1 Samuel 7 - ŊWÀʼ NYÙY

¹ Wír veé Kiriat‑Jearime nèn wìy, e lì ŋkùv mensàŋ Nyùy Tàr, e dù sho e Abinadav lav e gwan fo wù‑uù shiiyì. Á shóʼ wán və woo Eleasar ji wír woo jeéy wo wù wáa leéy fo ŋkùv mensàŋ Nyùy Tàr.

Samuel tínen nsaʼ se wìr veé Isray

² Kèʼ fo kishiíy fóo fèy, ŋkùv mensàŋ ku nèn a dzə e Kiriat‑Jearim, e dzə̀ʼə̀m fo ntàmda moo kiyá mbaà bey. Wír veé Israyi nèn lò a toŋ, a lon ji bo á kì kfə́n a fo Nyùy Tàr.

³ Samuel nèn yòŋ wír veé Isray adzə̀m, e sùúy aáwune jii, «A vèn sí taʼ e kfən fo Nyùy Tàr, vèn à shilív shén shí shidzə̀m, vèn fə̀tí anyùy kisaŋe fo věn mvəm, bo taaka mebvə̀m me nyùy woo wiíy woo *Ashtoret, e fò vitú vén e Nyùy Tàr, a cù a dzə̀ wun. Vèn yii bèy, é wù nèn yiì fə̀ə́r ven fo wír veé Filistiàá wo.»

⁴ Wír veé Israyi ku nèn tsə̀ʼ mebvə̀m me nyùy woo *Baal, à me nyùy woo Ashtoret mè, a cù a dzə̀ Nyùy Tàr.

⁵ Samuel nèn sùúy jii, «Wír veé Isray adzə̀m, vèn báʼtí é Mispa, é m bunri Nyùy Tàr e fò e vèn.»

⁶ Áwune ku nèn a baʼtí e Mispa. Á báʼtí, e tù mendzə́v, e cuùrì ji cu Nyùy Tàr, e lèm jíŋ kishiíy kifur. Áwune wáa tunrí ajay vév, a suúy jii, «Vèr jày ne e Nyùy Tàr.» Nén a dzə e Mispa fèy fo Samuel‑iì fəəsin ji tàr nsaʼ wìr veé Isray.

⁷ Wír veé Filistiàa lòo yu, e yù ji wír veé Israyi bàʼtí a ne e Mispa, atǎr saʼ veé Filistiàa nèn a koʼ ji a funen áwune. Wír veé Israyi yú bey, e nèn a fàn wír veé Filistia,

⁸ a suúy e Samuel jii, «Lá à yòʼ yàr fó a toŋ e Nyùy Tàr woo Nyùy wor, e fò e vèr ji wù ku fə̀ə́r ver á fo wír veé Filistiàá wo.»

⁹ Samuel lì wan njiì wo wù‑uù dzəə́ nyóŋ vín, e tòn e dzə̀m, e cù Nyùy Tàr shó ji cu ye tonèné. Wù wáa toŋ, a kàn Nyùy Tàr bìʼ wír veé Isray, Nyùy Tàr yú tóŋ rə́.

¹⁰ Kù mo Samuel yii cu ye tonèné bey, wír veé Filistiàa wáa nəə́ áwune e rə́r sí. Nyùy Tàr nèn yiì, kishèv ki wáa wamkír, a baykír, wír veé Filistiàa wáa fàn, a leʼ wír veé Isray léʼén.

¹¹ Wír veé Israyi fəə́ fó Mispa, e shòʼ e wír veé Filistiàá bàm, e yùyrí áwune é dzəə, e dù, e mèé e kirə̀ʼ keé mbìv tsə̀n Bet‑Kar.

¹² Samuel lì tíy, e tùúy e kintìntìn ke Mispa wùn Shen. Wù‑uù shù yír kirə̀ʼ kin ji Ebeneser, shu bèy suuy jii, «E wìy meé lán, Nyùy Tàr kù sə́ ver.»

¹³ Á bèy, wír veé Israyi tòn wír veé Filistia e kishiíy fóo fèy, la wír veé Filistiàa yòʼ kfə̀n dzəə nə̀ə́ áwune e rə́r sí. Nyùy Tàr yòʼ‑oò lo fò kintóʼ e wír veé Filistiàa e Samuel ghan.

¹⁴ Ŋkà se laʼ see kèʼ fó Ekron, e dù, e meé e Gat se wír veé Filistiàa‑aà tònèn wír veé Isray, e sə̀, sí kfə́n e wír veé Israyi, nsay wìr veé Isray nèn kfə̀n aáwune. Nyaáŋ kfə́n a dzə sa e wír veé Isray wùn à veé Amorí nsàn.

¹⁵ Samuel kú a saʼ ji tàr nsaʼ wìr veé Isray, e dù, e meé mo kpúu‑uù liìn wun.

¹⁶ Wù‑uù lo, wù fəə̀ kiyá kidzə̀m, a ghan, a dù e Betel, a dù e Gilgal, a dù e Mispa, a tinén nsaʼ se wìr veé Isray fo.

¹⁷ Wù maysì, wù nèn a kfən e Rama fo láʼ rəə́‑əə̀ dzəə̀n, a dzə fo, a tinén nsaʼ se wìr veé Isray. Wù‑uù bòm *kíy cù Nyùy Tàr fó.