1 Timoti 1 - ŊWÀʼ NYÙY

¹ Ŋwàʼ və̀ne sàŋ mo woo Por wo dzəə̀n ŋgaà ntum Jesus Kristu. A m lò ntum rə̀n a dzə̀ mo Nyùy wùn Jesus Kristu‑uù suuyin. A dzə̀ wun woo Nyùy wo wù‑uù fəərin vèsən fó lòn ji á fiʼ wìy lùŋ. Kristu nén a dzə kfə́ wír wo vèsən tiir vifií é wùn wó ji wù wìy lì vèsən, e wày é vijùŋ ve Nyùy kàʼàn vèsən shó.

² A m sàŋ a dzə̀ fo wò woo Timoti. À dzə̀ wán wom féyì bìʼ kinyo ke Jesus Kristu wo wòsò wayin shilív é wùn wó. M nén a lon jii, Tàr wòsən Nyùy wùn Taàtá wòsən Jesus Kristu kú a kòŋ wò, a sham wò, a leéy fo wò, a yiì, é shilív shé shi kú a dzə nyaáŋ ghán sidzə̀m.

Timoti wáa shèm yéʼéy kisaŋe

³ M taʼ, e kfə̀n remrí kinyo ke mò‑oò suuy e wò e ghan se mò‑oò du e Masedonia, boorì wò ji à kú a dzə e Efesor. Kú a dzə fo, e fíʼ sərír shúu wìr ve á ghán fo, yéʼey vinyo, la ví yòʼ a shemsín wùn à ké Jesus Kristu ki.

⁴ Kú a shèm fo á wáa way vifií é vinjeenjèm ve vimfèr ve ví sov a dzə̀ rám wìr ji á yén kilíŋ ke ŋgaàŋ kér e Nyùy kinyò, a bó yòʼ dzə̀ á yèn bìíy gheéy. Vinyo vee shoon vi dzə̀ ve ví yii, a wíri ghaa vinyo gháan, táŋ a dzə̀ wún. A bó yòʼ dzə̀ ví yèʼéy wír, wù wày shilív e Nyùy wùn, a yu a dzə̀ fó fo.

⁵ Kú a shèm vinyo vee shooy vi shémen, é wíri fíʼ a kòŋnìn. A dzə̀ wíri kù a ker melív me juŋ mè fo afə́r véví, a yiì a dzə̀ vinyo ve melív mev mè bínsi, a yu a dzə̀ fo Nyùy, e bó a kòŋnìn.

⁶ Wír ámóʼó màʼtì ne yee shoon yee dzə́ə, e nèn a bìʼ a dzə̀ vinyo ve kisaŋ vi.

⁷ Áwune yáŋri ji bo á kì yéʼey wíri nsər se Nyùy, a bó á yòʼ fə̀m kì kinyo ke á yéʼeyì gheéy, a bó á yòʼ kì nsàv nsər ye áwune rə́si sə́ ŋgúm shó rə̀n.

Mo dzə̀ á lì nsər Nyùy

⁸ Vèsən kì ji nsər Nyùy dzə̀ kifá ke juŋ ki, a wìr fen lì e dzəə yee réŋ,

⁹ a kiíy ji Nyùy yòʼ‑oò fó nsər a ji á kfən lì, e shèm shó e wír vee là jayí bàm. Wù‑uù fò a dzə̀ bìʼ wír ve á jáy vinyo e ŋgeʼ, táv kitú, káy wun káyín, yii vinyo ve bi ví, a bó á yòʼ kì kifá kímóʼ kí ji Nyùy, e bó a ghvəm gheéy. Wìr lo, wù nèn yùyrí tàr wov wùn yè wov, kìn wír wùmòʼ,

¹⁰ vilum wàa jàŋ kinjàŋ, vikìy wàa ghan viŋkar. Wìr lo, wù shaà wiíy, e lì lumèn, ámóʼó wàa shoŋ vishóŋ vé wìr, ámóʼó wàa ghan, a boʼtí kimboʼtì, a lìʼ kilìʼ ké kisaŋ ki ji nsaʼ fíʼ koo wír. Nyùy kfən fò nsər bìʼ wír adzə̀m ve á yii vinyo, la ví yòʼ a shemsín wùn à yéʼéy ye ruú,

¹¹ ye yí lo a dzə̀ fó sáʼka wo juŋ wo Nyùy‑iì wayin e mǒ kiwo, m wáa fìʼtì və̀n. A dzə̀ sáʼka wo wù din vikuʼùy vé wun woo Nyùy wo wù gòʼòn kàŋ mòʼón.

Por shéʼri Kristu wo wù shamen wun

¹² M nén a beèrì Taàtá wòsən Jesus Kristu feyì mo wù‑uù wayin shilív e mǒ wùn ji dzə̀ m yiì á lim rə̀n. A m lim a dzə̀ mo wù foon vitaáví ve m wáa lìm sho.

¹³ Mo m fə̀m‑eè dzə́ fo mbìy, suuy vinyo ve kisaŋ vi é bàm wó, kuurì wun, ron wuú wìr və́, wù ku yòʼ lì mo é lìm fèn. A wù‑uù shám mo, bìʼ fo mò‑oò yii vinyo vìn, a bó m yóʼ ne kìíy wír wo dzəə̀n Kristu, e làa yòʼ a kiíy ji m jáy a jayín.

¹⁴ Mo wun woo Taàtá wòsən Jesus kù‑uù shám mo é ŋàŋ, m nèn wày shilív shém e wun wùn, a kòŋ wun sa lèn.

¹⁵ Duŋrì yee jii, Jesus Kristu‑uù lo wìy e ndzə fèn ji wun sə́ aŋgàa vinyò ve bi ví, aá fíʼ lùŋe dzə̀ rú féyì. A dzə̀ wìr kù wày shilív sə́ shó shidzə̀m. A m dzə̀ fon aŋgàa vinyò ve bi vee shooy.

¹⁶ Jesus Kristu nèn shàm mo woo fon aŋgàa vinyò ve bi ví və̀n ji wun fíʼ dìn a mo wun yii kfə́men ji weè, shiyì, é wíri fíʼ a yen, a way shilív sá e wun wùn, e wìy nəə́ e dzə̀ʼə̀m yee là may.

¹⁷ Á kú a kwa Nyùy wo dzəə̀n Fon wo wù sáʼ ghán sidzə̀m, Nyùy, wo bó yòʼ dzə̀ wù kpù, a bó yòʼ dzə̀ wìr yèn sí rə́. Kù jòʼsì wun wo dzəə̀n rú Nyùy. Á kú a wùʼsì yír rə́ viyá viyá là may. Amen.

Lim ye Timoti wáa lìm

¹⁸ Wan wom Timoti, m kù wày kinyo ke m kì suuyin a dzə̀ e wò kiwo. Kú a yiì a dzə̀ mo m suuyin, a kuumé vinyo ve wír ámóʼó‑oò yuun fo Nyùy, a tiisí e wò kitu vi, é ví wáa ŋaʼár shilív shé, áà wáa tiy e Nyùy shùu rər kitávín.

¹⁹ À lóo màʼ, à kù a tiy a dzə̀ é kinyò ke wò‑oò wayin shilív shó, a yiì a dzə̀ kíwun ke shilív shé shi bínsi ji dzə̀ á kinyo ke ru kí. Kú a kiíy jii, wír ámóʼó lò ne, e kùn a dzə̀ é vinyò ve melív mev mè sháʼninè, e nèn màʼày kinyo ke ru kí ke vé‑eè wayin shilív shó fo mbìy.

²⁰ Wír vìn ámóʼó dzə̀ Himenayur wùn Aleŋsanda, a m wáy wír vee abaà vin lèn a dzə̀ e Satan kiwo, aá yú mo á koó, e fiír fó a ghan, a bivír yír Nyùy.