1 Samuel 16 - ŊWÀʼ NYÙY

Samuel yóʼ Davir

¹ Nyùy Tàr nèn lò, e yòŋ e Samuel jii, «À wíy sòv kitú bìʼ Saul, e dù, e meé e le? M kù mèŋ ne wun fo fòn woó Isray. Wáy meŋgvə́r mè e wò loŋ, e lì kiwuú kí é dzəə. M túm wò fo Jessi wùn é Betlehem. M shòʼ ne wán və wùmòʼ ji fon.»

² Samuel dzə́r jii, «M yíi ghan e le? A kinyo kìn ki tò e Saul kitùʼùr, bo wù yùyrí ne mo.» Nyùy Tàr nèn sùúy e wun jii, «Lì wan nàʼ, a dù sho, du, à sùúy ji à wìy a fóo cù Nyùy Tàr.

³ À du, à bì Jessi, é wù wiy fó cù, é m nèn dìn e wò kifá ke à yii. À yíi yoʼ wír wo m yíi dìn e wò ji à yóʼ ji fon.»

⁴ Samuel ku nèn dù e Betlehem mo Nyùy Tàr kì suuyin. Wù meé fó, kindzə́m kí gwàr atǎr ntèʼ ve vé‑eè wiy e yen wun. Á dzə́r e wun jii, «Ghán yée dzə̀ ye juŋe á?»

⁵ Samuel biímé ji «Eè, dzə̀ ye juŋe. M wìy ji m cu á Nyùy Tàr. Vèn *kfə́mrí vitú vén ví, e wìy, é vèsən cu Nyùy.» Wù suúy ji Jessi wùn à wóné kfə́mrí á sa vév vee vitú, e wìy a fo cù.

⁶ Mo áwune wìykìn, Samuel yén Eliav, kwaʼtì rəə́ wáa dzə jii, rúrú, wìr wo wù tíy e Nyùy Tǎr si və̀n sì wùwun.

⁷ Nyùy Tàr suúy e Samuel jii, «Lá à yòʼ a leéy wun a dzə̀ fó si, kìn fó vidà, m kìnèn woo shoon. M yòʼ yii leey wír a dzə̀ mo wíri leeyì. Wìr lo, wù wàa leéy wír a dzə̀ fó si, a m leey kém a dzə̀ fó shiliv.»

⁸ Jessi nèn jàŋ wán və Abinadav, e lì, e wìy sho e Samuel si. Samuel suúy jii, «Nyùy Tàr yoʼ shòʼ sá wun.»

⁹ Jessi kfən wìy e Shamma, Samuel suúy jii, «Àáy, Nyùy Tàr yoʼ shòʼ wun.»

¹⁰ Kù bey, wón Jessìi shaà saàmbà e Samuel si, wù ku sùúy ji Nyùy Tàr yoʼ shòʼ á áwune.

¹¹ Samuel nèn dzə̀r e Jessi jii, «Sì wón vé adzə̀m bèn à?» Wù bìnèr jii, «Woo kinjòʼsìbàm dzə̀, a wù leey anjiì e kwaʼ.» Samuel suúy shó jii, «Jàŋ, é wù wiy. Bó yòʼ dzə̀ á yiì cu, a bó wù wíy.»

¹² Jessi nèn tùm, á jàŋ, wù wíy. Wù‑uù dzə̀ wánlè nsùm, a wù kiʼ kijuŋ, kfə̀n kiʼ kitávín, a sí rəə́ tókirì. Nyùy Tàr suúy e Samuel jii, «Və̀n dzə̀ wùwun, yóʼ wun.»

¹³ Samuel nèn lì loŋ meŋgvə̀r, e yòʼ Davir sho aàfə́r vəə́ si. Kèʼ fo kishiíy fóo fèy, Kiyoy ke Nyùy Tàr kí wìy fo Davir e dzəə ye tavín. Samuel nèn lò, e kfə̀n é Rama.

Davir lim fo Fòn Saul

¹⁴ Saul wáa dzə, a Kiyoy ke Nyùy Tàr kí‑iì bìn ne ndzə̀m e wun, Nyùy Tàr tsə́nsí kiyoy ke bi kí, kí wìy, a kàr wun.

¹⁵ Atǎr ntoʼ Sauli suúy e wun jii, «Nyàr, á ku lèéy a mo Nyùy tsənsin kiyoy ke bi kí, kí wáa kàr a fon.

¹⁶ Fòn ku waà fò á vitaáví ji aŋgàa lìm vəə́ taʼ á wír wo wù kiìn móo kùm lúŋ. Kiyoy ke bi kí yií wiy, lóo kàr fon, ŋgaàŋ lóo kùm lúŋ, é kí nèn màʼtì a fon.»

¹⁷ Saul suúy áàtǎr ntoʼ vəə́ jii, «Vèn taʼ wír wo wù kiìn móo kùm lúŋ kijuŋ, e wìy fòo mò.»

¹⁸ Wánlè ntoʼ wùmòʼ suúy jii, «Jessi woó ŋkàlaʼ Betlehem kér wán woo lumèn, a wù kì móo kùm lúŋ kijuŋ. Wù dzə̀ wánlè nsùm, a wù kér shilív she tavín shí, a kfə̀n dzə̀ wir rə̀r. Wù càʼ e kisuŋnìn, e kfə̀n bòŋ fo si, a Nyùy Tàr dzə̀ wùn wun.»

¹⁹ Á bèy, Saul nèn tùm nsheèlav si fo Jessi wùn ji wù tsə́nsí á wán və Davir wo wù leey a anjiì.

²⁰ Jessi nèn tàʼ *kibán wùn à meluʼ mè, à wàn bvəy, e kùr é kimbèʼbìy, e tsə̀nsí ji wan və Davir wàá du shó, e fò e fòn.

²¹ Davir wìy yèn Fòn Saul, e nèn kèʼ a lìm e ntoʼ. Saul wáa kòŋ wun e ŋàŋén, e nèn lèm ji ŋgaà ŋkeè və.

²² Saul nèn kfə̀n tsə̀nsí ntum fo Jessi ji wù maʼti é Davir goʼ, a lìm a fo wun, bìʼ fo wun koŋ a Davir e ŋàŋ.

²³ Davir ku nèn a dzə e ntoʼ, lóo dzə e ghan se kiyoy ke bi kí wìyìn, a kàr Saul, Davir lì lúŋ rə́, a kùm. Wù lóo kùm, kiyoy ke bi kiy ki nèn màʼtì Saul, wù wàa ker rəsìn.