1 Pita 3 - ŊWÀʼ NYÙY

Mo wír Nyùyi wáa dzə aáwuné nsaàlav

^1-2 Kímóʼ kí nen kfə̀n a dzə sa jii, ven vee vikǐy vilum, vèn wáa yu a dzə̀ fo alúm véné. Vèn lóo yiì bèy, a lum wùmòʼ woo wír dzə̀, a bó wù yòʼ tíy e kinyò ke Nyùy, wù lóo yen mo vèn yú alúm vén, leey a dzə̀ fo věn nsaàlav, ghanmóʼ, é wù binkir, e wày shilív e Nyùy wùn, a bó á yoʼ sùúy suuyín.

³ Lá vèn yòʼ a way vifií ji vèn wáa bòŋkìr a dzə̀ fó wùn, a rəsí, a ba vitú, a wayrí vifá, a màʼ ndzə̀y, a kuvtí.

⁴ Viŋgòn vén ví kú a dìn a dzə̀ fo věn meliv. A dzə̀ jii, vèn kú a ker a liì wo juŋ, a dzə ji nyaáŋ. Á viŋgòn ve Nyùy yii yén ji viŋgòn feyì, a bó yòʼ dzə̀ ví kòsìn.

⁵ Dzə̀ kfə́ə viŋgòn ve vikìy vee fó ŋgùʼ ve vé‑eè tiir vifií vév a dzə̀ e Nyùy wùné‑eè yii. Á kù‑uù dzə́, yú a dzə̀ fo alúm véví,

⁶ moo Sara wo wù‑uù yú fo Abraham, yoŋrì ji taà lav, taà lav. A vèn lò, a yiì réŋréŋ moo Sara, a yu alúm vén, e làa yòʼ a waŋ vinyo vév waŋén, a wovrí ji vèn fan áwune fánen, bo vèn sì lèn ji wón wun woo Sara.

⁷ Ven vee alúm vikìy, vèn kú a yiì sa bèy. Vèn lóo dzə vèn à vikìy véné, vèn kù a yen ji áwune dzə̀ wír, a bó á yòʼ kér kitar moo ven vee vilum, a geʼ sho, a ghvəm sa áwune, a kiíy jii, Nyùy bùʼ vèn áwune wír adzə̀m ji á wáa ker a dzəʼə̀m yee là may. Vèn lóo yiì bèy, bo vèn ràn ne, é Nyùy wáa yu bunrì yén.

Wír Nyùyi ku biìmé ŋgeʼ bìʼ liì wo juŋ

⁸ M nen màysì, a tir wir dzə̀m lèn jii, vèn wáa yòy a kiyoy kén kimòʼón, é wìr wáa sham fə́r və, a way e shiliv. Vèn wáa ker shilív she juŋ shi, é wìr wáa lì kitú kfə́ shishàr.

⁹ Wìr fə́m yii kinyo ke bi kí e wìr, lá ŋgaàŋ yòʼ siìr kinyo kee shooy. Wìr kuu wír, lá ŋgaàŋ yòʼ siìr. Kinyo ke dzə̀ vèn wàa yiì ki dzə̀ jii, wìr kuu wír, wù kù a lon cáʼ ji Nyùy shám ŋgaàŋ. Vèn wáa kuumé ji Nyùy‑iì lì ven ji və́ vee wír bèy, ji wun fiʼ shàm ven.

¹⁰ A dzə̀ mo vé‑eè saŋen é Ŋwàʼ Nyùy jii: «Wìr wo wù taʼ ji wun wáa dzə e dzə̀ʼə̀m, a yu vijuŋ, ŋgaàŋ kim kiliímé kfə́ fó vinyò ve bi ví, e bèr kimboʼtì.

¹¹ Wù maʼti vinyo ve bi ví, a yiì a dzə̀ ve ru ví, a jùm a dzə̀ dzəʼə̀m yee nyaáŋ, e meé e ghan se wù wíy koóy.

¹² Bìʼ fo Nyùy yii yén wír ve á yii vinyo ve ru ví, yuúri bunrì yév, kor sí fo wír ve á yii vinyo ve bi ví.»

¹³ A vèn lò, a yiì a dzə̀ vinyo ve juŋ vi bey, bo dzə̀ kfə̀n yiì la ven e kinyo ki?

¹⁴ Aá fə̀m lò, a nyàvrì e vèn ji bìʼ fo vèn yii vinyo ve juŋ vi, vèn kù a sheʼrí sheʼrín. Lá vèn yòʼ a fàn wír vee shooy, a leéy kinyo ke á yii e vèn, é melív men mè wáa yàʼ.

¹⁵ Vèn ku tìír melív men a dzə̀ e Kristu wùn moo Taàtá won, a yuurí a dzə̀ fó fo. Vèn kú a yiì bèy, a dzə kibáʼtín ghán sidzə̀m. Wìr dzə́r kinyo ke kí yiìn, bo vèn wáa lì vinyo vén vidzə̀m ji weè, a leéy a dzə̀ fó mbìy, vèn naàrì shó kijuŋ.

¹⁶ Lóo naàrì, vèn wàa naàrì ji weè e shilív she juŋ shi. Kinyo ke vèn yii kidzə̀m ki kú a dzə ke shilív shén shí bínsi, wíri lóo toy vinyo ve kisaŋ vi e věn bàm ji bìʼ fo vèn dzəə̀n wír Kristu, lóo yen, a vèn kù din a dzə̀ liì wo juŋ, aá wáa woomé.

¹⁷ Vèn wáa kiíy jii, a Nyùy biìmé ji vèn wáa yen ŋgeʼ, bìʼ fo vèn yii a dzə̀ vinyo ve juŋ vi, bo kee shooy ki bòŋ feyì, e shaà fo wìr wáa yen ŋgeʼ, a dzə̀ bìʼ fo wù jayin kinyo.

¹⁸ Kù dzə̀ mo Kristu‑uù yenen ŋgeʼ bèy, e kpù fo wírí vinyò ve bi ví vidzə̀m kàŋ mòʼón. Wun woo là jay, wù kpú fo vé jayi, e màn ajay vee shooy adzə̀m ji wun fíʼ siìr vèsən fo Nyùy. Vé‑eè yùyrí wún və́, a wù kér wún a dzə̀ woó nsay. Wù fəə́ fó kpu, a ker a dzə̀ wo wú‑uù loòn fo Nyùy.

¹⁹ A dzə̀ woo shooy wo wù‑uù səyin shó aàŋkfəə́ wòŋ, a fìʼtì kinyo ke Nyùy e viyoy ve vé‑eè fìnèn fó e sháŋ ví.

²⁰ A viyoy vìn vi dzə̀ vé wìr ve vé‑eè tenen fó yu kinyo ke Nyùy e Noa ghan. A Nyùy‑iì lo bònén, a yuurí ji á biner melív mev, é bo Noa wìy màysì kikóŋ, e bàʼrì. Wíri nèn wìy nə̀ə́ e kikoŋ fèy waamé cáʼcáʼ, ndzə́ví wáa beʼ, áwune bòy.

²¹ Kinyo kee shooy ki wáa dzə kisəəm ké ndzəv ye á wáy wír sho lèn, wù ràn fo wun vinyò ve bi ví. A bó á yòʼ wáy bèy ji á su a dzə̀ lóm fo ŋgaàŋ wùn. Dzə̀ kisəəm ke kí din ji ŋgaàŋ lón fo Nyùy a ji wù ku sù shilív sə́, é shí rán. A wù bòy fo wùn ajay a dzə̀ bìʼ Jesus Kristu wo wù‑uù fəən fó kpu,

²² e kòʼ é yuv, fo wù dzə́ lèn e Nyùy koy yìyí, sáʼ nshèelav se Nyùy wùn à vitú vév ví, à vifá ve ví kér vitaáví é yuv ví vidzə̀m.