1 Samuel 21 - ŊWÀʼ NYÙY

Davir léʼ Saul

¹ Davir nèn dù fo taà cù woo Ahimelek wùn é Nov. Taà cù yén wun, e nèn a fàn, a dzər jii, «À ghàn é le, e bó a dzə vèn mòʼón? Wìr bùú fo wò bàm bìʼ ka?»

² Davir bìnèr jii, «Fòn lòo tum mo, e sùúy ji lá m yòʼ yiì, é wìr kiíy á kinyo kùm ghán ye wun tumen á mo shó rə̀n. Kee bìʼ wír vém, m yòŋ ne aáwune fo vèr áwune ló tar.

³ Á bèy, à kér ka é kiwo? Fó mo ntuʼ se kiban sitàn, kìn kifá ke à kérí.»

⁴ Taà cù bìnèr e Davir jii, «M yòʼ kér kibán lèn ke a dzə̀ wìr dzə̀m yì. Kibán ke kí dzəə̀n kí dzə̀ ke á cuùn ne Nyùy sho. Yii bèy, a wír vée lò a dzə, a bó á yoʼ lò shìíy e vikìy, bo dzə̀ á yì.»

⁵ Davir bìnèr jii, «Ké ru kí, vèr áwune yoʼ sìíy shìíy e vikìy réŋréŋ mo m yii lóo fəə, m kù a dzə. Fə̀m lóo dzə ghán yee fó tèr, wír vémé kù bàʼtí vitú vév ji á du a dzə̀ á ntum Nyùy, e nèn a baàmè fóo lor vitú vév. Bo dzə̀, á wàa dzə le lán wo á du a dzə̀ ghán yee jeéyí?»

⁶ Á bèy, taà cù nèn fò kibán ke cù e Davir, bìʼ fo kibán ke wù‑uù kér ki kù‑uù jòʼsìn kee shooy ke vé‑eè tsə̀ʼə̀n ne fo kidàŋ, aá cú ne Nyùy sho, e bóo wìy e ke fíy ki fó.

⁷ Wù wáa fo bèy, a ŋgaà lìm Saul wùmòʼ dzə̀ fó ji wun kwaŋri á kinyo e Nyùy Tǎr si. Wù‑uù dzə̀ kitú ke anshìy Saul, a dzə̀ wír woó Edom, a yír rəə́ dzə̀ Doeg.

⁸ Davir kfən dzə̀r e Ahimelek jii, «À kér kòŋ kìn nyùy fen a? Á kì bànrí mo e toóyí, m túʼtín, e lò, e làa yòʼ lì nyùy kìn kifá ke rər.»

⁹ Ahimelek bìnèr jii, «M kér nyùy Goliat woo wír woo Filistia, wo wò‑oò yuyrin é Kiwoóy ké Ela. Yì dzə̀ é bǎm shiŋkèéy shé kikum, aá ndzə́m e ndzə̀y sí. Aà kòŋ, à lì. Á nyùy rə̀r ye yì dzəə̀n fen cáʼ.» Davir bínsí jii, «Fó ri e mò. Bó nyùy yìmòʼ yòʼ kfə̀n dzə̀ rú moo rə̀n.»

¹⁰ Davir nèn lò, e kù a leʼ Saul e kishiíy fóo fèy, e lèʼ, e dù, e yèn Fòn Akish woó Gat.

¹¹ Nsheèlav se Fòn Akish si dù, e sùúy e wun jii, «Bó wìr və̀n yòʼ dzə̀ Davir woo fon woo áwuné wòŋ à? Bó yòʼ dzə̀ wun wo vikìy‑iì dzə́n, yovì, táŋ jii, ‹Saul yùyrí wíri nsə̀kì, Davir yúyrí kfə́ ansə̀kì ansə̀kì à?› »

¹² Davir yú kinyo kìy e wùn, e nèn a fàn Fòn Akish woó Gat fánen.

¹³ Wù nèn lò, a yiì aáwuné si mo wù ghaanè a ghaànèn bey. Wùn à fòn lóo dzə, wù nèn a yiì moo ŋgaàbaá bèy. Wù lo, wù wàa kwaà shuu se kày, e kfə̀n a màʼtì, vilii vi wàa səy e wun kighèv.

¹⁴ Fòn Akish nèn lò, e sùúy e nshèelav sə́ sí jii, «Vèn yoʼ yèn ji wìr və̀n baá baán a? Vèn kì wiy, e yen mo shó ji ka?

¹⁵ Dzə̀ ji m búŋ aŋgaàbaá à? Yií ka bo vèn kfə́n a wìy e wùmòʼ ji wù wáa lovtí e mǒ ntoʼ bèn?»