1 Samuel 24 - ŊWÀʼ NYÙY

Davir bávtí dzəʼə̀m Saul

¹ Saul dù, e fùnèn wír veé Filistia bèy, e kfə̀n é bàm, á nèn sùúy e wun ji Davir waà dzə̀ á e woʼ yeé En‑Gedi.

² Saul nèn shòʼtí vé rər ve tavkíné fó Isray ansə̀kì ataár, wùn áwune fəə́, e dù, a tàʼ Davir wùn à ŋgoo rə fó ghaa gwan fo bvə́y se kwaʼ si gháné.

³ Wù lòo dù e dzəə, e mèé e kirə̀ʼ ke vibìn vé bvəy vi dzəə̀n fó, a mbvə̀ʼ dzə̀ sá fo, e nèn nə̀ə́ sho ji wun du a kishwáŋ. Á bèy, a Davir wùn à wír vəə́ kì dzə̀ shó fo bàábàm.

⁴ Wír Daviri nèn sùúy e wun jii, «Kin ki dzə̀ kishiíy ke Nyùy Tàr‑iì yòŋèn é ghan se wù‑uù suuy e wò jii, ‹M wíy way ŋgaà vibàn wò e wò kiwo, áà lóvtí shó mo à koŋè.› » Davir ŋàŋrì, e dù, e tìn kór kikum ké Saul, la wù yòʼ kìíy.

⁵ Kitú ke Davir ki nèn a saʼ wun ji wun waà tìn á kor kikum ké Saul.

⁶ Wù suúy e wír vəə́ jii, «Nyùy Tàr shàʼnín fo m yii kfə́ə kinyò kee ben e tàr wor, wun wo Nyùy Tàr shoʼon, á yóʼ ji fon, kìn ji m nan kiwó kém, e kùm wun sho, bìʼ fo shoʼon Nyùy Tàr wun.»

⁷ Davir súŋnín jí sìn bèn, e nèn sə̀r wír və́, e làa yòʼ biimé ji á kum á Saul. Saul lò fo mbvə̀ʼ, a dù du rə́,

⁸ Davir fəə́ fó bam, e nàn jí, e bùn Saul ji nyàr. Saul bínkír, e lèéy bám. Davir tsə́m ndzəə́, e làʼ kitú e nsay,

⁹ e sùúy e Saul jii, «Sà bìʼ ka mo á yuúri wír ve á suuy e fòn ji m wày ji m yúyrí wun a?

¹⁰ E kishiíy ké lán ki, á yèn ne a e sí rəə́ mo Nyùy Tàr wayin á fon e mǒ kiwo e mbvə̀ʼ fèn. Wír vém ámóʼó kì suuy ji m yúyrí á fon. Yii bèy, m bávtí á wun, e sùúy a jii, ‹Bó yòʼ dzə̀ m nàn á kiwó kém, e kìʼ a tàr wor shó, bìʼ fo yoʼon á Nyùy Tàr wun ji fon.›

¹¹ Tàr wor, á wàá leéy, á leéy á kinsàr ke ndzə̀y ke m kér e kiwo kìn. M tìn á fo wun kikum, e làa yòʼ yuyrí a wun. Kin ki yiì ne, á kiíy á ji m yòʼ méŋ a sáʼ rə́, a bó m yòʼ taʼ e yuyrí a wun. Á jwím mo ji á yúyrí, a m yoʼ fə̀m jày á kinyo e wun.

¹² Nyùy Tàr ku sàʼ nsaʼ vèr wun, aá yén ji sà jày la á? Kù yíi bìnèr a Nyùy Tàr fó kinyò ke fòn yii e mò, bìʼ fo bó yòʼ dzə̀ m mùm ji m yúyrí á fon.

¹³ Vé‑eè maʼ a ŋgàn yìmòʼ fó ŋgùʼ jii, ‹Yii kfə́r arim virim.› Yòʼ dzə̀ á kiwó kém kí kùm á wun.

¹⁴ Fòn woó Isray sà fəə̀ ji wun yúyrí a dzə̀ ka á? Wù sà jum a dzə̀ ka á? Sà kimkpú ke jwi a? Kifə́r fó kifər a?

¹⁵ Nyùy Tàr ku sàʼ á nsaʼ vèr wun, e tìnén. Wù ku nə̀ə́ a e mvə̀m kinyò fèn, e bìnèr, e fò e mò, e fə̀ə́r mo á fo fòn kiwo.»

¹⁶ Davir súŋnín, e màysì bèy, Saul dzə́r jii, «Ŋgaà wo m yú jí rə və̀y kù dzə̀ rú wò Davir woo wán wom a?» Wù nèn tsə̀ŋén tóŋ.

¹⁷ Wù kfən sùúy e Davir jii, «À yoʼ jày e mò. Wò‑oò yii kijuŋ e mò, m yií kibí e wò.

¹⁸ Lán və̀n, à dìn ne mo à koŋ mo, bìʼ fo à yoʼ lò yùyrí mo, a Nyùy Tàr kì wày ne mo e wò kiwo.

¹⁹ A dzə̀ wìr koò ŋgaà vibàn və, e kfə̀n màʼtì wù dù, a bó wù yoʼ lèmér wun à? Nyùy Tàr ku laàmé wò fo bavtí ye à bavtin mo lán.

²⁰ M kì rúrú ji à wíy a dzə a fon woó Isray, a sáʼa wíy tuúy e wò kiwo.

²¹ Lìʼ wòsò e Nyùy Tǎr yir jii, à yòʼ wíy siíy, e laàr a rám yém fó kitu ke nsay. À yòʼ wíy siíy, e yiì, é yír yémé lay á fo tàr wór kfəə.»

²² Davir nèn yiì kilìʼ wùn Saul. Saul nèn bìnkìr, a kfən fo laʼ, Davir wùn à wír vəə́ wáa koʼ e kirə̀ʼ ké kilìr fo vé‑eè dzəə̀n.