1 Timoti 3 - ŊWÀʼ NYÙY

Liì wo kilìmbìy ke kintatì ki wáa ker

¹ Kinyo ke á yii suuy kímóʼ kí nén a dzə, a kí dzə̀ rú féyì. A wìr koŋ ji wun wáa dzə kilìmbìy ke kintatì, bo wù shóʼ a dzə̀ lim ye juŋe.

² Aá wáa kiíy jii, kilìmbìy ke kintatì ki kù kér fó a dzə a wír wo bó yòʼ dzə̀ wíri wàa ndzəə. A wù kù kér fó a ker wiíy e mòʼón cáʼcáʼ, a dzə wír wo wù lo ji weè, kfə̀n kwaʼtì vinyo kijuŋ, é kfə́n a dzə sa wír wo wíri wáa yu. A kù kfə̀n kér fó a dzə wír wo wù koŋ vé kiŋgàné, kfə̀n kiiy mo dzə̀ wù yèʼéy wíri kijuŋ.

³ Bó yòʼ dzə̀ wàa dzə wír wo wù nó meluʼ e ŋàŋ, a bó yòʼ dzə̀ wàa dzə wo wù wámri wíri. Kù kér fó a dzə wir kiman, e làa yòʼ a taŋnín, é la yòʼ a dzə sa wír wo wù kér shií é mbàm.

⁴ Ŋgaàŋ kù kér fó a dzə wír wo wù kiìn móo leéy fo wùn nsaàlav, a dànèr wón və́, aá wáa yu kinyo kfə́, a ghvəm wun.

⁵ A dzə̀ wír, a bó yòʼ dzə̀ wù kìíy móo leéy fo wùn nsaàlav, la wù yòʼ kìíy mo dzə̀ wù lèéy fo kintatì ke Nyùy ki.

⁶ A bó kí yoʼ ghèén sa ji á lem wír ji kilìmbìy ke kintatì, a dzə̀ wo dzə̀ə́ wír wo fíy e kinyò ke Jesus Kristu. Aá yiì bèy, ghanmóʼ, é wù nèn a yen kitú kfə́ é ŋàŋ, lóo gùynìn, é wù nèn gbù mo Satan‑eè gbuùn.

⁷ Ŋgaàŋ kér fó a dzə wír wo wír vee fó ndzəə wáa binsí sa ji dzə̀ á wír, fo kí koóy ji Satan kóʼór kitám, wù li sho, é wíri wáa ndzəə.

Liì wo wìr wo wù sə́ e kintatì wáa ker

⁸ Ké wìr ve á sə́, yii lim seé kintatì ki nén a dzə sa réŋréŋ bey. Áwune kù kér fó a ker liì wo juŋ, a dzə wír ve dzə̀ á wàa lìm shilív shimòʼón. A bó yòʼ dzə̀ wàa dzə wír ve á wáy vifií é melùʼ, kìn ve á diy a dzə̀ séʼ.

⁹ Á kù kér fó a tiy shilív shimòʼón e kinyò ke ru kí ke fəərin Nyùy, bo vèsən kiíy.

¹⁰ Bo á wáa lèm, á kù sàáy liì wov kijuŋ. Yén, aá gheén, á nèn lèm, aá wáa lìm e kintatì.

¹¹ A dzə̀ vikìy véví kù a ker sa liì wo juŋ, a lò ji weè, e làa yòʼ a dzə vé viduu, é wáa dzə wír ve dzə̀ á yiì kinyo là kiloʼ.

¹² Wír ve á lim e kintatì vìne kú a ker wiíy e mòʼón mòʼón cáʼcáʼ, a kiíy mo dzə̀ á lèéy fo áwuné nsaàlav kijuŋ, a dànèr wón vév é dzəə ye juŋ.

¹³ Wíri lóo lìm kijuŋ e kintatì, wìr dzə̀m nèn a ghvəm áwune, á nèn a ker kilíŋ ke dzə̀ á wàa fèr kinyo ke Jesus Kristu ke áwune tíy sho feyì, é wíri wáa yu.

Tím kinyò ke wìr Kristu

¹⁴ Timoti, m yén ji m kù yíi wìy, e yen wò lèn lèn. Yii bèy, m nén a saŋ ŋwàʼ və̀n fo wò bèn jii,

¹⁵ a m fèn ndzə̀y, áà kiíy á mo dzə̀ wíri wàa tiír kiwúu kév, a ghan e Nyùy mvə̀m kfəə. Kfə́ə Nyùy rə̀ne dzə̀ kintatì ke kér wun woo Nyùy wo wù gòʼòn kàŋ mòʼón, a kinyo kfə́ ke ru kí kù fəə́ a dzə̀ fó kintatì fèn ke wù neèrìn ji kiyiy, kfə́n a dzə kitóm ke kinyò kee shoon.

¹⁶ A dzə̀ vèsən wàa binsí ji kinyo ke toʼon Nyùy, é bo vèsən kiíy mo dzə̀ á ghvə̀m wun kìn kí dzə̀ rú kinəə́nén. A kí dzə̀ jii: Kristu‑uù wìy, e lì mbom wìr, Kiyoy ke Ranén kí bínsí wun, nshèelav se Nyùy si kfən yèn wun. Á wáa fìʼtì woŋ sidzə̀m mo wù dzəə̀n, wíri wáa way shilív é wùn wó virə́ʼ vidzə̀m. Nyùy kfən lì wun, e kòʼór e wùn ghaŋ.