1 Pita 5 - ŊWÀʼ NYÙY

Mo kintatì ki wáa leéy fo áwuné vitu

¹ M nén a tir wír ve dzəə̀n atǎr kintatì e věn mvəm. A m tír moo wír wo dzəə̀n sá taà kintatì wùmòʼ, kfə̀n suuy moo wír wo wù‑uù yenen e sí rəə́ mo Kristu yén ŋgeʼ bìʼ vèsən, kfə̀n suuy moo wír wo vèn áwune wíy nəə́ e vijùŋ ve Kristu wíy wìy sho.

² A m tír ven jii, vèn kú a leéy a fo kintatì ke Nyùy wayin e věn kiwo ki, a dànèr mo wìr yii danèr njiì və. Vèn wáa leéy feyì kijuŋ ji kòŋ a ven, e làa yòʼ a leéy mo á kàn ven kánen. Lá vèn yòʼ a leéy, a dìy mbàm, bìʼ fo kee shooy ki dzəə̀n woómé se kuʼùn sí.

³ Lá vèn yòʼ a ker liì ŋaáka vèn à wír vee shoone. Vèn wáa dìn a dzə̀ liì wo juŋ wo dzə̀ á wàa yen, a jùmrì.

⁴ Vèn lóo yiì bèy, wíy lóo dzə e ghan se Jesus wo dzəə̀n kitú ke anshìy wíy kfən, é wù nə́ŋsí ven e vijuŋ ve dzəə̀n vé Nyùy vi.

⁵ M nen kfə̀n a suúy e vèn vee wír veé baanée jii, vèn wáa yu a kinyo ke atǎr kintatìi suuyì, e kfə̀n a suúy lèn a dzə̀ e wìr dzə̀m jii, wìr wáa yen wùmòʼ woo wír, a shaà kitú kfə́. Vèn wáa kiíy jii, «Nyùy yii méŋ wír ve á yén vitú vév, nèn leey ve á néŋ e wun si, shám áwune.»

⁶ Vèn ku nèn a borkír e Nyùy woo Ŋgaà Vitaàví si. Vèn lóo yiì bèy, ghán sə́ sí wíy gheenè, é wù kóʼór ven.

⁷ Vèn ku wày akíghàʼ véné a dzə̀ e Nyùy kiwo, bìʼ fo kù rə́si géŋsin wun e vèn.

⁸ Vèn wáa yen, a tiy, a kiíy, bìʼ fo Satan woo ŋgaà won vibàn woóne, taʼ wír wóo laàr. A wù beéme moo bvərə̀ʼ wo wù lóo nyàmkìr, virə́ʼ ví wàa sə̀ʼ.

⁹ Vèn ku wày a dzə̀ shilív e Nyùy wùn, a tiy kitávín, e làa yòʼ fo kilíŋ sho gheéy, a kuumé jii, kù dzə̀ sáa mo afə́r vén ámóʼó yén ŋgeʼ e Satan wo woŋ e dzə̀m.

¹⁰ Vèn wáa kiíy ji vèn kù yén ŋgeʼ rə̀n a dzə̀ fó shintàm, é Nyùy wo wù rə́si shám ven ku nèn fə̀ə́r ven fó fo. Wù‑uù lì ven, e tàtí vèn à Kristu ji vèn fíʼ wìy nə̀ə́ e wùn mvə̀m vijùŋ vee là may, a wù kù wíy a leéy fo vèn, a tom ven, é vèn wáa tiy kitávín, é la wìr yòʼ a sə̀ʼ.

¹¹ Vèsən kú a yu a dzə̀ fó fo, é sáʼ rəə́ wáa dù fo mbìy viyá viyá, là may. Amen.

Shaʼtì

¹² M sàŋ shiŋwàʼ shìn fo vèn ben, a sə̀ Silar mo. A m kì wun feyì ji fər wòsən wo dzə̀ wìr wày shilív é wùn wó. M sàŋ ben, e fíʼ tir ven, é vèn kiíy ji kinyo ke m saŋen kin ki din rú á mo Nyùy koŋ vèsən, shám vèsən. Vèn ku nèn ghàr ri vinyo vìn, a tiy sho kitávín.

¹³ Kintatì ke kí dzəə̀n é *Babilon fèn ki shaʼtì ven. Maak woo wán wom shaʼtì sa ven.

¹⁴ Vèn kú a baamé vitú vén, a shàʼnìn moo wír Kristu ve á koŋnìnè. M nén a shàʼtì sa ven, a lon jii, Nyùy ku yiì, é melív men mè wáa dzə nyaáŋ, ven ve vèn à Kristu tatin.