1 Samuel 13 - ŊWÀʼ NYÙY

Wír veé Israyi máʼ rə́r wùn à wír veé Filistiàa

^1-2 Saul wìy lò, e shòʼtí vilum fo Isray ansə̀kì ataár, e nèn fò vee nsə̀kì e wan və woo Jonatan, wù lì, wùn áwune dù e Gibea e nsay Benjamin. Saul lì vee ansə̀kì abaà, e lèm ámóʼó é Mikmash, e lèm ámóʼó áàgwan veé Betel. Ké wìr ve á yòʼ‑oò lo shòʼtí áwune, Saul‑iì siìr áwune, á kfə́nkír aáwuné melaʼ.

³ Jonatan nèn lò, e nə̀ə́ wír veé Filistia e rə́r sí, aáwuné kilaʼáy e Geba. Sáʼka dù e wír veé Filistiàá mvəm. Saul suúy, á tóŋ sóŋ, e kaàrí woŋ sho, e tàr ji wír veé Israyi fiʼ yù á sáʼka wo wù dzəə̀n.

⁴ Wìr dzə̀m woó Isray nèn yù ji Saul tòn a ne wír veé Filistia aáwuné kilaʼáy, a vibàn vév ví kù fòy a ne fóyin. Mànjòŋ nèn fəə̀, e dù, e bàʼtí e Saul ghaŋ e Gilgal.

⁵ Wír veé Filistiàa nèn bàʼtí ji á funen á wír veé Isray, aá kér *viténtén vé rər nsə̀kì mtaár, wír ve á kóʼ nyám si nsə̀kì ntuùfú. A vé rərí dzə̀ nyanyày moo síy seé meshavtí. Á nèn kòʼ, e dù, e beè e Mikmash, a kfənér e mbìv Bet‑Aven ye yì kiʼ fo shùy yii tó.

⁶ Wír veé Israyi yén ji kí bìr á ne aáwuné kitu, a rə́r sí ghàʼ á ne, áwune nèn a lìr e mbvə̀ʼ si wùn ǎ bii sí, ǎ nsàn se vilan, ǎ bii sé ndzəv se tuŋén sí.

⁷ Ámóʼó túmsín kév ndzə́v yee Jordan, e dù e nsay Gad wùn à ye Gilead. Saul gòʼ kfə́ é Gilgal wùn à wír ámóʼó, a wír vee shoone fan fan.

⁸ Wù shìy Samuel e Gilgal kishiíy saàmbà mo wù‑uù yòŋèn e wun, la Samuel yòʼ wìy, wíri nèn lò a taʼrí taʼrín.

⁹ Wù nèn sùúy, wíri wìy e vifá ve cù ye tonèn ví wùn à vé cù kikòŋnìn vi. Á wìy sho, Saul nèn yiì cu ye tonèné.

¹⁰ Mo wù kù màysìn cu, Samuel nèn bvə̀y, wù fəə́ ji wùn wun wàá shaʼnin,

¹¹ Samuel dzə́r shó jii, «À mùm kee ben a dzə̀ ka?» Saul bìnèr jii, «M kì yèn, a ghán se wò‑oo kàʼàn sí báŋrín ne, a wíri sí táʼri, a wír veé Filistiàa báʼtí ne e Mikmash, a bó à yóʼ ne wìy,

¹² m nén a fàn ji wír veé Filistiàa sí lo, e səy e Gilgal, e nəə́ mo á e rə́r sí, a m yóʼ ne lòn Nyùy. M nen yèn ji kí bòŋ a ji m yii cu.»

¹³ Samuel suúy jii, «À yiì a dzə̀ kiyúŋ ké kinyò. À yoʼ lò yùnín nsər ye Nyùy Tàr woo Nyùy won foon e wò. A dzə̀ ji à waà kì yùnín, bo à kì wíy a saʼ Isray ghán sidzə̀m.

¹⁴ Yii bèy, sáʼ yée sèéy ne fèn. Nyùy Tàr shòʼ ne wír wo wù gheenen wun, e lèm ji wù wáa saʼ a wír və́, bìʼ fo bó à yoʼ yùnín nsər Nyùy Tàr.»

¹⁵ Samuel nèn lò fo Gilgal, a dù du rə́. Saul siíy, e lò sa, e kòʼ é Gibea e nsay Benjamin. Á meé fó, wù táŋ wír ve vé‑eè berin wùn áwune, á wáa dzə ghií ntuùfú.

¹⁶ Wù nèn lì wán və Jonatan, à wír ve wùn áwune‑eè dzəə̀né, á dù, e beè e Geba e nsay Benjamin foo fèy. Wír veé Filistiàa beè kév a dzə̀ é Mikmash.

¹⁷ Áwune lo, á fə̀ə́r vé rərí shuu e taár ji á wáa dù, a bivír a vifá ve wíri, wúmóʼó wàa dù e mbìv Ofra, e ŋgvən Shual,

¹⁸ wúmóʼó wàa dù e mbìv Bet‑Horon, wúmóʼó wàa dù e mbìv bìíy ye yì kiʼ Kiwoóy ké Tsəboyim e ŋkìʼnìn wòʼ.

¹⁹ Yì‑iì dzə̀ é ghan fen, a bó taà kilàm yòʼ dzə̀ é wòŋ Isray, bìʼ fo wír veé Filistiàa yòʼ‑oò ló a tàʼ é wír veé Israyi wáa fèr nyùy sí wùn à kòŋ sí.

²⁰ Wír veé Isray adzə̀me kù‑uù kér fó a səy e wòŋ Filistia, e bó a say visoó vév wùn à vé nyàm vi, à njàm sí, aàshwàʼa.

²¹ Wìr‑iì lóo say njàm, kìn wù náŋsin a dzə̀ kinshóʼ, wù làʼ sí mbàm. Lóo dzə kisoó ke nyàm kìn ke lim wír sho, wù làʼ mbàm sibaà.

²² Á bèy, rə́r sí wìy a tsəə́m, a bó wìr woó Isray fə̀m e mòʼón yòʼ kér nyùy kìn kòŋ, bánlà Saul wùn wan və Jonatan.

²³ Mo sí tsəəmen, wír veé Filistiàa nèn lò, e lèm sa shúu rər wúmóʼó é kiŋgwàmrì keé Mikmash.