1 Samuel 18 - ŊWÀʼ NYÙY

¹ Davir wùn Saul súŋnín e màysì bèy, Jonatan nèn a kòŋ Davir shilív sə́ shidzə̀m réŋréŋ mo wù‑uù koŋ sa kitú kfə́.

² Kèʼ fo kishiíy fóo fèy, Saul ghár Davir ji wù wáa dzə a wùn wun, e làa yòʼ dzə́ə màʼtì, é wù kfə́n é bàm e tàr wóv laʼ.

³ Jonatan nèn gwàr *mensaŋ wùn Davir, bìʼ fo wù‑uù koŋ wun mo wù koŋ kitú kfə́.

⁴ Wù nèn shòʼ kikúm kfə́ wùn à ŋkeè və, à nyùy rə, à kinte ki, à kikuúví kí, e fò e Davir ji wun finer mensaŋ mee shooy.

⁵ Saul‑iì lo, wù wàa tum Davir e virə̌ʼ virə̀ʼ, wù du, vinyo vi kù a dzə vijuŋ. Á bèy, wù nèn kòʼór Davir, wù wáa dzə kitú ke vé rərí. Kinyo kìy ki bòŋ wir dzə̀m, aàtǎr ntoʼo shó.

Saul yú nyár Davir

⁶ Davir‑iì yùyrí Goliat e ghan siy, wùn à vé rərí lòo kfən fo laʼ, vikìy fəə́ fó ntèʼ seé Isray sidzə̀m, a yòv luŋ se kisheʼrì, a dzən, a kùm nshùm sí wùn à lúŋé fóo səəsí Fòn Saul.

⁷ Vé‑eè dzə́né, yovì, kfə̀n táŋ jii, «Saul yùyrí wíri ansə̀kì, Davir yúyrí kfə́ ansə̀kì ansə̀kì.»

⁸ Saul yú bey, wúné kìn wun, wù wáa suúy jii, «Á sí yov ji Davir yùyrí wíri ansə̀kì ansə̀kì, m yúyrí kém nsə̀kì cáʼ. Bo bèr ne ji wù sə́ vifon fo mò.»

⁹ Kèʼ fo kishiíy fóo fèy, wù ku nèn a leéy Davir e sí ye bií.

¹⁰ Ndzə bvəə́shi e ràn, Nyùy tsə́nsí kiyoy ke bi kí, kí wìy, a kàr Saul kitávín, wù wáa buʼtí e lav, a Davir kù dzə́, kum lúŋ mo wù‑uù lo, wù wàa kùm ghán sidzə̀m. Wù wáa kùm bèy, a Saul dzə́, kér kòŋ e wun kiwo.

¹¹ Saul yòŋ fo wun bvə̀m jii, «M lo tsəm Davir, e tàŋ e wǔn lav.» Wù yòŋ bèy, e màʼ Davir e kòŋé, wù bàʼàr. Wù kfən yiì lò, e màʼ, wù ku bàʼàr.

¹² Saul nèn a fàn Davir, bìʼ fo wù‑uù yenen ne ji Nyùy Tàr màʼtì ne a wun woo Saul, a dzə a dzə̀ wùn Davir.

¹³ Á bèy, Saul nèn tsə̀ʼ Davir fo wun ghaŋ, e lèm ji mfòómé wo wù wáa wam wíri nsə̀kì, a lì, a dù sho e shùu rər.

¹⁴ A virə́ʼ vidzə̀m ve wù‑uù maʼ rə́r fó, wù kù‑uù ton tònèn, bìʼ fo Nyùy Tàr‑iì dzəə̀n wùn wun.

¹⁵ Saul yén, a Davir kù ton tònèn bey, e nèn màysì, a fàn wun fánen, a shaà mo wù‑uù fan fo mbìy.

¹⁶ Yii bèy, wír veé Isray wùn à wír veé Juda adzə̀me wáa kòŋ Davir kóŋen, bìʼ fo wù‑uù dzəə̀n kilìmbìy kév, a vinyo vi ghán e wun kiwo kijuŋ.

Davir wáy wan Saul e lav ji wiíy

¹⁷ Saul nèn lò, e dìn wán və woo wiíy woo ŋgàywìr woo Merav e Davir, e sùúy jii, «M yíi fo e wò ji wiíy, aà fèn yíi a ker shilív shé a màʼ rə́r sé Nyùy Tàr shó.» A Saul suuy bèy, kwaʼtì ji Davir yíi lòo màʼ rə́r, é wír veé Filistiàa yúyrí á wun, é la kí yòʼ a dzə ji yùyrí a wun woo Saul.

¹⁸ Yii bey, Davir bìnèr e Saul jii, «M dzə̀ kém la? A kfə́ə yémé mèé e gha é Isray, é bo m wáa dzə sə́juù woó ntoʼ?»

¹⁹ Ghán sí wìy lò, e mèé se vé‑eè yíi fo Merav woo wan Saul e Davir, á nèn fò a dzə̀ e Adriel woó Meholat.

²⁰ Mikal woo wan Saul wùmòʼ nèn kfə̀n lò, a kòŋ Davir. Á nèn sùúy e Saul. Wù yú kinyo kee shooy wúné bòŋ wun.

²¹ Wù wáa kwàʼtì ji wun yíi fo a Mikal e Davir, é wù wáa dzə a kitám ke kí yíi yiì, é bo wír veé Filistiàa yúyrí Davir. Saul nèn kfə̀n kàʼ Davir fo akàŋ vee abaà ji wù yíi a dzə a sə́ və.

²² Saul kfən tùm nsheèlav sə́ ji sí du, e yèn á Davir bám bám, e sùúy sho a ji fòn koŋ a wun, aàtǎr ntoʼo koŋ saa wun. Á suúy shó a ji á lèn a wo dzə̀ wù wàa dzə a sə fòn.

²³ Á dù, e sùúy e Davir bèy, wù suúy jii, «Vèn kwaʼtì ji dzə̀ kinyo fo tèr fó a dzə sə́ woó ntoʼ à? M dzə̀ kém ŋgaà kitàn, a wíri yòʼ fə̀m kì mo.»

²⁴ Nsheèlav se Saul si nèn wìy tiìsí e wun ji a mo Davir waà suuyì.

²⁵ Saul bìnèr jii, «Vèn suúy e Davir ji fòn yòʼ taʼ a kifá kímóʼ kí fo wun ji juu, e shaà a ji wù fó á vinyè vé vilum ve wìr veé Filistia wií, é fòn ku nèn siìr a ŋkfə́tír áàŋgàa vibàn vəə́.» A Saul‑iì suuy bèy, kwaʼtì ji Davir yíi dù, é wír veé Filistiàa yúyrí á wun.

²⁶ Atǎr ntoʼo dù, e fìʼtì kinyo ke fòn suuyin e Davir. Kí gheén Davir, wù wáa kòŋ fó a dzə̀ səjuù woó ntoʼ. Wáa dzə, a bó kishiíy ke vé‑eè yíi wìy e wiíy ki yóʼ ne ghèén,

²⁷ wù lì wír və́, wùn áwune dù, e yùyrí wír veé Filistia ghii baà, e wìy e vinyè ví, e tàŋ e fòn si ji wun fíʼ a dzə a sə́ woó ntoʼ. Á bèy, fòn nèn fò wán və woo Mikal ji wiíy Davir.

²⁸ Mo Saul yenen, e kfə̀n kìíy ji Nyùy Tàr dzə̀ á wùn Davir, a wan və Mikal kfə̀n koŋ a Davir,

²⁹ wù ku nèn màysì a fàn Davir fánen, a fàn e dù meé e ghan se wun woo Saul‑iì kpuun.

³⁰ Ghán sin, wír veé Filistiàa kù‑uù lo, á wàa fəə, a màʼ rə́r. Fo rər sidzə̀m se vé‑eè maʼà, Davir kù‑uù tòn áwune tónen e shaà vilìmbìy ve rər vé Saul vímóʼ ví. Yír Daviri ku nèn a dù, á wáa kiiynín wun feyì ji wír wo tavín.