1 Samuel 26 - ŊWÀʼ NYÙY

Davir kfən bàvtí dzəʼə̀m Saul

¹ Wír veé Tsiv ámóʼó wìy, e yèn Saul e Gibea, e sùúy e wun jii, «À kù yòʼ kì ji Davir laay e Gwan Hakila wo wù kiʼ Jeshimon a?»

² Á bèy, Saul nèn sə̀y é woʼ yeé Tsiv wùn à və́ vé rər ve tavkíné veé Isray ansə̀kì ataár ji á du, e tàʼ a Davir.

³ Á dù, Saul nèn tàm kiláʼáy kfə́ é ghaa dzəə e gwan woó Hakila wo wù kiʼ Jeshimon, a Davir kù dzə̀ kfə́ é woʼ. Wù kiíy ji Saul fəə̀ á ne, a jwim a wun fo woʼ,

⁴ e nèn fə̀ə́r vé ŋkiyi, e tsə̀nsí. Á dù, e yèn rú ji Saul mèé a ne fo.

⁵ Davir nèn dù fo Saul‑iì tamen kiláʼáy, e yèn Saul wùn Abner woo wan Ner wo yì‑iì dzəə̀n mfòómé və rə̀r, aá néŋ, buúne. Saul‑iì néŋ e mvə̀m kilàʼáy, a vé rərí neém, e kaàrí wun e tàr.

⁶ Davir wáa dzə fo wùn à Ahimelek woo wír woó Hit, à Abishay woo fər Joav ve yè wòv‑iì dzəə̀n Tsəruyia. Wù nèn dzə̀r aáwune jii, «Yii sə́y vèr la e Saul kilaʼáy, e yèn wun?» Abishay bìnèr jii, «Wòsò sə́y.»

⁷ Davir wùn Abishay nèn sə̀y e Saul kilaʼáy vitsə́ʼə́ vee shooy, a Saul néŋ, buúne e kintìntìn ke kilaʼáy, a wù túy kòŋ rə́ fó nsay e wun ghaa kitu, a Abner wùn à vé rərí neém, e kaàrí wun e tàr.

⁸ Abishay suúy e Davir jii, «Nyùy wày ne ŋgaà wò vibàn e wò kiwo lán. Màʼtì, é m shóʼ kòŋ rə́, e sòv wun sho, e tàŋ e nsay. Bó yòʼ dzə̀ m sòv akàŋ abaà.»

⁹ Davir nèn sùúy e Abishay jii, «Lá à yòʼ lèmér wun. A wìr làʼ kiwó e fòn wo yoʼon Nyùy Tǎr kitu, bo wù kù tò ne e kinyò.

¹⁰ Rúrú, mo Nyùy Tàr dzəə̀n shó, bo Nyùy Tàr kitú kfə́ kù wíy yuyrí Saul, kìn wù wíy kpu a dzə̀ é shùu rər, kìn e wun ghan sé kpu.

¹¹ Yii bèy, Nyùy Tàr ku kìm mo fo m láʼ kiwó kém e fòn wo yoʼon Nyùy Tǎr kitu. Wòsò ku lì a dzə̀ kòŋ ye yí dzəə̀n e wun ghaa kitu wùn à kitém ke mendzə̀v kí, a dù sho.»

¹² Davir nèn lì kòŋ wùn à kitém ke mendzə̀v ke kí‑iì tíy e Saul ghaa kitu ki, áwune nèn lò, a bó wìr mòʼón yoʼ yèn áwune, la wìr mòʼón yòʼ kìíy kinyo ke kí kooyì. Bó wìr mòʼón yòʼ‑oò lo yìmèn. Áwune kù‑uù buúne buùnén, bìʼ fo Nyùy Tàr‑iì màʼàn mbuùné se tavín sí aáwuné si.

¹³ Davir màʼtì à Saul, e lìysín, e tìím e kitu ke gwan kwaʼda,

¹⁴ e nèn jàŋ vé rə́r Saul wùn à Abner kitávín jii, «Abner, à yú mo á?» Abner dzə́r jii, «Dzə̀ wò la wo à waáme, yim fon?»

¹⁵ Davir bìnèr jii, «Abner, à yòʼ dzə̀ wír wo tavín é Isray à? Yiì ka, la à yòʼ a kìŋsìn tàr won wo dzəə̀n fon? Wìr kì nə̀ə́ ne e kilaʼáy ji wun yúyrí á fon.

¹⁶ Abner, à gbù ne fo wò lìm. M suuy kin, kan a dzə̀ yír Nyùy Tàr ji ven adzə̀me dzə̀ á wír vée yuyrí, bìʼ fo vèn yoʼ kìm tàr won wo Nyùy Tàr yoʼon ji fon. Leéy, kǒŋ fòne bèé? Kitém ke mendzə̀v ke kí‑ii dzəə̀n e wun ghaa kitu ki bèé?»

¹⁷ Saul kiíy jí Davir, e nèn dzə̀r jii, «Və̀y dzə̀ wò Davir woo wan wom a?» Davir biímé jii, «Nyàr, dzə̀ á mo à.»

¹⁸ Wù kfə́n a dzə̀sì jii, «Fòn sà jwím mo woo ŋgaà və lìm bèn ji ka á? M sà yèe le á? Jay wom sà dzə̀ ka á?

¹⁹ Nyàr, á ku yuùrí a kinyo ke m suuyì. A lòo dzə, a yií Nyùy Tàr ji á wáa jwim mo, bo a m yiì cu fo wun, yí kù yiì, wù kùvsín á kwaʼtì rə́. Yii bèy, wáa dzə, a yií wíri, ŋgeʼ Nyùy Tàr kù gbù aáwuné kitu, bìʼ fo á jùmèn ne mo fo Nyùy Tǎr wòŋ ji m wáa dzə e wòŋ wo dzə̀ m kù a ghvəm a dzə̀ anyùy kisaŋe.

²⁰ Lá kí yòʼ kòóy ji á yúyrí á mo é kitum ke sən kí kwaʼda fo Nyùy Tàr. Bìʼ ka mo fòn woó Isray fəən ji wun wìy yùyrí kifə́r fó kifər kee mo. Fòn jwím mo mo á jwìm gwíy bèn bìʼ ka?»

²¹ Saul nèn sùúy jii, «M yiì ne kinyo ke bi kí e wò. Wan wòm, á kfən e bàm. M yòʼ dzəə́ wìy mùm ji m lémér wò, bìʼ fo à bavtin dzəʼə̀m yém vitsə́ʼ vé lán vi. Mò‑oo dzə kiyúŋ. M jày ne kinyo ke tavín kí.»

²² Davir suúy jii, «Nyàr, kòŋ rəə́ á rə̀ne. Á tsə́nsí á wánlè ntoʼ, é wù kóʼ á, e sə̀.

²³ Nyùy Tàr yii lo, wù wàa laamé wir dzə̀m fo yiì ye juŋe wùn à yee tìítiyi. Lán və̀n, Nyùy Tàr kì wày ne fon e mǒ kiwo. Yii bèy, la m yòʼ yùyrí fon wo Nyùy Tàr yoʼon.

²⁴ Mo m bavtin dzəʼə̀m fòn lán, Nyùy Tàr ku yiì sa réŋréŋ e mò, e bòyìr mo fó ŋgeʼ sidzə̀m.»

²⁵ Saul suúy e Davir jii, «Nyùy səəvi wò wan wòm. Vinyo vidzə̀m ve à yíi a yiì vi yíi ghan kijuŋ.» Á bèy, Davir nèn a dù du rə́, Saul wáa kfən fo laʼ.