1 Samuel 3 - ŊWÀʼ NYÙY

Nyùy Tàr jáŋ Samuel

¹ Wáa dzə e ghan sin se wánlè nsùm woo Samuel‑iì lim fo Nyùy Tàr e Eli sar, Nyùy Tàr yòʼ‑oò táv súŋnin e wíri, a bó kí yòʼ táv kooy sa ji Nyùy wáa ghem ndzə, é wìr wáa yen kinyo.

² Yì‑iì dzə̀ é ghan sin, a sí Elií sí səə́ne, a bó wù yòʼ dzəə́ yèn virə́ʼ kijuŋ. Wáa dzə vitsə́ʼ vímóʼ ví, Eli wáa neŋ, a buuné e wun mbìv,

³ a Samuel néŋ sa e rə́ə yee mbìv, é mvə̀m kibàn ké Nyùy Tàr, a dzə̀ é mbìy kirə̀ʼ kee fo ŋkùv mensàŋ Nyùy‑iì dzəə̀n, a lam Nyùyi yóʼ ne ndzə̀mén.

⁴ Nyùy Tàr nèn lò jàŋ Samuel. Wù biímé jii, «Mo və̀ne,»

⁵ e nèn lèʼ, e dù yèn Eli, e sùúy sho jii, «À kì jàŋ mo, mo və̀ne.» Eli suúy shó jii, «M yoʼ lò jàŋ wò. Kfə́n, e dù neèm.» Samuel nèn dù e neèm.

⁶ Nyùy Tàr kfən jàŋ Samuel. Wù nànèn, e dù yèn Eli, e sùúy sho jii, «À kì jàŋ mo, mo və̀ne.» Eli yòŋ jii, «Wan wòm, m yoʼ lò jàŋ wò. Kfə́n, e dù neèm.»

⁷ Kí wáa koóy bèy, a bó Samuel yòʼ‑oò ló ne kìíy mo Nyùy Tàr yii súŋnin e wìr.

⁸ Nyùy Tàr kfən jàŋ Samuel fo akàŋ vee ataár, wù túm é yuv, e dù, e yèn Eli, e sùúy sho jii, «À kì jàŋ mo, mo və̀ne.» Eli nèn kìíy ji kì jàŋ á Nyùy Tàr wán və̀n.

⁹ Á bèy, Eli suúy e Samuel jii, «Dù e neèm. A wù kfə̀n jàŋ wò, à yòŋ jii, ‹Nyùy Tàr, á suŋnín, ŋgaà lìm wò yuúri.› » Samuel nèn dù, e neèm fo wù‑uù néŋé.

¹⁰ Nyùy Tàr wìy, e tìím fo, e kù jàŋ mo wù kì sí jaŋè ji Samuel, Samuel. Samuel nèn yòŋ jii, «Á suŋnín, ŋgaà lìm wò yuúri.»

¹¹ Nyùy Tàr nèn sùúy e Samuel jii, «Leéy, e yèn, m wíy yiì kinyo ke tavín kí é Isray ke shúu wíy ma wir dzə̀m wo wù wíy yu kinyo kìn.

¹² Kishiíy kí wíy gheén, é m maʼ ŋgeʼ sidzə̀m se mò‑oò yòŋèn e Eli kfəə, é la yìmòʼ yòʼ bèr.

¹³ Mò‑oò lo yòŋ e wun ji m wíy màʼ a ŋgeʼ yee là may e wun kfəə. Wón vəə́ buʼtì vinyo, a wù leey leèyín, e làa yòʼ a sə̀r.

¹⁴ Á bèy, m nen lìʼ ji bó cúu yòʼ dzə̀ shó, e wìy dù mày ye dzə̀ yí kwaày jay woo Eli lav.»

¹⁵ Nyùy súŋnín bey, Samuel kú a neŋ fo. Ndzə yiì ràn, wù mvə̀ʼtì shuu se kibàn ké Nyùy Tàr, a wù fan fóo yòŋ e Eli kinyo ke Nyùy kì ghemen ndzə, e yìi, wù yú.

¹⁶ Eli yòŋ jii, «Wan wom Samuel.» Samuel biímé jii, «Mo və̀ne.»

¹⁷ Eli dzə́r shó jii, «Nyùy Tàr kì sùúy e wò ji ka? Lá à yòʼ lìtì fo mò. Aà lìtì kinyo fo kinyò ke Nyùy kì suuyin e wò, Nyùy kù màʼ ŋgeʼ ye tavín e wò kitu.»

¹⁸ Samuel nèn kwèr kinyo kidzə̀m e Eli. Eli nèn sùúy jii, «Dzə̀ wun Nyùy Tàr. Wù ku yiì kinyo ke kí gheenen wun.»

¹⁹ Nyùy Tàr kú a leéy fo Samuel, wù wáa kuy. Wù kfə́n a yiì ji lá jì e mòʼón yòʼ tùm fó nsay fo kinyò kidzə̀m ke Samuel‑iì fiʼtì.

²⁰ Wìr woó Isray e dzə̀m, e kèʼ fo Dan, e dù, e meé e Beersheba nèn kìíy ji Samuel dzə̀ á rú ŋgaà ntum Nyùy Tàr.

²¹ Nyùy kú a wìy e Shilo akàŋ akàŋ, a dìn kitú kfə́ e Samuel, a suŋnín e wun.