1 Tesalonika 3 - ŊWÀʼ NYÙY

Por túm Timoti fo wír veé Tesalonikàá wùn

¹ Mo vèr‑iì sí kuúme ven é ŋàŋ, a kí tárir ver, vèr meé é Aten, e nèn yèn ji bòŋ é vèr Silar goʼ kér fó,

^2-3 e tùm á fər wòsən Timoti fo vèn. Fər wòsən Timoti və̀n dzə̀ ŋgaà lìm Nyùy wo vèr wun fiʼtì sáʼka wo juŋ woo kùm Jesus Kristu. Mo vèr‑iì kiiyin ne ji vèn yén ŋgeʼ e ŋàŋ, vèr nèn a fàn fo melív men mè wáa weèy, e tùm Timoti ji wù wiy, e tàvír ven, e tìr ven mo dzə̀ vèn wày shilív e Nyùy wùn kijuŋ. A vèn kì sá ji ŋgeʼ see shoon si kù kér fó a koóy vèsən vee aŋgàa biimé adzə̀m.

⁴ Vèn kuúmé mo mò‑oò sí tír ven é ghan se vèsən‑eè dzəə̀n ji ŋgeʼ si waà wíy a koóy. A sì síwun se sí kooy ven lèn.

⁵ Mo mò‑oò sí rəm vinyo vìn vidzə̀m, a ví tárir mo, m nen yèn ji bó yòʼ dzə̀ m kfə̀n a siʼsíʼ, e tùm Timoti fo vèn ji wù wiy, e lèéy a ji vèn sà kù dzəə́ wáy shilív e Nyùy wùn á? A mò‑oò fan fo kí wáa dzə ji kìn Satan woo ŋgaà mùm bìnèr ne ven, é lim yérí lay kisáŋ.

⁶ Timoti nen kfə̀n é bàm lèn e sáʼka wo juŋ jii, vèn kù wáy shilív e Nyùy wùn, koŋ wun, du duùn á fo mbìy. Wù kfən sùúy sa jii, vèn kuúme ver á ghán sidzə̀m, kfə̀n kér shií fó yen ver réŋréŋ á mo vèr kér sa fó yen ven.

Wír veé Tesalonikàa rəə̀r shilív shé Por

⁷ Afə̀r ver, vèr dzə́ bèn, a vèr yén sa ŋgeʼ, a wíri kfə̀n ban ver. Mo vèr yuun ne lèn ji vèn kù dzəə́ tíy vèn à Nyùy, shilív shí nen neèm ver fó ŋgeʼ fèn.

⁸ A bó kinyo kímóʼ kí yòʼ dzəə́ jívir ver lèn gheéy, bìʼ fo vèr kiiyin ne ji vèn kù dzəə́ tíy kitávín vèn à Jesus Kristu.

⁹ Vèr lóo kuumé ven lèn, Nyùy nèn a yiì, vèr wàa ker kishéʼrì ke kuʼùn kí, a bó yòʼ dzə̀ vèr kìíy móo beèrì wun bìʼ ven.

¹⁰ Vèr nén a bùnrì e shùy, a bùnrì vitsə́ʼ, là dór ji Nyùy ku wìy yiì, é vèsən kfən yènnín, é vèr fíʼ màysì, e yeʼéy ven vinyo vímóʼ ví ve vèn dzəə́ méŋé, é vèn wáy shilív e Nyùy wùn, e shaà bèy.

¹¹ Vèr nén a lon ji Tàr wòsən Nyùy wùn Taàtá wòsən Jesus Kristu ku yiì, é vèr koóy á kintóʼ kée wìy, e yen ven.

¹² A vèr kfə̀n lón sa ji Taàtá Jesus ku yiì, é vèn wáa kòŋnìn, e kfə̀n a kòŋ sa wir dzə̀m, a dù fo mbìy réŋréŋ mo vèr koŋ sa ven.

¹³ Vèn lóo yiì bèy, é wù nèn a tavír melív men, é vèn wìy a dzə wír Nyùy ŋkuuŋkùŋ. Wíy lóo dzə e ghan se wun woo Taàtá wòsən Jesus wíy a wìy wùn à wír vəə́ adzə̀m, é vèn nèn a tiy sa e Nyùy woo Tàr wòsə́n si, là nsem.