1 Timoti 4 - ŊWÀʼ NYÙY

Anyùyi bóʼti wíri

¹ Kú a kiíy ji Kiyoy ke Nyùy ki suuy kiránén á jii, ghán sí wíy fəə, é wíri maʼti kinyo ke vèsən wayin shilív shó kìn, a yuurí a dzə̀ vifá ve ví ghán e ndzə, bóʼtí áwune, aá jùmrì yéʼéy a dzə̀ ye yí lo fo *anyùyi.

² A kù wíy lì wír ve melív mev mè lùrìn ne kinyo kee shooy, a wooné sho ji ké Nyùy, a boʼtí wíri.

³ Á wíy lò, aá nèn a shaʼnín fo wìr wáa ker wiíy, e kfə̀n a suúy ji wíri wáa nyeŋ a vifá ve yi vímóʼ ví. A kù‑uù fèr Nyùy vifá vìn vidzə̀m ji wír ve á wayin shilív e Jesus wùn, a kiíy kinyo ke dzəə̀n ke ru kií wáa lì, a beèrì wun, a yi.

⁴ Vifá ve Nyùy‑iì fèrìn ji vé yi vidzə̀m vi dzə̀ vijuŋ. A dzə̀ wìr kù a yi, là nyaʼ, a wù fèn beerì Nyùy fo fo.

⁵ Kí gheen Nyùy gheénén, bìʼ fo wun woo Nyùy‑iì suuyin ne ji ví dzə̀ á vijuŋ, aá kfə̀n yí, beerì wun fo fo.

Ŋgaà lìm Kristu wáa dzə mfìʼ yeé kintatì

⁶ Aà lò, a dìn vinyo vìn aàfə́r vesəné, bo à sə́ áwune moo ŋgaà lìm Jesus Kristu wo juŋ. À lóo yeʼéy áwune shó, é wówò kitú ké nèn màysì nəə̀nín e kinyò foo fèy, bìʼ fo à kù tíy a dzə̀ é kinyò ke vèsən wayin shilív shó, e biìmé ji dzə̀ á kinyo ke ru kí.

⁷ Kú a leʼ vinjeenjèm ve vimfèr vi léʼén. Vimfèr vee shooy vi yòʼ kér mvə́m, a bó ví yòʼ yéʼey kinyo kímóʼ kí kùm Nyùy gheéy. Kú a mèrìr ké ki a dzə̀ kinyo ke Nyùy.

⁸ À kì sá jii, a wìr merìr wún və́ é kinyò, bo séʼ dzə̀ á sho. Yii bèy, wìr merìr a dzə̀ é kinyò ke kí wáa yiì, é wù wáa ghan mo Nyùy taʼà, bo woo shooy woo séʼ shaà, bìʼ fo kí sə́ wír e dzə̀ʼə̀m yeé nsay, e kfə̀n wìy sə e yé bàmé.

⁹ Duŋrì rə̀ne dzə̀ kinyo ke ru kí ke dzə̀ wír, wù tìír vifií shó vidzə̀m.

¹⁰ Á kinyo ke kí yii, bo vèr wáa ghìtìr, a lìm e Nyùy kinyò kitávín. Vèr lim, leey a dzə̀ fó mbìy, shiy vijuŋ ve Nyùy kàʼàn vèsən shó. Dzə̀ wun wo wù gòʼòn kàŋ mòʼón, kfə́n a dzə wun Ŋgaà Lùŋèr fo wìr msòŋ e dzə̀m, bo taaka fo ve á wayin shilív e Jesus Kristu wùné.

¹¹ Kú a dìn vinyo vìn vi, e wày ji á wáa yiì a mo ví dzəə̀n.

¹² Lá à yòʼ biìmé, é wíri wáa kay wò ji bìʼ fo à dzəə̀n wánlè fo áwune. Kú a dìn a dzə̀ liì wo dzə̀ aŋgàa biimé, á wàa jùmrì, kìn dzə̀ kinyo ke à suuy suùyín, kìn ke à yii yiìn, a kòŋ wíri, a way shilív a dzə̀ e Nyùy wùn, e làa yòʼ a ker liy yee kùm kinjàŋ.

¹³ Kintatì ki lóo dzə̀ʼə̀m ghán sidzə̀m, à kù a yòŋ kinyo fo Ŋwàʼ Nyùy, a fìʼtì kinyo ke Nyùy, a yeʼéy wíri shó, fo m wiyì.

¹⁴ Ku ghàr a dzə̀ kinyo ke Nyùy bùʼùn wò sho ji à wáa yiì ki, a kuumé mo atǎr kintatìi‑iì dzə̀ʼə̀mèn, e neèr wó yév e wò kitu, a tiisí mbùʼme wò və̀n.

¹⁵ Ku wày kitú ké ki a dzə̀ e kee shoon ki, a yiì a dzə̀ kíwun, é wìr dzə̀m fíʼ a yen mo lim yée du fo mbìy.

¹⁶ Kú a tiír kiwúu ké ki, a fìʼ, e kfə̀n a sayrí, fo jay nəə́ e wò kinyò ke à yéʼeyì. Kú a yiì bèy, áà nèn sə̀ kitú ké, e kfə̀n sə̀ sá wír ve á yuúri kinyo ké, é vèn áwune wìy lùŋ adzə̀m.