1 Timoti 5 - ŊWÀʼ NYÙY

Mo dzə̀ Timoti wàa ker wír veé kintatì

¹ À lóo suúy kinyo e wìr woo ŋgàywìr, lá à yòʼ a saʼ wun sáʼán. Kú a naàrì kinyo ki shó náarin moo tàr won. Ku lì awàʼ vée moo afə́r vé,

² a lì sa vikìy vee ŋgày sé wìr ji ayìy vé, e kfə̀n a yen wónlě vikìy moo wón yè won, e làa yòʼ a leéy e sí yímóʼó.

Mo dzə̀ kintatì ki wàa leéy fo vikǐy ŋkfəə

³ Wiíy ŋkfə lóo dzə, a bó wù yòʼ kér ŋgaà lèéy, à kù a leéy fo fo.

⁴ Lóo dzə wo wù kér wón wùn à wón won vəə́, bo dzə̀ kù a leéy áwune fo yè wov, e bó a leéy dzə́ə. Dzə̀ kirə́ʼ kév lèn fó a leéy fo atàr vév wùn aàyìy véví mo vé‑eè leey fo áwune. Dzə̀ kee shooy ke Nyùy koŋ ji á wáa yiì.

⁵ Wáa dzə wiíy ŋkfə wo wù búŋ rú ŋgaà lèéy, wù nèn a leéy kfə́ a dzə̀ Nyùy, a bùnrì e shùy, a bùnrì vitsə́ʼ ji dzə̀ kù sə̀ Nyùy a wun.

⁶ Yii bèy, a wiíy ŋkfə lò, a ghan kfə́ ghanén, a yi woŋ, bo dzə̀ ji mo wù fə̀m ŋeʼè, wù kù kpù ne a fo Nyùy mbìv.

⁷ Ku wày vinyo vìn vi ji nsər, fo wír veé kintatìi wáa yiì vinyo ve dzə̀ wíri wàa ndzəə áwune fó fo.

⁸ A wìr dzə̀ là fó a leéy fo kfə́ə rəə́, taaka nsaàlav rə, bo wù sí maʼày kinyo ke vèsən wayin shilív shó, e màysì, e bir lèn, e shaà wír wo bó yòʼ dzəə̀n wir Kristu.

⁹ Ké vikǐy ŋkfə ve dzə̀ wàa leéy kintatì fo fo ki nén a dzə jii, a dzə̀ woo bey, wù kù a dzə kiyá mntuùfú, é wáa dzə wiíy wo wù kù‑uù dzə́ a dzə̀ wùn lum və, e làa yòʼ fəə.

¹⁰ A dzə̀ kù a dzə sa wiíy wo wìr dzə̀m bínsi ji wù kù‑uù rə́si yii a dzə̀ á vinyo ve juŋ vi, dan wón və́ é dzəə yee réŋ, kér wíri e wùn lav, yii lim seé kintatì ke wìr Nyùy, kfə̀n sə́ vé ŋgeʼe. Kú a dzə wiíy wo wù‑uù liìn kitú kfə́ ji wun wáa yiì a dzə̀ á vinyo ve juŋ vi, ji a fəə̀ lim fèé, wun kù a yiì a yiìn.

¹¹ Fo vikǐy ŋkfə ve dzə̀ə́ wónlè, kú a yen fó way vee shooy e kintatì kí kiwo ji á wáa leéy fo fo. Bìʼ fo, yì yíi ran kibvəə́shí, é woo bey ku kfə̀n a ker shií fó a ker lúm wùmòʼ.

¹² Wù du e woo shooy lav, bo wù màʼ ne kinyo ke wù‑uù kàʼàn ji wun sí wìy a lìm a dzə̀ fo Kristu.

¹³ Kí kfə́n a dzə sa jii, vee shooyi yíi lò, aá nèn kèʼ, a yiì a dzə̀ á ŋgòy, a ghan, a taŋrí melav, a duu viduú, a wayrí shuu e wírí vinyò, e nèn a fèr vinyo ve bó yòʼ kì dzə̀ á wàa fèr.

¹⁴ Ke m suuy ki dzə̀ jii, vikǐy ŋkfə vee wónlèé wáa tàʼ a alúm vév, a dzəə́ wón, a leéy a fo kfə́ə. Á lóo yiì bèy, é la á yòʼ dzəə fò kintóʼ, áàŋgàa vibàn vesəné wáa roòmè vèsən.

¹⁵ M suuy bèn, bìʼ fo ámóʼó jayin ne dzə́ə, e bìn e Satan mbòv.

¹⁶ Kí nen kfə̀n a dzə jii, a vikǐy ŋkfəə dzə́ e laʼ, wiíy wùmòʼ wáa dzə fo, a dzə̀ sá wir Kristu, wù kù a leéy fo fo, e làa yòʼ màʼtì kibeʼèy a dzə̀ e kintatì ki, é kintatì ki wáa leéy kfə́ a dzə̀ vikǐy ŋkfə ve bó á yòʼ kér rú ŋgaà sə.

Mo dzə̀ kintatì ki wàa ker atǎr kintatì

¹⁷ Wìr lóo dzə taà kintatì, a wù lim e kintatì kijuŋ, á kù a geʼ sa sho feyì kijuŋ, bo taaka ve á fiʼtì kinyo ke Nyùy, yéʼey wíri.

¹⁸ A dzə̀ á kù a geʼ sho bèy réŋréŋ mo vé‑eè saŋen é Ŋwàʼ Nyùy jii, «Wìr li nyám ji yì wáa nyèŋ sáŋ, é wù wáa fetí, lá wù yòʼ sùm a shúu nyàm ji fo yì bóŋ sí.» Á kfən sàŋ sá fomóʼó jii, «Ŋgaà lìm kù dzə̀ á wùn à vilaʼày və́ ví.»

¹⁹ A wìr dù wìy, a bi wò ji á mo taà kintatì wùmòʼ yiìn, lá à yòʼ a yuurí kinyo ke ŋgaàŋ, a bó wíri tíy abaà, kìn ataár ve á kiìn.

²⁰ Wáa dzə wo wù jayin rú kinyo, à tìír e kintatì kí si, e sàʼ, é kibér ki fiʼ fìír.

²¹ M nén a suúy e wò feyì jii, à ku wày á nsər sìn, e làa yòʼ a nyàʼ wír, a yen wír wùmòʼ ji woo jeéy. A m suuy kin, tiir a dzə̀ Nyùy wùn Jesus Kristu fo mbìy, kfə̀n tiir nshèelav se Nyùy se ranén sí.

²² Kí kfə́n a dzə sa jii, làa yòʼ a gìr gìrìn, a neèr wó e wìr kitu, a lèm ji wir lìm Nyùy, fo wù wìy sìíy, a yiì liì kisaŋ, é kí wáa dzə ji à tómri a liì woo shooy. Kú a kìm kitú ké ki fó nəə́ e jay.

²³ M kfə̀n taʼ, e kuumé kímóʼ kí jii, mo bvə́me yii jívir wò, à kú a mùm a meluʼ shishàr, e làa yòʼ kù a no a dzə̀ mendzə́v.

²⁴ M nen kfə̀n a ràtì ké atǎr kintatì ji á wáa kiíy a jii, mo ajay wír ámóʼó fə̀m yénsin, din ji á gbù ne nsaʼ, ámóʼó dzə̀ á kév, a bó ajay véví yòʼ táv yénsinè.

²⁵ Kù dzə̀ réŋréŋ sá mo wíri yii yii vinyo ve juŋ vi, a vé wùmòʼ ví yénsin cér, la á yòʼ a tav, a yen vé wùmòʼ. Yii bèy, a bó yòʼ dzə̀ ví lày láyin. Ghán sí yii gheenè, ví yènsín.