1 Samuel 4 - ŊWÀʼ NYÙY

¹ Á bèy, kisúŋnìn ke Samuel ki ghánén woŋ Isray e dzə̀m. Wír veé Israyi nèn lò, e fəə̀ ji á du, e fùnèn wír veé Filistia. Áwune dù beè e Ebeneser, wír veé Filistiàa beè e Afek.

Wír veé Filistiàa faásí ŋkùv mensàŋ

² Wír veé Filistiàa fəə́r vé rər vév, á dù tàrnín wùn à wír veé Israyi. Rə́r sí tám, áwune táv, e ghàʼ wír veé Isray, e yùyrí áwune ansə̀kì akweè.

³ Vé rər veé Israyi kfə́n é bàm é kilaʼáy, kfə́m sé wìr sév sí wáa ghaynín jii, «Yiì ka, é bo Nyùy Tàr maʼti, é wír veé Filistiàa ton vèsən? Vèsən du, e lì ŋkùv mensàŋ Nyùy Tàr fó Shilo, e wìy, a ghan sho, é wù fíʼ a sə vèsən fo aŋgàa vibàn vesəné wo.»

⁴ Wír veé Israyi nèn tùm wíri é Shilo ji á du, e wìy a e ŋkùv mensàŋ Nyùy Tàr woo Taà Mànjòŋ, wo kàvàʼ və dzəə̀n é nsàn vifa veé yuv, ve ví tíynin e nsər ŋkùv, a ví kér vav si. Á wáa wìy e ŋkùv mensàŋ Nyùy, a wón Eli vee Hofni wùn Finehasi dzə̀ é ŋgoo.

⁵ Ŋkùv mensàŋ Nyùy Tàr wìy, e mèé e kilaʼáy, wír veé Israyi wáa yòv kitávín, a kèŋ, nsay wáa sə̀ʼ.

⁶ Wír veé Filistiàa yú kiyor, e nèn a ghaynín jii, «Kfə́ə kiyòr kee ben ki dzə̀ keé le e wír veé Hibrùú kilaʼáy?» Wír veé Filistiàa lò, e kìíy ji ŋkùv mensàŋ Nyùy Tàr wìy a ne e wír veé Israyí kilaʼáy,

⁷ e nèn a fàn, a suúy jii, «Nyùy wìy ne e wír veé Israyí kilaʼáy. Kí bìr ne e vèsə́n kitu. Kfə́ə kinyò kee ben ki yòʼ‑oò yiì ne kòóy.

⁸ Ŋgeʼ si dzə̀r ne e vèsə́n kitu. Yíi fəə́r la vèsən fo anyùy ve tavín viné wo? Dzə̀ anyùy vee shooy ve vé‑eè màʼàn kfəə́ se ŋgeʼ se tavkín sí sidzə̀m e wír veé Ejiví kitu e woʼ.

⁹ Wír veé Filistia, vèn kúr shilív shí. Vèn tiím moo vilum. Là bey, bo vèsən yíi a dzə akwǎn wìr veé Isray mo áwune‑eè dzəə̀n akwàn vesən. Vèsən funen moo vilum.»

¹⁰ Á bèy, wír veé Filistiàa nèn fùnèn, e tòn wír veé Isray, kibér ki léʼkír, e dù aáwuné melaʼ. Kilày ki‑iì dzə̀ kigháʼán. Wír veé Israyi lày vé rərí nsə̀kì mtaár, aàdzə̀me‑eè dzə̀ ve vé‑eè ghán e kiwuú kí.

¹¹ Wír veé Filistiàa kfən faàsì ŋkùv mensàŋ Nyùy, e yùyrí sa wón Eli vee abaà vee Hofni wùn Finehas.

Kpú Eli

¹² Wìr woó Benjamin wùmòʼ léʼ fó shùu rər é kishiíy fóo fèy, a dù e Shilo, a wù sátí ne ndzə̀y fó wùn, e kfə̀n yòʼ nsay e kitu.

^13-15 Wù meé fó, a Eli dzə́ e wun ntaʼ e ghaa dzəə, yuúri virə́ʼ, bìʼ fo wù‑uù yaʼ feyì ji tàm kinyo ki kòóy á ŋkùv mensàŋ Nyùy. Eli‑iì dzə̀ kiyá nshòv waamé e mbvə̀ʼə̀ (98), a sí rəə́ səə́né ne, a bó wù yòʼ dzəə́ yén virə́ʼ. Mo wìr və̀y nəən é ŋkàlaʼ, e yòŋ kinyo ke kí kooyin, ŋkàlaʼ dzə̀m waámé tóŋ. Eli yú tóŋ rə̀y, e dzə̀r jii, «Kfə́ə toŋ yee béne dzə̀ yeé le?» Wìr və̀y nèn nyèŋ, e dù yèn Eli,

¹⁶ e yòŋ e wun jii, «M dzə̀ wír wo wù wìyìn fó shùu rər, m sòsìn fo fo lán.» Eli dzə́r shó jii, «Rə́r sí maʼ e lé wan wòm?»

¹⁷ Wìr wo wù kì wìyìn e sáʼka və̀y bìnèr jii, «Wír veé Filistiàa tòn ne wír veé Isray, e yùyrí e dzəə ye biibí. Wón vé vee abaà vee Hofni wùn Finehasi sì aŋkfə. Á faàsì ne ŋkùv mensàŋ Nyùy.»

¹⁸ Mo wù toʼon ji á faàsì a ne ŋkùv mensàŋ Nyùy, Eli gbù fo ntaʼ kindzə̀msìbàm é shùu kày, e kìv kilòŋ, e kpù, bìʼ fo wù‑uù siìn ŋgàywìr, a wù kfə̀n dzərì. Wù wáa kpu bèy, a wù sáʼ ne wír veé Isray ji tàr nsaʼ kiyá mkweè.

¹⁹ Wiiy Finehas woo wán və wáa dzə e bvə́me, a wù sì fó mentsə̀m me dzə̀ə́. Wù yú sáʼka woo ji á faàsì a ne ŋkùv mensàŋ Nyùy, e kfə̀n yù ji tàr à lum və kpù á ne, lum və kpú á sa, wù nèn sàsìn a lum, e lùm bey, e nèn dzə̀ə́ wán. Wù‑uù lùm é ŋàŋ, vitaáví ví mày,

²⁰ wù nèn a kpu. Vikìy ve vé‑eè ghár wune suúy shó jii, «Lá à yòʼ a fàn. À dzə̀ə́ ne wán lumèn.» Vé‑eè suuy bèy, á bó wù yòʼ gwarìrì, e bóo fə̀m a ghay.

²¹ Wù shù yír wan ji Ikabod, shu bèy, suuy jii, «Viwìr veé Isray vi dù ne.» A wù‑uù shu bèy, bìʼ fo vé‑eè faàsìn ne ŋkùv mensàŋ Nyùy, tàr à lum və kpú, á kfən yùyrí lúm və.

²² Wù nen kù yòŋ jii, «Viwìr veé Isray vi dù ne, bìʼ fo á faàsìn ne ŋkùv mensàŋ Nyùy.»