1 Samuel 27 - ŊWÀʼ NYÙY

Davir e wír veé Filistiàá wòŋ

¹ Davir nèn lò, a kwàʼtì fo wun shiliv jii, «Kishiíy kí kù wiyì ke Saul yíi yuyrí mo. Bòŋ ke m nyéŋ, e dù e wír veé Filistiàá wòŋ, Saul yií taʼ mo ntéŋ fo wír veé Israyí mvəm, dórí, bo m bòy ne.»

² Davir nèn lò, wùn à wír və́ vee ghií ntuùfuú líysín é Gat, e nə̀ə́ e Fòn Akish woo wan Maok sar vàv.

³ Davir wùn à wír və́ víyi, à kfə́ə sév sí ku nèn a dzə e Gat wùn à Fòn Akish. Davir wáa dzə fo wùn à vikìy və́ vee abàá, vee Ahinoam woó Jesreel wùn Abigail woo wiiy ŋkfə Nabal woó Karmel.

⁴ Saul yiì yù ji Davir nyèŋ á ne, e dù a e Gat, e nèn yàr fó a tàʼ wun.

⁵ Davir lò, e sùúy e Fòn Akish jii, «Nyàr káʼ, aá fèn koŋ mo, á fò mo á mvəmlaʼ ye terí yìmòʼ, é m wáa dzə a sho. Bó shií yòʼ waà dzə̀ wo kwǎn fòne wáa dzə a wùn wun e ŋkàlaʼ ye wiy.»

⁶ Akish nèn fò wun mvəmlaʼ yee Tsiklag. Á kinyo ke kí‑iì yiìn, é bo Tsiklag wáa dzə kirə́ʼ ké afòn veé Juda, e kèʼ fo ghan fóo fèy.

⁷ Davir dzə̀ʼə̀m e wòŋ Filistia kiyá e ŋwee e kweè.

⁸ Davir wáa dzə fo bèy, wùn à wír vəə́ wáa lò, a dù, a nəə́ wír veé Geshur e rə́r sí, à veé Girsìi, à veé Amalek ve vé‑eè sí dzə́ e mbìv wòŋ foo fèyi. Aá funèn bèy, du duùn é Shur, e dù, e meé e Ejiv.

⁹ Davir nəə́ rə́r bey, e yùyrí vilum wùn à vikìy adzə̀m, e kùúy anjiì wùn aànàʼa, à vimbèʼbìy ví, aàkameri, à ndzə̀y sí, e nèn kfə̀n é bàm, e yèn Akish.

¹⁰ Akish dzə́r e Davir jii, «À kì dù rə́r feé lán?» Wù bìnèr ji wun kì dù á e mbìv wòŋ Juda yee tsə́n, kìn ji wun kì dù á e mbìv wòŋ yee Jeraameel, kìn ji wun kì dù é mbìv wòŋ yee fo wír veé Kene dzə́.

¹¹ Davir‑iì fəə́, wù yùyrí wir dzə̀m, à lùmèn, à wiíy, la wìr mòʼón yòʼ kfə̀n a dzə wóo dù e Gat, e fìʼtì kinyo ke Davir wùn à wír vəə́ lovtin. Á liì wo Davir‑iì kérí e ghan se wù‑uù dzəə̀n é wòŋ Filistia.

¹² Akish wáa tiír vifií e Davir wùn é ŋàŋ, tiir bèy, yén ji mo wír veé Israyi sí ban Davir e ŋàŋ, bo wù kù sì á wir lìm və, e wìy dù, e mày.