1 Samuel 22 - ŊWÀʼ NYÙY

Á yúyrí atàá cù

¹ Davir nèn lò, e nyèŋ fó Gat, e dù e mbvə̀ʼ ye yì dzəə̀n é ghaa Adullam. Afə́r və́ wùn à kfə́ə tàr woví yú ji wù dzə̀ á fo, e nèn sə̀y fó, e tàtí wun.

² Wíri nèn wìykìr, e bàʼtí e Davir ghaŋ moo ghii kweè bèy, a kù dzə̀ wír ve vé‑eè dzə́ e mvə̀m ŋgeʼ wùn à veé mvə̀m kaa, à ve sáʼa yòʼ‑oò ló a gheén áwuneé, wù wáa dzə kilìmbìy kév.

³ Davir kfən lò fo fo, e dù e Mispe e wòŋ Moav, e sùúy e fòn woo fó jii, «Nyàr, á wàá ku màʼtì, é tàr wor wùn yè wor wiy, a dzə a wùn à fòn, e dù, e meé a mo m yíi yen kinyo ke Nyùy yíi yiì e mò.»

⁴ Á bèy, wù nèn màʼtì áwune e fòn woó Moav. Á ku nèn a dzə wun à fòn ghán sidzə̀m se Davir‑iì laay e virə̀ʼ vé kilìr.

⁵ *Ŋgaà ntum Nyùy woo Gad wìy lò, e sùúy e Davir jii, «Lá à yòʼ dzə́ə a shiíy fèn e kilìr. Lò, a dù e wòŋ woo Juda.» Davir nèn lò, e dù e kòv woo Heret.

⁶ Saul nèn yù ji á yèn á ne Davir wùn à wír vəə́, á wáa suúy e wun woo Saul bèy, a wù dzə́ e sar kici ké *tamarisk e mbìv taa e Gibea, kér kòŋ é kiwo, a nsheèlav sə́ sidzə̀m si tiím, e kaàrí wun.

⁷ Saul nèn sùúy aáwune jii, «Ven vee wír veé Benjamin, vèn yuúrí. Vèn kwaʼtì ji wan Jessi və̀y wíy fo ven súm sí, e fo ven viboó vé vitiír vé *vayin à? Vèn kwaʼtì ji a dzə̀ wù lèm ven ji amfòómé və́ a?

⁸ Á kifá ke kí yiìn, vèn wáa woŋ wúu yém a? Wìr fo vèn yòʼ‑oò lo sùúy e mò ji wan wom koò ne a viŋkar wùn wan Jessi və̀y. Wìr fo vèn yòʼ kér shií fo mò, fə̀m yée suúy e mò ji wan Jessi woo wír fo wír vémé sí taʼ a dzə́ə yée yuyrí mo, kìn ji wan wom tóm a wun.»

⁹ Doeg woo wír woó Edom wo wù‑uù tíy wùn à nsheèlav si suúy jii, «Mò‑oò yèn wan Jessi və̀y, a wù wíy, e yèn Ahimelek woo wan Ahituv e Nov.

¹⁰ Ahimelek‑iì lo lì kinyo ke Davir, e beè Nyùy Tàr shó, e nèn fò Davir vifá ve yi, e kfə̀n fò sá nyùy Goliat woo wir Filistia e wun.»

¹¹ Fòn toóy taà cù woo Ahimelek woo wan Ahituv wùn à kfə́ə rəə́ e dzə̀m, à wìr dzə̀m wo yì‑iì dzəə̀n taà cù e Nov. Á nèn wìy, e yèn fon.

¹² Fòn yòŋ jii, «Wan Ahituv, yuúrí.» Wù biímé ji nyàr, wun waà yuúri.

¹³ Fòn Saul dzə́r jii, «Bìʼ ka mo vèn wàn Jessi wóŋ wúu yém? Bìʼ ka mo wò‑oò foon viyíkìr e wun, e kfə̀n fò nyùy shó? À kfən lì kinyo kfə́, e beè Nyùy sho, a wù bìnkìr ne lèn, e kìʼ mo, a tàʼ dzə́ə yée neèr mo.»

¹⁴ Ahimelek bìnèr jii, «Bó wìr woo jwáʼ fo wír fòne yòʼ sà kù dzə̀ Davir a? Bó wù yòʼ sà dzə̀ sə́ woó ntoʼ a? Kí kér wun wír ve á shiy fon, a wìr dzə̀m woó ntoʼàn ghvə́m wun.

¹⁵ Nyàr, sà kù mày lán wo m liìn kinyo ke Davir, e beè Nyùy sho a? Ke á yoŋ ji vèr wóŋ a wuú fòn, nyàr káʼ, lá fòn yòʼ lòr á ŋgaà lìm və və̀n, kìn wír fo mǒ kfəə. M yoʼ kìíy a kinyo kùm kinyo kìn.»

¹⁶ Fòn suúy e Ahimelek jii, «Vèn à kfə́ə yée kù lo, e kpu wír adzə̀m.»

¹⁷ Wù yòŋ bèy, e wàm nsheèlav sə́ se sí‑iì dzəə̀n e wun ghaŋ jii, «Vèn shaa, e yùyrí atàá cù Nyùy Tàr víne, bìʼ fo áwune suusin wó wùn à Davir. Áwune‑eè kìíy ji Davir wàa sí léʼé, e làa yòʼ suúy e mò.» Yii bèy, la nsheèlav se fòn si yoʼ mùm, e màʼ wó yév áàtàá cù Nyùy Tàrí kitu.

¹⁸ Fòn nèn sùúy e Doeg jii, «Shaà, e yùyrí atàá cùu.» Wù nèn yùyrí áwune adzə̀m. Wù‑uù yùyrí atàá cù nshòv sitàn e mwaamé é kishiíy fóo fèy, aàdzə̀me‑eè sí maʼ shiŋkèéy shé kikum.

¹⁹ Wù kfən dù, e laàr Nov wo dzəə̀n ntèʼ atàá cù. Wù‑uù yùyrí vilum wùn à vikìy, à wón vee ŋgày sé wìr, à ve bóri, e kfə̀n yùyrí sa anàʼ wùn à vimbèʼbìy ví, aànjiì vee fóo.

²⁰ Yii bèy, wan Ahimelek woo lumèn wùmòʼ lò, e lèʼ, a yírí dzə̀ Abiyatar. Wù léʼ, e dù, e tàtí Davir,

²¹ e bì wun mo Saul yuyrin atàá cù Nyùy Tàr.

²² Davir bínér e wun jii, «Mò‑oò yèn Doeg woo wír woó Edom e Nov e kishiíy kee shooy, e kù kìíy ji wù waà yíi dù, e fìʼtì a e Saul. Lòné lò a dzə̀ fo mò, é bo á yúyrí kfə́ə tàr won e dzə̀m.

²³ Gòʼ wòsò. Lá à yòʼ a fàn. Wìr wo wù taʼ e yuyrí wò kù taʼ sa e yuyrí mo. À yíi lùŋ, aà fen gòʼ wòsò.»