1 Timoti 6 - ŊWÀʼ NYÙY

Mo dzə̀ kwàn wo dzəə̀n ŋgaà biìmée wàa yu tàr wov

¹ Ké wìr ve á dzəə̀n akwàn kí nén a dzə jii, á kú a yen a ji atàr véví kér kilíŋ ke dzə̀ á wàa ghvəm áwune, a yu vinyo vidzə̀m a dzə̀ á fo fo. Á lóo yiì bèy, é la wír ámóʼó yòʼ dzə́ə a ghvə̀ʼ Nyùy, a nyàysì kinyo ke Nyùy ke vèsən tíy sho.

² Kwàné lóo dzə, a wùn tàr wov dzə̀ wír veé kintatì adzə̀m, lá wú yòʼ a kay tàr wov ji bìʼ fo wùn wun siìn réŋréŋ, aá sì ji afə́r. A dzə̀ wú kù a lìm fo fo, e shaà bèy, bìʼ fo wú sí lim lèn a dzə̀ fo fər və wo wùn wun tatin bìʼ Jesus, a kòŋnìn. Kú a dìn vinyo vìn vi e wíri vidzə̀m, a yen ji á wáa yiì a mo ví dzəə̀n.

Yéʼéy kisaŋe bvəər wíri

³ A wìr lò, a dìn kinyo ke sən kí, ke bó kí yoʼ shèmsín wùn à ke Tàr wòsən Jesus Kristu suuy e vèsən kí, a bó kí yòʼ din sa mo dzə̀ wìr wàa dzə, a yu a dzə̀ fo Nyùy,

⁴ bo ŋgaàŋ raʼsì a dzə̀ wún kisáŋ ji wun kì vinyo, a bó wù yòʼ kì tsə̀r gheéy. Wìr woo ben lo, wù wàa jòy a dzə̀ mbìʼ, a taŋnín e kinyò là ndzə̀n. Wíri nèn a ghèʼnìn, a bvəərí, a duu viduú. Wìr lo, wù nèn a leéy wír e sí ye bií.

⁵ Aáwune táŋnin bèy, a dzə̀ bìʼ fo wìr yòʼ dzəə́ kér shilív she juŋ shi wùn wùmòʼ, a bó wìr yòʼ dzəə́ yéʼey áwune sá kinyo ke dzəə̀n ke ru kí. Á lò ne, a yeʼéy vinyo jeéy jeéy mo kinyo ke Nyùy ki dzə̀ á dzəə wày yìmòʼ bey, ye dzə̀ wìr kùʼ fó fo.

Vikuʼùy ve ru ví wùn à vé kimboʼtì vi

⁶ Yii bèy, wìr wo wù kér bùʼ wo ghaʼán dzə̀ wo wù dzə́, yú a dzə̀ fo Nyùy, shéʼri kifá ke Nyùy fó e wun.

⁷ A dzə̀ vèsən kù a sheʼrí a dzə̀ kee shooy, bìʼ fo vèsən‑eè wiy e ndzə fèn, a bó á yòʼ kér kifá shishàr gheéy. A vèsən wíy lòo màʼtì, é la vèsən yòʼ lì kifá.

⁸ A vèsən lò, a ker kifá ké a yi, a ker ndzə̀y sé a kur, lá vèsən yòʼ dzə́ə a dìy kifá.

⁹ Yii bèy, a wíri lò, a tàʼ kév a dzə̀ vikuʼùy, bo á kù yíi to e kinyò. Á lo, á nèn shèm bám vinyò ve kisaŋ vi ve ví wáa bivír liì wov. A dzə̀ kitám ke mbàm mo á liìn shó, e bìvír vitú vév, e lày kisáŋ.

¹⁰ Kfə́ə se vinyò ve bi ví sidzə̀m si kù ghán a dzə̀ é bǎm mbàm se wìr wáy vifií shó. Kù dzə̀ mo wír ámóʼó màʼàyìn ne kinyo ke Nyùy ke dzəə̀n ke ru kí, e nə̀ə́ e mvə̀m vinyò vinín, a rəsí, a rə̀m ntéŋ, a dzə̀ bìʼ shií wo á kér e mbàm.

Ŋgaà lìm Nyùy ku ghàr a dzə̀ duŋrì

¹¹ Ké wò woo Timoti ki nén a dzə, aà dzə̀ ké ji ŋgaà lìm Nyùy. Kú a leʼ vinyo vee shooy vi léʼén vidzə̀m. Ku wày vifií ví cáʼ ji à wáa yiì a dzə̀ á vinyo ve ru ví, a yiì moo wír wo dzəə̀n wo Nyùy, a way shilív é wùn wó, a kòŋ wir dzə̀m, a tiy e Nyùy wùn kitávín, a lì vinyo vidzə̀m ji weè.

¹² Ku wày shilív shé shi a dzə̀ e Nyùy wùn, a fùnèn e wùn kinyò kitávín. Ku ghàr dzəʼə̀m yee là mayi ye Nyùy liìn wò sho, a kuumé mo wò‑oò tiimen e wírí si anín, a suúy fo wò shuù feyì ji à wày shilív a dzə̀ e Nyùy wùn.

¹³ M nén a suúy e wò lèn jii, à ku lèm a vinyo ve m saŋen vin vidzə̀m. A m suuy, tiir a dzə̀ Nyùy fo mbìy. Nyùy, wo wù yii, bo vifá vidzə̀m vi wáa ŋèʼ, kfə̀n tiir Jesus Kristu wo wù‑uù tiimen e Poshur Payler si, a suúy fo wùn shuù feyì ji wun lò a dzə̀ á fo Nyùy.

¹⁴ Kú a yiì vinyo vìn vi, a yen fó màʼày kímóʼ kí, a ker bèy, e meé mo Taàtá wòsən Jesus Kristu wíy kfən.

¹⁵ A wù wíy kfən e ghan se sìysìn Nyùy wo dzəə̀n vitú ve saʼ. Dzə̀ wun Fon fo afone adzə̀m, e kfə̀n a dzə Tàr fo atàrí adzə̀m.

¹⁶ Kù mày wun wo wù gòʼòn kàŋ mòʼón, a wù dzə̀ a dzə̀ e wùn mvə̀m ran ye bó yòʼ dzə̀ wìr bàv fó ghaŋ. Bó wìr yòʼ‑oò yiì ne shòv wun e si, a bó wìr yòʼ wíy shov. Dzə̀ wun wo dzə̀ á kù a ghvəm. Sáʼ rəə́ kú a dù fo mbìy viyá viyá là may. Amen.

Vé bùʼu wáa tiír vifií a dzə̀ e Nyùy wùn

¹⁷ M nén kfə̀n a suúy e wò jii, à kú a tir wír ve á kér bùʼ a dzə̀ woó ndzə fèn a ji lá á yòʼ a koʼór wún, a tiír vifií a dzə̀ é bùʼ foo fèy, bìʼ fo bó yòʼ dzə̀ á kìíy ghán se wù mayì. Áwune wáa tiír vifií a dzə̀ e Nyùy wùn. Fó wun vifá vidzə̀m, a wù fó nyanyày feyì ji vèsən wáa yu vijuŋ fo fo.

¹⁸ Ku sùúy ji áwune wáa yiì a dzə̀ á vinyo ve juŋ vi, é vikuʼùy vév ví wáa dzə lim ye juŋe ye á yii. Á wáa ŋwàr bùʼ wov woo shooy, a sə wír ve á búŋ sho.

¹⁹ Á lóo yiì bèy, aáwune nèn a ker vikuʼùy ve dzə̀ á wàa tiír vifií shó a dzə̀ ve dzə̀ ví wìy shaàrì, aá kfən nə̀ə́ e dzə̀ʼə̀m yee là may ye dzəə̀n dzəʼə̀m ye ruú.

Por màysì, e tìr Timoti

²⁰ Timoti, ku ghàr kinyo ke Nyùy wayin e wò kiwo ki kijuŋ. Kú a leʼ vinyo ve wíri biʼ, a bó ví yòʼ kér kilíŋ fo Nyùy vi vidzə̀m, a leʼ sa yéʼéy ye wír ámóʼó yoŋ ji vifií ve ghaʼán ví, a bó yí yòʼ tárninè.

²¹ Wír ámóʼó lò ne, a jùmrì vinyo vee shooy, e nèn jày dzə́ə, e màʼtì kinyo ke ru kí ke vèsən wayin shilív shó. M nén a lon fo Nyùy jii, wù kú a kòŋ wò, a leey a fo wò.