1 Samuel 10 - ŊWÀʼ NYÙY

¹ Samuel nèn lì meŋgvə́r me yoʼ e loŋ, e səə̀rì e Saul kitu, e baàmé wun, e sùúy jii, «Nyùy Tàr yòʼ ne wò ji taà saʼ wìr və́ veé Isray.

² À yíi màʼtì mo lán, lóo dù, é vèn à vilum tárnín abaà e Racel ghaa sày e Tsəlsa wo wù dzəə̀n é bìíy nsay Benjamin. Áwune yíi suúy e wò ji á yèn á ne vimbèʼbìy ve vèn‑ee taʼà, a tàr won shaà ne lèn kinyo ke vimbèʼbìy, a rə̀m a dzə̀ á wò, a ghay jii, mo‑óò yée le e kee bìʼ wán wom kí?

³ «À yíi màʼtì áwune, lóo dù, mee e ghaa kici kee *oak keé Tabor, áà tárnín vèn à vilum ataár, aá du e cù Nyùy e Betel. Wo mòʼón yíi a ker wón bvəy ataár, é wùmòʼ wáa ker ntuʼ se kiban sitaár, é wùmòʼ wáa ker shiluʼ.

⁴ Á yíi shàʼtì wò, e kfə̀n a fo wò ntuʼ se kiban sibaà. Á lóo fo, à sə̀.

⁵ «Kee shooy ki shaa, à dù é Gwan Nyùy e Gibea fo wír veé Filistiàa kér kilaʼáy ké vé rərí. À yíi lòo nəə́ e mvə̀mlaʼ, áà tárnín vèn à ŋgoo aŋgàa ntum Nyùy, aá sə́y fo kirə̀ʼ ké cù, kum lúŋ sí, kum nshùm, kfə̀n tóŋ loŋ. Áwune yíi a yòv, a taŋ Nyùy.

⁶ Kiyoy ke Nyùy Tàr kí yíi sàsìn, e wìy e wò wun, áà kúvsín, a dzə wír wo sən. À yíi tatí áwune, é vèn áwune wáa yòv, a taŋ Nyùy.

⁷ Vinyo vìn vi kooy wò, mayì, à wàa yiì kinyo ke kí dzəə̀n ji á yii, bìʼ fo Nyùy dzəə̀n vèn wun.

⁸ Á bèy, áà nèn a səy fo mǒ mbìy e Gilgal. M yíi wìy, e yen wò fo, e yiì cu ye tonèné wùn à cu kikòŋnìne. À yíi dzə̀ʼə̀m fo kishiíy saàmbà, é bo m wiy, e naàrì wò kinyo ke à wáa yiì.»

⁹ Kù mo Saul màʼtìn Samuel, Nyùy nèn yiì, wun woo Saul wáa dzə wír wo sən. Kinyo kidzə̀m ke Samuel kì suuyin e wun ki gheén é kishiíy fóo fèy.

¹⁰ Saul wùn ŋgaà lìm və meé é Gibea, wùn à shiŋgoo she aŋgàa ntum Nyùy shi tárnín. Kiyoy ke Nyùy ki nèn wìy e Saul wùn é dzəə ye tavín, wù tátí aŋgàa ntum Nyùy vìy, wùn áwune wáa yòv, a taŋ Nyùy.

¹¹ Wír ve vé‑eè kiiyin ne wune yén kinyo ke wù‑uù yii wùn aàŋgàa ntum Nyùy vìyi, e nèn a ghaynín jii, «Fèn kòóy ka wan Kish. Wù sì sá *ŋgaà ntum Nyùy à?»

¹² Wìr wùmòʼ wo wù‑uù dzə́ fo nèn a dzər jii, «Fo ké aŋgàa ntum Nyùy ki, yii kiiy la kitàr?» Á kinyo ke kí‑iì yiìn, é bo á wáa te lám woo jii, «Saul sì sá ŋgaà ntum Nyùy à?»

¹³ Saul màysì yòv wó a yòv, a taŋ Nyùy, e nèn dù e kitu ke gwan fo *kíy cù Nyùy Tàrí‑iì dzəə̀n.

¹⁴ Lùmer tàr à Saul lò yèn wun, e dzə̀r e wùn wìr lìm jii, «Vèn‑ee dzə feé?» Saul bìnèr jii, «Vèr‑ii taʼ vimbèʼbìy, e tàʼ ntéŋ, e nèn dù, e yèn Samuel.»

¹⁵ Lùmer tàr à Saul suúy e Saul jii, «Kii wò, ku sùúy mo kinyo ke Samuel‑ii suuyin e wò.»

¹⁶ Saul bìnèr jii, «Wù‑uu suúy e vèr kiránén ji á yèn á ne vimbèʼbìy.» Saul suúy bey, e làa yòʼ toʼ e lùmer tàr wov ji Samuel kì yòŋ á ji wun yíi a dzə a fon.

Á bún Saul ji Fon

¹⁷ Samuel nèn lò, e jàŋrì wíri, á báʼtí e Nyùy Tǎr si e Mispa,

¹⁸ wù suúy aáwune jii, «Nyùy Tàr woo Nyùy wìr veé Isray suuy a jii, ‹Mò‑oò sə̀ wír veé Isray fo wír veé Ejiví wo, e fə̀ə́r áwune fó Ejiv. Mò‑oò sə̀ sá áwune fo vitúm vidzə̀m ve ví‑iì nəʼsì áwune ví.

¹⁹ M dzə̀ Nyùy wo wù‑uù səən ven fo věn ŋgeʼ si, e sə̀ fo věn akíghàʼ. Yii bèy, a vèn mèŋ ne mo lán, a dzər ji m fó á ven fon. Á bèy, vèn báʼtí ri, e tìím e Nyùy Tǎr si, e ram sí ram sí, e tìím aàkáŋ aàkáŋ.› »

²⁰ Samuel nèn bàʼtí rám seé Isray sidzə̀m, Nyùy shóʼ yé Benjamin.

²¹ Samuel yòŋ, rám Benjamine fəə́ é melav melav, Nyùy nèn shòʼ lav Matri. Lav Matri fəə́, Nyùy shóʼ Saul woo wan Kish, á wáa leéy wun, e làa yòʼ a yen.

²² Á dzə́r e Nyùy Tàr ji ŋwèrín sà kù sì á? Nyùy Tàr bìnèr jii, «Wù sì, a wù lir e nsàn vibàm.»

²³ Wíri nèn lèʼ, e dù, e fə̀ə́r Saul fo nsàn vibàm. Wù wìy, e tìím e wírí mvəm, a wù dár, e shaà wir dzə̀m, a wír vee ji ve dáa tíy a dzə̀ e wun mbèʼ.

²⁴ Samuel suúy e wìr dzə̀m jii, «Wìr wo Nyùy Tàr shoʼon və̀ne. Wìr yòʼ kfə̀n dzə̀ shó e vèsə́n mvəm moo wun.» Wìr dzə̀m ku nèn bìnsí jii, «Nyùy dzəsi dzəʼə̀m Fòn.»

²⁵ Samuel nèn naàrì gháy fòn wùn à lím rəə́, e sàŋ vinyo vee shooy e ŋwàʼ, e neèr e Nyùy Tǎr si, e nèn sùúy, wìr dzə̀m wáa kfən e bàm. Á nèn a kfənkír aáwuné melaʼ.

²⁶ Saul kfə́n sá e bàm e wun laʼ e Gibea, aàntav ámóʼó ve melív mev mè‑eè lum e kinyò ke Nyùy yiìné jumrì wun.

²⁷ Yii bèy, aŋkùmshuù ámóʼó wáa màʼ lám jii, «A dzə̀ jwè və̀n sə̀ ver é gha?» Áwune nèn a leéy Saul ntéŋ, e làa yòʼ a fo wun afómo. Yii bèy, Saul ku lèm kfə́ a dzə̀ nyaáŋ, e làa yòʼ a ci.