1 Samuel 14 - ŊWÀʼ NYÙY

Jonatan nəə́ wír veé Filistia e rə́r sí

¹ Wáa dzə e kishiíy kímóʼ kí, Jonatan woo wan Saul suúy e wánlè nsùm wo wù‑uù kér ŋkeè və jii, «Wìy é wòsò líysín é kilaʼáy ké wìr veé Filistia.» Wù wáa yòŋ bèy, a bó wù yoʼ lò sùúy e tàr wov Saul.

² A Saul dzə̀ é Migron, e ghaa Gibea, e sar kici ké *grenadin. Wù‑uù dzə̀ fó wùn à vé rərí moo ghií ntuùfú bey.

³ Taà cù wo wù maʼ shiŋkèéy shé kikum wáa dzə sa fo, a yír rəə́‑əə̀ dzə̀ Ahija, a dzə̀ wan Ahituv woo lúmer Ikabod woo wan Finehas. A Finehas dzə̀ wan Eli, a Eli dzə̀ taà cù wo wù‑uù dzə́ e Shilo. Jonatan yiì lò lò, la wìr yòʼ kìíy.

⁴ A Jonatan‑eè yíi shaà fo kiŋgwàmrì keé Mikmash, e bóo liysín fo wír veé Filistiàa‑aà dzəə̀n. Vimà vé vilan vímóʼ ví wáa dzə vibaà é mbìv see sibaà é kiŋgwàmrì foo fèy, aá yoŋ kímóʼ kí ji Boses, yoŋ kímóʼ kí ji Sene.

⁵ Kímóʼ kí‑iì kiʼ kuy fo Mikmash dzəə̀n, a kímóʼ kí kiʼ tsə́n fo Geba dzəə̀n.

⁶ Jonatan kfən sùúy e wánlè nsùm wo wù‑uù kér ŋkeè və rə̀r jii, «Wòsò líysín fésə e kilaʼáy ké améŋnyùy veé Filistia vìsə, ghanmóʼ, é Nyùy Tàr sə́ wòsò. Yòʼ dzə̀ kinyo ki jìvír Nyùy Tàr fo wù luŋer wíri, e shaà fo wír vee aníne, kìn fo vee ashàri.»

⁷ Wìr wo wù‑uù kér ŋkeè rə̀r və və̀y suúy shó jii, «Yiì kinyo ke kí dzəə̀n e wò kwàʼtì ki, m dzə̀ wòsò vèr à shilív shém shí shidzə̀m.»

⁸ Jonatan suúy jii, «Dzə̀ rú, wòsò lóo liysín, e yiì, aáwune yén wòsò.

⁹ Aáwune lòo dzə, e yòŋ ji wòsò wàá tiím, wòsò nèn tìím, e làa yòʼ dzə́ə dù fo áwune dzəə̀n.

¹⁰ Yii bèy, aáwune lòo dzə, e yòŋ ji wòsò wàá kóʼ á fo áwune dzəə̀n, bo sì kisəəm kee ji Nyùy Tàr koò ne áwune, e fò e wòsò.»

¹¹ Áwune vee abàá nèn dù, e dìn vitú vév e vé rər veé Filistiàa. Wír veé Filistiàa suúy jii, «Vèn leéy, wír veé Israyi vísə mo á soóne, fəə́ fo bii, fo vé‑ee laayin.»

¹² Á nèn jàŋ Jonatan wùn ŋgaà ŋkeè və kitávín jii, «Vèn kóʼ fen, é vèr din ven kifá ke vèn yòʼ‑oo yií ne yèn.» Jonatan suúy e ŋgaà ŋkeè və və̀y jii, «Á koʼ e mǒ bàm. Nyùy Tàr koò ne áwune, e wày e wír veé Israyí wo.»

¹³ Jonatan wáa ŋàŋrì e wóo wùn à e ŋkoŋ si, a koʼ kiŋgwàmrì kìy, a ŋgaà ŋkeè və kù dzə̀ é wun bàm. Á meé e wír veé Filistiàá wùn, Jonatan wáa way áwune é nsay, ŋgaà və ŋkeè wáa wìy fo bàm, a yuyrí.

¹⁴ Áwune‑eè fùnèn vindzə̀ʼ ve mbìy vìn, e teè wíri é kirə̀ʼ, a kí dzə̀ moo kintoʼnìn ke sum bey, e yùyrí wíri moo mbaà bey.

¹⁵ Kindzə́m kí gwàr vé rər ve vé‑eè dzəə̀n é kilaʼáy wùn à veé kwaʼa, à ve vé‑eè dzəə̀n é shùu rərí. Nyùy yiì, nsay sə̀ʼ, wìr dzə̀m wáa fàn e ŋàŋ.

¹⁶ Vé ŋkiy Saul ve vé‑eè dzəə̀n é Gibea e nsay Benjamin fèyi yén, a vé rər veé Filistiàa sí bvəə́ri bvəə̀rín,

¹⁷ Saul nèn sùúy e wír ve wùn áwune‑eè dzəə̀né jii, «Vèn táŋ wíri, e yèn ji sà búŋ ala á? Á táŋ, wáa buŋ Jonatan wùn ŋgaà ŋkeè və.»

¹⁸ Saul suúy e Ahija jii, «Wìy e ŋkùv mensàŋ Nyùy.» Wù‑uù suuy bèy, a ŋkùv mensàŋ Nyùy dzə̀ e wír veé Israyí mvəm é kishiíy fóo fèy.

¹⁹ Kù mo Saul suuy e taà cù bèy, kiyor ki wáa ghaʼtí ghaʼtín e wír veé Filistiàá kilaʼáy. Á bèy, wù suúy e taà cù jii, «Màʼtì ŋkuŋ.»

²⁰ Saul wùn à vé rər vəə́ nèn bàʼtí, e fəə̀ é shùu rər, e lòo leéy, e yèn a wír veé Filistiàa sí jiŋkìr jìŋkìn, funèn áwune áwune e nyùy sév sí.

²¹ A wír veé Isray ámóʼó‑oò lò, e tàtí ŋgoo wìr veé Filistia, é bo á wiy, a koʼ e kilaʼáy. Vee shooyi nèn lò, e jàv ŋgoo lèn e tàtí wír veé Isray ve vé‑eè dzəə̀n wùn à Saul, à Jonatan.

²² Wír veé Isray ve vé‑eè lìrìn áàŋkoŋ veé Efrayime yú sá ji wír veé Filistiàa waà sí nyéŋé, e nèn tàtí sa shúu rər wo wú‑uù jumè, wùn áwune wáa jùm kibí kibí.

²³ Á bèy, Nyùy bòyìr wír veé Isray e kishiíy fóo fèy, rə́r sí màʼ, e kòʼ, e bìʼír e Bet‑Aven.

Jonatan lá vilu

²⁴ Wáa dzə e kishiíy fóo fèy, wír veé Israyi nèn lò, e dòrkír, a ŋaàyì ŋaàyìn, bìʼ fo Saul‑iì lìʼìn wùn áwune jii, «Lòné dzə̀ wó wìr wo wù yíi yi kifá, a bó m laár aŋgàa vibàn vém, kìn a bó shùy yoʼ nə̀ə́.» Bìʼ bey, la wìr rə̀r e mòʼón yòʼ dzəə wày kifá e shuù.

²⁵ Mo á maʼ rə́r bey, e lòo nəə́ e kòv, e yèn vilu fo nsay,

²⁶ e kfə̀n yèn vímóʼ ví, a ví léŋ, fəə́ fo kici, la wìr mòʼón yòʼ fə̀m kùm e shuù, bìʼ fo vé‑eè fan kilìʼ ke wùn à Saul‑iì yiìn.

²⁷ Yii bèy, Jonatan wo bó wù yòʼ‑oò lo yù kilìʼ ke tàr wov‑iì lìʼìn wùn à wíri nèn ràmsì mbàŋ ye yì‑iì dzəə̀n e wun kiwo, e soòsì vilu sho, e là, sí rəə́ nèn raàné.

²⁸ Wìr rə̀r wùmòʼ shúsín, e sùúy e wun jii, «Tàr won kì yiì kilìʼ ke tavín kí wùn à vé rərí ji lòné dzə̀ á wó wìr wo wù yíi yi a kifá lán. Á kifá ke kí yiìn bo wíri wáa ŋaàyì ŋaàyìn ben.»

²⁹ Jonatan nèn sùúy jii, «Àáy, tàr wor wiy a dzə̀ e ŋgeʼ e wòŋàn. Vèn yén mo m yutin vilu shishàr, sí yémé raáné a?

³⁰ A wíri kì yì vifá ve yi ve á kì faàsìn é shùu rər lán, bo kí kì dzə̀ é le, bo bó wíri yòʼ kì yíi laàr wír veé Filistia agháʼán a?»

³¹ Wír veé Israyi fùnèn wír veé Filistia e kishiíy fóo fèy, e kèʼ fo Mikmash, e dù, e meé e Ayjalon. Kishiíy kí wáa mày, aá dórkír ne.

³² Á nèn gbù é kitu ke vifa ve vé‑eè koon é kwaʼ rər moo anjiì wùn aànàʼa, à wón nàʼa, a seerí fo nsay, a kfər e mensə́ mè sho.

³³ Ámóʼó nèn dù, e bì Saul ji wù yén á búʼú mo wíri sí jáy vinyo e Nyùy Tàr, kfə́r a nyám e mensə́ mè sho. Saul suúy jii, «Vèn shòʼór ne nsər. Vèn dzəə́r tíy ye faŋèné, e wìy sho fèn.»

³⁴ Wù kfən sùúy jii, «Vèn fəə́ e wírí mvəm, e sùúy, aáwune wáa wìy aànàʼa wùn aànjìi, a seerí e kitu ke tiy fen, bó a kfər. Lá vèn yòʼ kfə̀n dzəə jày e Nyùy Tàr, a kfər nyám e mensə́ mè sho.» Á bèy, wìr dzə̀m ku nèn a wìy e nyàm rə, a see fo, vitsə́ʼ vee shooy.

³⁵ Saul nèn bòm *kíy cù Nyùy Tàr, a yì‑iì dzə̀ wó mbìyi wo wù‑uù bomen.

³⁶ Saul suúy e wíri jii, «Vèsən nyoori wír veé Filistia vitsə́ʼə́, e laàr áwune, é bo ndzə wáa ran. Lá vèsən yòʼ màʼtì, é wìr fo áwuné mvəm goʼ e tin.» Wíri bìnèr jii, «Yiì kinyo ke kí gheenen wò ki.» Taà cù nèn sùúy kfə́ jii, «Vèsən tombìy tàr o fo Nyùy.»

³⁷ Saul nèn beè Nyùy, e dzə̀r jii, «M nyoori wír veé Filistia a? À yíi koo áwune, e fo e wír veé Israyi á?» Wù dzə́r bey, la Nyùy yòʼ bìnèr wun e kishiíy fóo fèy.

³⁸ Saul toóy vilìmbìy ve rər ji á wiy, aá tar á ji wùn áwune sà jày ka lán a?

³⁹ Wù wáa kàn, a lìʼ jii, «Mo Nyùy Tàr wo wù‑uù bòyìrìn wír veé Isray dzəə̀n shó, wìr wo wù bùʼùn kinyo kìn, kér fóo kpu, a kòŋ wàa dzə wán wom Jonatan.» Wù suúy bey, la wìr yòʼ ghày.

⁴⁰ Saul nèn kfə̀n sùúy e wír veé Isray adzə̀me jii, «Vèn tiím é ndzən fésə, é vèr wan wom Jonatan tiím é ndzən fen.» Áwune bìnèr jii, «Yiì kinyo ke kí gheenen wò ki.»

⁴¹ Saul nèn mbaà Nyùy Tàr woo Nyùy wìr veé Isray jii, «Nyùy Tàr, ku dìn o kinyo ke ru kí.» Wù dín, kí koó kiwuú ké Jonatan wùn Saul, wíri rán.

⁴² Saul nèn kfə̀n sùúy jii, «Vèn tar ó ji sà jày mo moo Jonatan a?» Á tàr, kí koó Jonatan.

⁴³ Saul nèn dzə̀r shó jii, «À bùʼ a dzə̀ ka?» Jonatan bìnèr jii, «M kì ŋèʼ vilu shishàr e kinyè ké mbàŋ, e là. Mo və̀ne lèn, a m sí lo, e kpu.»

⁴⁴ Saul suúy shó jii, «Aà dzə̀ là fóo kpu, Nyùy kù yùyrí mo.»

⁴⁵ Á bèy, wíri nèn sùúy e Saul jii, «A dzə̀ Jonatan kpù é le? Wun wo wù màʼàn rə́r se tavín sí, e tàŋ wír veé Isray fo kpúu. Bó yòʼ dzə̀ kinyo kee bey kí kòóy. Mo Nyùy Tàr dzəə̀n shó, bo bó yòʼ dzə̀ ŋgay nəŋ shòʼóm fo wun kitu. Kinyo ke wù kì yiìn lán kìn ki dzə̀ bey, a sə̀ Nyùy wun.» Á bèy, wíri nèn sə̀ Jonatan fo kpu, la á yòʼ dzəə yùyrí.

⁴⁶ Saul nèn yàr fó a jùm wír veé Filistia, á wáa kfən e bàm aáwuné nsay.

Sáʼ Saul

⁴⁷ Sáʼ Sauli yiì tùúy e Isray, wù nèn kèʼ a fùnèn aŋgàa vibàn və́ adzə̀m veé Moav wùn à veé Ammon, à veé Edome, e bóo lì afon veé Tsoba wùn à wír veé Filistiàa. Virə́ʼ vidzə̀m ve wù‑uù màʼàn rə́r fó, wù kù‑uù tòn tónen.

⁴⁸ Wù‑uù màʼ rə́r moo lumèn bèy, e tòn wír veé Amalek, e sə̀ wír veé Isray fo wír ve vé‑eè nəʼsì áwuneé wo.

Kfə́ə Saul

⁴⁹ Wón Saul vee vilume‑eè dzə̀ ji Jonatan wùn à Ishvi, à Malkishua. Wan və woo wiíy woo ŋgàywìr‑iì dzə̀ Merav, a wo terí dzə̀ Mikal.

⁵⁰ Wiiy və wáa dzə Ahinoam woo wan Ahimaas. Yír mfòómé vəə́‑əə̀ dzə̀ Abner woo wan Ner. A Ner və̀n‑eè dzə̀ fər tàr à Saul.

⁵¹ Kish woo tàr à Saul wùn à Ner woo tàr à Abner‑iì dzə̀ wón Abiel.

⁵² Saul kù‑uù rə́si maʼ a dzə̀ rə́r wùn à wír veé Filistiàa ghán sidzə̀m. Wù‑uù yén wír wo dzəə̀n ntav, wù nèn kù lì ji wír və rə̀r.