Fòn Davir vee ataári‑iì yiìn.

²⁰ Abishay‑iì dzə̀ kitú ke antav vee mtaár, a fər və dzə̀ Joav. Abishay‑iì lì kòŋ rə́, e neèr wíri shó ghii taár, e nèn a ker yír ye kuʼùné moo wír vee ataár vìy bèy.

²¹ Fo wír vee mtaári, vé‑eè yùʼnín Abishay, e shaà wir dzə̀m. Wù nèn a dzə kilìmbìy kév. Yii bèy, la ghay vəə́ yòʼ mèé e wó wìr vee ataár vìyi.

²² Benaya woo wan Jehoyiada wáa dzə sa wir shilìv she tavín shí, a wù‑uù yii viŋgaʼnìn ve vinyò. Wù‑uù dzə̀ wír woó Kabseel. Wù lò e kishiíy kímóʼ kí, e yùyrí antav veé Moav abaà. Wù kfən wìy lò e kímóʼ kí, a mbàʼ gbú, wù nəə́ é bii, e yùyrí bvərə̀ʼ.

²³ Wù kfə̀n‑eè yùyrí kiŋgáʼ ke wìr woó Ejiv, a wù dzə̀ fó vidà kóy e ntàm se kiwo si sibaà, a wù kér kòŋ e wun kiwo, a shwáne dzə̀ moo mbàŋ kirèŋrèŋ bey. Benaya‑aà dù, e nə̀ə́ wun a dzə̀ e kibur ki, e faàsì kòŋ fó kiwo wo, e yùyrí wun woo wír woó Ejiv sho.

²⁴ Á vinyo ve Benaya woo wan Jehoyiada‑aà yiìn, bó a ker sa yír ye kuʼùné moo antav vee ataár vìy.

²⁵ Fo wír vee mtaári, vé‑eè kiìynín wun feyì, yii bèy, á yòʼ‑oò táŋ wun e mvə̀m wìr vee ataár vìy. Fòn Davir nèn lèm wun, wù wáa leéy fo vé rər ve vé‑eè shiy wune.

²⁶ Antav vé rərí‑iì dzə̀ jii, Asahel woo fər Joav wùn à Elhanan woo wan Dodo woó Betlehem,

²⁷ à Shammot woó Harod, à Heles woo wir Pelon,

²⁸ à Ira woo wan Ikkesh woó Tekoa, à Abieser woó Anatot,

²⁹ à Sibbekay woo wir Hushat, à Ilay woo wir Ahohi,

³⁰ à Maharay woó Netofa, à Heled woo wan Baana woó Netofa,

³¹ à Itay woo wan Ribay woó Gibea e nsay Benjamin, à Benaya woó Piraton,

³² à Huray woó viwoóy veé ghaa Gaash, à Abiel woo wir Arbat,

³³ à Asmavet woó Baharum, à Eliaba woó Sha‑albon,

³⁴ à wón Hashem woo wir Gisone, à Jonatan woo wan Shagee woo wir Harar,

³⁵ à Ahiyam woo wan Sakar woo wir Harar, à Elifal woo wan Ur,

³⁶ à Hefer woo wir Mekerat, à Ahija woo wir Pelon,

³⁷ à Hesro woó Karmel, à Naaray woo wan Esbay,

³⁸ à Joel woo fər Natan, à Mibhar woo wan Hagri,

³⁹ à Tsəlek woo wan wìr Ammon, à Naharay woó Beerot woo ŋgaà ŋkeè Joav woo wan Tsəruyia,

⁴⁰ à Ira woo wir Itri, à Garev wo kù dzəə̀n wir Itri,

⁴¹ à Uria woo wir Hit, à Sabad woo wan Alay,

⁴² à Adina woo wan Shisa woo wír woó ram Ruben. Adina nén a dzə kilìmbìy ke wìr vee rám Ruben, a wù kér wír mtaár.

⁴³ Ámóʼó jii, Hanan woo wan Maaka, à Joshafat woo wir Mitna,

⁴⁴ à Ussia woo wir Ashterat, à Shama wùn Jeyel vee wón Hotam woo wir Aror,

⁴⁵ à Jediyael wùn Joha vee wón Shimri, woo wir Tis,

⁴⁶ à Eliel woo wir Mahav, à Jeribay, à Joshavia, e lì wón Elnam wùn à Itma woo wir Moav,

⁴⁷ à Eliel wùn Obed, à Jaasiel woo wir Mesoba.