1 Samuel 2 - ŊWÀʼ NYÙY

Bunrì Hanna

¹ Hanna wáa bùnrì jii, «Nyùy Tàr rùnér ne shilív shém e kishéʼrì ki. M yú vijuŋ bìʼ kinyo ke wù yiìn e mò, a m shéʼ aŋgaà vém vibàn shéʼén. Nyùy Tàr, m yú vijuŋ, bìʼ fo à səən ne mo.

² «Wìr wo wù ranen moo Nyùy Tàr yòʼ dzə̀. Nyùy Tàr, wìr woo moo wò yòʼ kfə̀n dzə̀ shó. Rúrú, Nyùy Tàr dzə̀ kilán ke kí kiŋsìn ver, a bó kímóʼ kí yòʼ kfə̀n dzə̀ gheéy.

³ «Ven vé kinsùmrìwùn, vèn sə́tí shuu wóné. Ven ve á kóʼor wún, vèn sə́sín. Nyùy Tàr dzə̀ Nyùy, a wù kì vinyo vidzə̀m. Wù kíyri wír e kinyò kidzə̀m ke wù yii.

⁴ Vinte ve vé rər ví kìvkír ne, aànjoó kfə̀n ne ji antav.

⁵ Wír ve vé‑eè yíkir kúríi sí lim fo ámóʼó, e bó a yikír, a wír ve vé‑eè dzə́ e jìŋé yòʼ dzəə́ buu kifá ke yi. Wiíy woo kár dzə̀ə́ ne wón saàmbà, a wiíy wo wù kér wón anín sì kisáŋ.

⁶ «Nyùy Tàr wìy e kpúu, e kfə̀n wìy e dzəʼə̀me. Wù tsə́nsi wír aàŋkfəə́ wòŋ, a kù fəər wun wír fo fo.

⁷ Nyùy Tàr lo, wù yiì, wír ámóʼó wàa tàn, ámóʼó wàa ker. Wù lo, wù sèn ámóʼó, e kòʼór ámóʼó.

⁸ Wù nan aŋgàa kitàn fo kibvə̀r, kfə̀n fəər aŋgàa ŋgeʼ fo áwuné mvə̀m nyar. Wù táti áwune é ŋgoo wón ntoʼ, dzəʼə̀r áwune áàntaʼ ve kuʼkìné. «Wày wun woo Nyùy Tàr kinsə̀ŋ ke ndzə. Bóm wun ndzə e kitu wo.

⁹ Wù kù wíy a géʼsin e dzəʼə̀m wìr ve á yú wune, a wír ve á buʼtì vinyóo wíy lày e wòŋ aŋkfə. Bó yòʼ dzə̀ wìr sò ndzə ji vitaáví.

¹⁰ Nyùy Tàr wíy bvəʼə́y aŋgàa vibàn və́. Wù wíy wam áwune fó yuv é njà kishèv, e lovtí e kitú ke nsay ki lóvtín kidzə̀m. Wù wíy fo vitaáví e fòn və. Wù wíy tavír sáʼ wìr wo wù yoʼon.»

¹¹ Á màysì fo Shilo, Elkana lòo kfən e bàm fó laʼ e Rama, wan wov Samuel gòʼ fo, a lìm fo Nyùy Tàr, e taà cù woo Eli sar.

Liì kisaŋ wón Eli

¹² A wón wun woo Elií‑iì dzə̀ wír kisaŋe, a bó á yòʼ‑oò kér shií fo Nyùy Tàr.

¹³ Áwune vee atàá cùu‑uù kér liì wo bi féyì wùn à wír ve vé‑eè wiy ji á yii cúu. Wìr‑iì seé nyam cù, á naa, wàn lìm taà cù nèn wìy e kinsòv ke kí kér mfaʼ sitaár ki,

¹⁴ e tsə̀nsí e mvə̀m ntòn. Kifá ke wù sòvìn, e fə̀ə́r, bo sì ké taà cù. Á kù‑uù yii bèy e wír veé Israyi adzə̀m ve vé‑eè wiy e Shilo ji á cu Nyùy.

¹⁵ Kímóʼ kí‑iì kooy sa jii, lóo dzə, a bó á yóʼ ne fə̀m tòn fóm, wàn lìm taà cù nèn wìy, a kàn ŋgaà wo wù yii cu jii, «Fó nyám ye taà cù ton. Bó wù yòʼ yíi a kòŋ ye naán. Fó a dzə̀ ye kó.»

¹⁶ A ŋgaà cù bìnèr jii, bó á yòʼ kì yíi tòmbìy tòn fóm, é bo wù li ye wù taʼà à, wàn lìm taà cù nèn sùúy jii, «Àáyà, fó e mò lèn. Aà dzə̀ là fóo fo, bo mo‑óò faasi fáasin.»

¹⁷ Kinyo ke wón Elií‑iì yii kìn ki‑iì dzə̀ jay wo tavín fo Nyùy Tǎr si, bìʼ fo áwune‑eè leey cu ye á cu Nyùy Tàr shó ntéŋ.

Samuel wáa dzə e Shilo

¹⁸ A wan woo Samuel kù dzə́, lim fo Nyùy Tàr, a wù maʼ shiŋkèéy shé kikum ké cù, aá bá e làv wo fəvír.

¹⁹ Ye wov‑iì lo, wù kfə̀n tsə̀m kikúm kfə́ ke da ki, lóo koʼ wùn lum və ji á yii á cu yeé kitu ke kiya, wù fò shó.

²⁰ Á wiyì, Eli səə̀vì Elkana wùn wiíy, a suúy e Elkana jii, «Nyùy Tàr ku fò wò wón ámóʼó. Wù ku yiì, é wiíy və̀n dzəə́ wón ámóʼó, aá li kirə́ʼ ké wan wo wò‑oò foon ji wo Nyùy Tàr.» Áwune maysì, á nèn a kfən e bàm fó laʼ.

²¹ Nyùy Tàr nèn wìy səə̀vì Hanna, wù dzəə́ wón vee vilum ámóʼó ataár, e dzə̀ə́ vee vikìy abaà. Wan woo Samuel kú a dzə e Nyùy Tǎr shùu lìm, a kuy fo.

Jooně wón Eli vee vilum

²² Yì‑iì dzə̀ é ghan sin, a Eli dzə́n ne feyì. Wù kú a yu vinyo vidzə̀m ve wón vəə́‑əə̀ yii e wír veé Israyi, kfə̀n yú sa mo vé‑eè néŋ e vikìy ve vé‑eè lim e shùu kibàn ké Nyùy Tàrí.

²³ Wù nèn lò dzə̀r aáwune jii, «Vèn yii vinyo vìn bèn bìʼ ka? Wìr dzə̀m kù fer e mò vinyo ve bi ve vèn yii.

²⁴ Àáyǎ wòn vem, kinyo ke m yú, a wír Nyùyi fer ji vèn yii ki yòʼ dzə̀ kinyo ke juŋ ki.

²⁵ A wìr lòo dzə e jày wùn wùmòʼ, Nyùy nəə́ aáwuné nsàn, wù màn jay wov, yii bèy, wìr jáy wùn Nyùy Tàr, bo yíi man la jay və?» Á bèy, la wón Elií yòʼ yù ntir tàr wov, bìʼ fo Nyùy Tàr‑iì sìysìn ne ji wun wíy laàr a áwune.

²⁶ A wan woo Samuel kù kúy kfə́ kuyín, Nyùy Tàr wùn à wíri wáa kòŋ wun.

Ŋgeʼ ye yì wíy koóy kfə́ə Eli

²⁷ *Ŋgaà ntum Nyùy wùmòʼ nèn wìy, e yèn Eli, e sùúy e wun ji Nyùy Tàr suuy a jii, «Yì‑iì dzə̀, a tàr won Aaron wùn à kfə́ə rəə́ dzə̀ə́ akwǎn fòn woó Ejiv, bó m yòʼ‑oò lo dìn kitú kém e Aaron à?

²⁸ Mò‑oò shòʼ kfə́ə rə́ ji yí wáa dzə atàá cù vém, a lìm e mǒ kiy cù, a tòn kiláy, é wìr kfə́n a màʼ shiŋkèéy shé kikum, e bó a suŋnín e mò. Fo rám seé Isray si sidzə̀m, bó m yòʼ‑oò shòʼ a dzə̀ kfə́ə rə́ à? Áwune kfə̀n sə́ vidzə̀ vé nyàm se á ton e mǒ kiy cù. Bó yòʼ fò mo vitaáví ji á wáa sə à?

²⁹ Yiì ka lèn, bo vèn wáa siimé cu wùn aàfómo ve wír vémé fó e mǒ kibàn? Aá kù fó réŋréŋ mo m suuyin. À ghàn é le, bó a ghvəm wón vé, e shaà mo? Wír vém veé Israyi wiy ji á cu mo, à màʼtì wón vé, á shòŋ mbìv sé nyàm se juŋ si, vèn áwune wàa fomér bvəm yén shó.

³⁰ Yú ke Nyùy Tàr, Nyùy wìr veé Isray suuy e wò ki. Mò‑oò lo kàʼ rú ji kfə́ə yée wíy a lìm fo mò ghán sidzə̀m ji atàá cù mo rám yée wíy a dzə. Yii bèy, yú ke Nyùy Tàr suuy lèn ki. Bó kí yòʼ dzəə́ yìi koóy bèy. M sí yiì a nàn wír ve á ghvə́m mo, a sèn wír ve á ŋwáy mo.

³¹ Yuúrí, ghán sí sí wiyì se m yíi yuyrí wón vee vilum adzə̀m vee wò kfəə, é la wan woo wò ram yòʼ dzəə dzə̀ʼə̀m, e dzə̀n.

³² A m kù wíy a səə̀vì wír veé Isray ámóʼó, áà wáa leéy, a yu nyár yév.

³³ Ké wìr fo vèn wo wù wíy ber, a lìm fo mò ji taà cù, ndzə kù wíy sən wun, e làŋsìn, é shilív sə́ shí seem. Wón vé adzə̀me kù wíy a kuy, a shèrkìr shèrkìn.

³⁴ Wón vé vee vilum vee Hofni wùn Finehasi wíy kpu kishiíy kimòʼón, é nèn a dzə kisəəm fo wò ji vinyo vidzə̀m ve m suuyin ví kù waà wíy koóy.

³⁵ A m wíy yiì kee ji yiì a mo, é taà cù woo jwáʼ wáa dzə wo wù wíy a yiì kinyo kidzə̀m ke m koŋè. M wíy səə̀vì wun, é rám rəə́ wìy a lìm ji atàá cù fòn wo m wíy koʼór, e yoʼ.

³⁶ Á bèy, é wìr dzə̀m wo wù wíy gòʼ fo wò kfəə wìy a wìy, a gbù e wun si, a lon mbàm, a lon kimbéʼ ke kiban. Á kù wíy a toŋ e wun jii, ‹Ku lèm mo, é m wáa lìm vèr aàtàá cùu, a koóy kifá ké a yi.› »