1 Samuel 31 - ŊWÀʼ NYÙY

Kpú Saul wùn à wóné

¹ Wír veé Filistiàa nèn lò, e màʼ rə́r wùn à wír veé Israyi é Gwan Gilboa, e yùyrí wír veé Isray fo anín, ámóʼó nyéŋkír.

² Wír veé Filistiàa nyoòrì Saul wùn à wóné, e yùyrí wón və́ vee Jonatan wùn à Abinadad, à Malkishua.

³ Rə́r sí gìm Saul e dzəə ye tavín, mvəne koó wun, e lèmér e ŋàŋ.

⁴ Saul suúy e ŋgaà ŋkeè və jii, «Shóʼ nyùy yè, e yùyrí mo shó, fo viŋgà ve wìr veé Filistia vee améŋnyùy vìne wiy, e yùyrí mo, a binsí mbeeteé.» Ŋgaà ŋkeè və fàn feyì, e tèn fóo yuyrí wun. Saul nèn lì nyùy rə̀r rə, e gbù e kitu wo.

⁵ Ŋgaà ŋkeè yén ji Saul kpù á ne, e nèn lì rə́ə yee nyùy rə̀r, e gbù sa e kitu wo, e kpù wùn Saul.

⁶ Á mo Saul wùn à wón və́ vee ataári, à ŋgaà ŋkeè və, à wìr Saul e dzə̀m‑eè kpuun ben kishiíy kimòʼón.

⁷ Wír veé Isray veé ndzə̀n Mboʼ Jesreeli nèn yù ji rə́r sí ghàʼ á ne wír vév, a wáa nyeŋ a nyéŋén, e kfə̀n yù ji á yùyrí a ne Saul wùn à wón vəə́. Vée liysín Jordan e meé foo yú sá. Wìr dzə̀m nèn màʼtì ntèʼ sév, e nyèŋkír. Wír veé Filistiàa nèn yòv ntèʼ see shooy, a dzə fo.

⁸ Ndzə bvəə́shí, e ràn é kwaʼ rər, wír veé Filistiàa dù ji á shóʼtí á vifá ve rər fo dzə́n sé wíri sí wùn, e nèn yèn dzə́n Saul wùn à sé won və́ vee ataár si, a sí néŋnin e Gwan Gilboa.

⁹ Á tín kitú ke Saul, e shòʼóy ndzə̀y sə́ sé rər, e nèn tsə̀nsí vé ntume woŋ Filistia e dzə̀m, á wáa ghan, a fìʼtì sáʼka wo juŋ və̀n aáwuné virə̀ʼ vé anyùy, a fìʼtì e wír véví adzə̀m.

¹⁰ Vé‑eè lèm vifá ve rər vé Saul e kirə̀ʼ ké nyùy woo *Ashtoret, e kùr dzə́n rə́ é wǔn kày ye boméné yeé ŋkàlaʼ yee Bet‑Shan.

¹¹ Wír veé Jabesh Gileadi yú kinyo ke wír veé Filistiàa mùmèn e Saul,

¹² vilum vév ve á kér melíví nèn ŋàʼáy, e ghàn vitsə́ʼ vifur, e dù, e mèé e Bet‑Shan, e sə̀ʼə́r dzə́n Saul wùn à sé won sí fó kày, e dù sho, e tòn e Jabesh.

¹³ Á nèn lì vighvə́r, e dzəə̀mè e sar kici ké *tamarisk e mvə̀mlaʼ yee Jabesh, e lèm jíŋ kishiíy saàmbà.