1 Samuel 1 - ŊWÀʼ NYÙY

Elkana wùn à kfə́ə rəə́ é Shilo

¹ Wìr wùmòʼ‑oò dzə̀, a dzə̀ wir kfəə Tsuv ye dzəə̀n rám Efrayim, a yír rəə́ dzə̀ ji Elkana. Wù‑uù dzə́ e ŋkàlaʼ yee Rama e mbìv agwan veé nsay Efrayim, a dzə̀ wan Jeroham woo wan Elihu, woo wan Tohu, Tohu wo wù ràmèn fó Tsuv.

² Elkana və̀n‑eè kér vikìy abaà, aá yoŋ wùmòʼ ji Hanna, yoŋ wùmòʼ ji Pennina. Pennina‑aà kér wón, a bó Hanna yòʼ kérí.

³ Yì‑iì lóo dzə kiyá kidzə̀m, Elkana lò fó Rama, e kòʼ é Shilo ji wun du, e ghvə̀m Nyùy Tàr woo Taà Mànjòŋ, e cù wun, aàtàá cù Nyùy Tàr veé ghan fene‑eè dzə̀ Hofni wùn Finehas vee wón Eli.

⁴ Elkana cu Nyùy, wù jàv nyám, e fò yìmòʼ e Pennina, e fò ye wòn é kitu kitu.

⁵ Fə̀m mo wù‑uù koŋ Hanna é ŋàŋ, wù lóo jàv nyám, wù fò ye Hanna kirə́ʼ kimòʼón, bìʼ fo Nyùy Tàr yòʼ‑oò lo fò wun wán.

⁶ Pennina wùn Hanna wáa dzə, a sə kóy. Pennina wáa toònè Hanna e lámé, a tàʼ wun ntéŋ, bìʼ fo Nyùy Tàr yòʼ‑oò lo fò wun wán,

⁷ kù bey, kù bèy mo viyá vi shaa. Á lóo koʼ e Nyùy Tǎr lav, Pennina kù màysì, a toònè shilív shé Hanna tóonen, wù wàa toŋ, a mùm ntéŋ fó yikír.

⁸ Lum və Elkana lo, wù dzə̀r shó jii, «À diy ka? À tèn fóo yikír ji ka? À sov kitú bèn bìʼ ka? Mo wòsò kù sí dzə́, bó m yoʼ shaà wón vee ghvə̀m à?»

^9-10 Wáa dzə e kishiíy kímóʼ kí e Shilo, á yíkír, e kfə̀n nò. Hanna lò e yuv e nyárí shiliv, e dù, a bùnrì Nyùy Tàr, a dìy, a səʼə́r mensíy, a Eli woo taà cù dzə́ e ntaʼ e Nyùy Tǎr shùu lav cù.

¹¹ Hanna lò, e lìʼ jii, «Nyùy Tàr, wò woo Taà Mànjòŋ, aà lòo dzə e lèéy kwàn wó e wun mvə̀m ŋgeʼ, e kuùmé wun, e làa yòʼ làysìn kwàn wó, e fò wun wán woo lumèn, bo m yíi fo wán woo shooy e wò ji sì á wo, e wìy dù, e mày, é la keme yòʼ wìy kùm kitú kfə́.»

¹² Hanna kú a toŋ e Nyùy Tàr bey ntàmda, Eli jaáy, a kiy shuu və́.

¹³ A Hanna bunrì fo wun shiliv, a shúu vəə́ mvərì, a bó á yòʼ yú jí rə. Eli nèn a kwàʼtì ji wù nò á noón,

¹⁴ e lò dzə̀r shó jii, «Meluʼ mèn mè yíi koo wò bèn, e dù, e meé e le? Ku màʼtì meluʼ me noón mè.»

¹⁵ Hanna bìnèr jii, «Àáy taàtá wòm, m dzə̀ wiíy, a m dzə̀ é mvə̀m nyar. M yoʼ nò meluʼ, fə̀m à mené mè. M kì bunrì, neer ŋgeʼ sém e Nyùy Tǎr si.

¹⁶ Lá à yòʼ a kwàʼ ji m dzə̀ á wiiy kisaŋ. M kì bunrì bèn, bìʼ fo m dzəə̀n é mvə̀m nyar ye tavíné.»

¹⁷ Eli nèn yòŋ sho jii, «Á dù vèn à nyaáŋ, é Nyùy wìr veé Isray fó wò kifá ke à kì lóné.»

¹⁸ Hanna suúy jii, «À lóo dzə, à wàa kuumé mo.» Wù nèn lò, e dù yìkír, e làa yòʼ dzə́ə a sòv kitú.

Á dzəə́ Samuel, e kfə̀n fò wun ji cu e Nyùy

¹⁹ Ndzə bvəə́shí, e jàv, Elkana wùn à kfə́ə rəə́ lò e yuv, a bùnrì Nyùy Tàr, e nèn lò kfə̀n é bàm aáwuné laʼ e Rama. Elkana shiíy e Hanna woo wiiy və, Nyùy nèn yù bunrì Hanna.

²⁰ Wù nèn lò tìím bvəm, e dzə̀ə́ wán lumèn, e nèn shù yír ji Samuel. Wù wáa shù bèy, a suúy jii, «Mò‑oò lòn wun fo Nyùy Tàr.»

²¹ Ghán sí kfən ghèén se Elkana wùn à kfə́ə rəə́‑əə̀ yíi dù e Shilo fóo dù e yiì cu yeé kitu ke kiya, e kfə̀n runér ŋkàʼmé wo wù‑uù kàʼàn Nyùy Tàr shó,

²² la Hanna yòʼ dù. Wù suúy e lum və jii, «M yíi shoʼ wán fó vin, é m nèn lì, e dù sho e lav Nyùy, é wù wáa lìm fo ghán sidzə̀m.»

²³ Elkana bìnèr sho jii, «Dzə̀ rú, yiì kinyo ke à yén ji kí dzə̀ kijuŋ ki. Gòʼ fen, e dù meé mo à wíy shoʼ wán fó vin. Nyùy Tàr ku yiì, é ŋkàʼme wò və̀n wáa dzə rú.» Hanna nèn gòʼ fo laʼ, a nyoór wán, e dù meé mo wù‑uù wíy shoʼ fo vin.

²⁴ Wù shóʼ fó vin, e nèn lì, a wù dzə̀ə́ e térí, a dù sho e Nyùy Tǎr kibàn é Shilo, du bèy kér nàʼ woo viyá vitaár wùn à ŋkaà meŋkfə̀ŋ, à kikaayì ké shilùʼ ki.

²⁵ Á dù, e seè nàʼ, e nèn lì wán, e dù fò e Eli.

²⁶ Hanna suúy shó jii, «Éè taàta wòm, à dzəə́ kuúme mo á? Dzə̀ mo wiíy wo wù‑uù tíy, bunrì Nyùy Tàr fen e wò si.

²⁷ Mò‑oò bùnrì, e lòn wán, wù nen fò mo.

²⁸ M nén a fo lèn e Nyùy Tàr, e kèʼ mo wù wíy dzə̀ʼə̀m e dù meé, kù sì wo Nyùy Tàr.» Wù súŋnín bey, áwune nèn làʼ kitú e nsay, a ghvəm Nyùy Tàr fó.