1 Pita 4 - ŊWÀʼ NYÙY

Wír Nyùyi wáa ker liì wov jeéy

¹ Vèsən kì ji Jesus‑eè lì wún wìr, e biìmé ŋgeʼ, a sòrkìr. Vèn ku nèn bàʼtí wún wón sá ji dzə̀ vèn wàa sòrkìr bèy, a kiíy ji wìr biíme ŋgeʼ, lóo kom aghàghir, bo bó yòʼ dzə̀ vifií və́ ví kfə̀n a tiy e vinyò ve bi ví.

² Vèn ku nèn a beʼrí vishiíy ve vèn béʼri e nsay fèn, a way vifií ji vèn wáa yiì a dzə̀ kinyo ke Nyùy koŋè, e làa yòʼ dzə́ə a yiì a dzə̀ mo mensə́ mè lim e věn wùn.

³ A dzə̀ vèn wàa yiì bèy lèn, a kuumé jii, vèn‑eè jìvír ne ghán fó mbìy sinín, a rəsí, a yiì vinyo a dzə̀ vé wìr ve bó á yòʼ kiìn Nyùy. Vèn‑eè yii liì kisaŋ, à vilum, à vikìy, a dzə̀ mo mensə́ men mè limè. Vèn‑eè nó meluʼ, baákirì, yí vitú vén, ghán, yor e lav se melùʼ, kfə̀n maysì cu anyùy kisaŋe, a Nyùy‑iì shàʼnín ne.

⁴ Wáa dzə lèn wo bó vèn yòʼ dzəə́ táti ŋgoo wìr ve bó á yòʼ kiìn Nyùy vìn, a vèn áwune ghán, buʼtì vinyo vee shooy, á wáa ker gháʼ, a ghay kinyo ke kí kooyin, e nèn a bàn ven bánen, a kuùrì ven.

⁵ Yii bèy, lá vèn yòʼ a ghay. Vèn wáa kuumé ji kishiíy kí wíy gheén, aáwune tiím e wun woo Ŋgaà Saʼ wo wù sáʼ wír ve tíne wùn aàŋkfəə́ si, e bìnèr fo vinyò ve á buʼtì vìn.

⁶ Á kinyo ke kí‑iì yiìn, bo á fiʼti sá sáʼka Nyùy wo juŋ aàŋkfəə. Vé‑eè fìʼtì bey jii, mo Nyùy fə̀m‑eè màʼàn ŋgeʼ aáwune, wún woó nsay fène kpú, mo wù kù yii maʼ e wìr dzə̀m, é wún wo fó Nyùyi fíʼ lùŋ, a dzə sa sho mo Nyùy dzə́.

Wìr wáa tiy e ntuʼ ye Nyùy bùʼùn wun sho

⁷ Vèn kì sá jii, ghán se ndzə wíy mày si mèʼ ne a fo mentsə̀m. Kí nén a dzə jii, vèn wáa tiy lèn, a kiíy, a yu kinyo kimòʼón ji bunrì.

⁸ A kinyo ke kí shaàn vidzə̀m ki dzə̀ jii, wìr wáa kòŋ a wír shilív shidzə̀m, bìʼ fo kikoŋnìn ki yii sə́ti ajay anín.

⁹ Vèn wáa sənín vitú vén, é wìr wáa səəsí wír e wùn lav, a ker kijuŋ, e làa yòʼ a ghvə̀vrì.

¹⁰ Mo wìr mòʼón mòʼón fo vèn kér rə́ yee lim ye Nyùy bùʼùn wun, e fò vifií ve wù wáa lìm sho, wù ku nèn a lìm ji wun lim a dzə̀ á fo Nyùy, a sə wír ámóʼó shó.

¹¹ A Nyùy bùʼ wír, wù kiíy mo dzə̀ wù fìʼtì kinyo, ŋgaàŋ wàa fìʼtì a dzə̀ kinyo ke kí lo fo Nyùy. A wo wìr woo mbùʼmé dzə̀ ji wù wáa sə wíri, ŋgaàŋ kù bàʼtí vitaáví ve Nyùy foon e wun vee shooy vidzə̀m, a sə wíri shó kijuŋ. Vèn ku nèn a yiì vinyo vidzə̀m bèy, ji wíri fíʼ a burí Nyùy bìʼ Jesus Kristu wo wù bánri ven, é bo á wáa yiì. Vèsən wáa burí wun, a koʼór yír rə́, é sáʼ rəə́ wáa dù fo mbìy viyá viyá, là may. Amen.

Ŋgeʼ si sheŋrì wír Nyùy shéŋrin

¹² Ŋkàr sem, lá vèn yòʼ a ker gháʼ fo ŋgeʼ se sí kooy ven, a vèn shwí sho moo və́y, mo dzə̀ kinyo ke fíy kímóʼ kí. Sí mum ven múmen, é vèn fíʼ màysì, a tiy a dzə̀ e Nyùy wùn.

¹³ A dzə̀ vèn wàa sheʼrí Nyùy shéʼrín ji wù yiì, vèn wáa yen ŋgeʼ bìʼ kinyo kfə́ mo Kristu‑uù yéné, wíy lóo dzə e ghan se Kristu wíy a wìy, a wù sí kér vikuʼùy a dzə̀ vé Nyùy, é vèn nəə́ sá e wùn mvə̀m vijùŋ, a sheʼrí.

¹⁴ Kí nén a dzə jii, a wíri lò, a suúy vinyo e věn bàm kisáŋ ji bìʼ fo vèn dzəə̀n wír Kristu, vèn kù lì ji bòŋ a vishí vén, bìʼ fo ghán see shooy si dzəə̀n se vèn yú mo Kiyoy ke Nyùy ke kí kér vitaáví ve ghaʼán kí lim e věn wùn.

¹⁵ Yii bèy, lá kí yòʼ kòóy ji á wáy wír fo vèn e ŋgeʼ a dzə̀ bìʼ kinyo ke ŋgaàŋ jayin. Kìn dzə̀ ji ŋgaàŋ yùyrí wír, kìn wù shòŋ kifá, kìn wù jày a dzə̀ ka, kìn ji wù wáyri shuu e wírí vinyò.

¹⁶ A wìr lò, a yen ŋgeʼ a dzə̀ bìʼ fo wù dzəə̀n wir Kristu, lá ŋgaàŋ yòʼ a woomé bìʼ kee shooy. Mo á yoŋ wun ji wir Kristu, wù wáa beèrì a dzə̀ Nyùy, bìʼ fo á yoŋ bèy, a dzə̀ ji mbàmbà Kristu.

¹⁷ Vèn wáa kiíy jii, ghán se Nyùy wíy tinén nsaʼ wìr dzə̀m si ghèén ne, a wù wíy kèʼ a dzə̀ fo wùn lav, e bóo fəə e ndzə. Mo kí dzəə̀n ji wù wíy kèʼ a dzə̀ fo vèsən, bo ké wìr ve á tenen kinyo kfə́ kí wíy a dzə e le?

¹⁸ Kí wíy a dzə mo vé‑eè saŋen jii: «A wír ve á yúnin Nyùyi wíy bòy ji cóʼ, bo ké wìr ve á méŋ wun, yii a dzə̀ vinyo ve bi ví, kí wíy a dzə e le?»

¹⁹ Kí nén a dzə jii, a Nyùy yiì ji vèn wáa yen ŋgeʼ, vèn kù a yiì a dzə̀ vinyo ve ru ví, a way vinyo vén vidzə̀m a dzə̀ e wun woo Nyùy kiwo. Bòm wun ven, a bó yòʼ dzə̀ wù shwìv ven gheéy.