1 Pita 2 - ŊWÀʼ NYÙY

Wír Nyùyi dzə̀ lav ye Kiyoy ke Nyùy ki dzə́ sho

¹ Kí nén a dzə jii, mo Nyùy foon ne ven dzəʼə̀m ye fíy rə̀ne, vèn ku nèn màʼtì melív me bi mè. Lá wìr yòʼ dzə́ə a boʼtí sa kimboʼtì. Lá wù yòʼ a suŋnín lám e baà. Lá vèn yòʼ a dìy kifá ke wìr. Lá vèn yòʼ a suʼ kinsuʼ.

² Vèn kú a ker shií a dzə̀ fó kinyò ke Nyùy mo wan wo bór yii kér fo vin. Nyùy lóo nyoór ven shó, é vèn wáa kuy e wùn kinyò, e wìy gheén fó wìy nəə́ e wùn dzə̀ʼə̀m yee là may.

³ Á kifá ke vèn wáa dìy, bìʼ fo vèn yutin ne mo Tàr wòsən Jesus koŋ ven.

⁴ Vèn wáa koʼtí rì a dzə̀ e wùn ghaŋ. Fó wun dzəʼə̀m yee là may rə̀n. A dzə̀ wun tíy ye vé‑eè yoŋ e Ŋwàʼ Nyùy ji Nyùy‑iì tày ji yee jeéy, é bo wíri siíy, e lèéy ntéŋ.

⁵ Vèn wiy ri fo Nyùy, é wù li sá ven ji tíy, e bòm lav rə ye Kiyoy kfə́ kí wáa dzə sho, é vèn wáa dzə atàá cù wun woo Nyùy, a yu a dzə̀ fo Jesus Kristu, a lìm fo Nyùy shilív shidzə̀m, é wáa dzə cu ye wù koŋ ji dzə̀ wír vəə́ wàa cù wun sho.

⁶ Vé‑eè lo sàŋ é Ŋwàʼ Nyùy jii: «Vèn yú, m neèr tíy é *Sion ji yí tóm kór lav ye m bóm fo. Shòʼ mo, a yí bòŋ fo mò féyì. Wìr wo wù wáy shilív é wùn wó yòʼ wíy jaáy.»

⁷ Ké ven vee wír ve á wayin shilív e Jesus Kristu wùn kí nén a dzə jii, wù bòŋ rú á fo vèn féyì. Yii bèy, ké wìr ve á méŋ wun méŋén kí wáa dzə mo vé‑eè saŋen é kirə̀ʼ kímóʼ kí jii: «Tíy ye vé kimbome leeyin ntéŋé sì yíwun ye yí loòn ne, e tòm kór lav.»

⁸ Kí kfə́n a dzə mo vé‑eè saŋen sá jii: «Tíy rəne wíy a yiì, é wíri wáa bàyrìn sho. Kilán, a wíri wíy a gbùkìr sho.» Á ku nèn a bàyrìn sho bèy, a dzə̀ bìʼ fo á tenen fó yu jí Nyùy, réŋréŋ mo Nyùy‑iì sìysìn ji kí wíy koóy áwune.

⁹ Yii bèy, fo kén kí, vèn dzə̀ kén rám, a shòʼ Nyùy ven. A vèn dzə̀ atàá cù, lim a dzə̀ fo wun woo Fon. Wù‑uù nàŋsín ven ji kitúm kee jeéy kí, vèn wáa dzə və́ vee wír ji vèn wáa fìʼtì vijuŋ ve vinyò ve wù rə́si yii e vèn, ven ve wù‑uù fəərin fó ndzə vitsə̀ʼ, e wày e wùn mvə̀m ran ye ghaʼáné.

¹⁰ Vèn‑eè dzə̀ fó mbìy, a bó vèn yòʼ dzə̀ wír Nyùy. Á bèy, vèn sì wír və́ lèn. Nyùy yòʼ‑oò ló a sham ven fó mbìy, a wù shàm ne lèn.

Mo dzə̀ wír Nyùyi wàa ghan wùn à wír vee víyi

¹¹ Ŋkàr sem, vèn wáa kuumé ji vèn dzə̀ viŋgwìy, a vèn bee beèn é ndzə fèn. M nén a lon jii, lá vèn yòʼ a yu fo věn mensə me mè tíy a dzə̀ é vinyò veé ndzə fèn, funèn melív men me vèn tiirin e Nyùy wùn.

¹² Vèn lóo dzə vèn à wír ve bó á yòʼ kiìn Nyùyi, vèn kù a dìn a dzə̀ liì wo juŋ. Aá fə̀m lór ven, aá kú a yen a dzə̀ vinyo vén ve ru ví, wíy lóo dzə e kishiíy ke Nyùy taʼ, e sham áwune, wù jaŋè, aá nèn màʼtì liì wov wo bi və̀y, e bìnkìr, a ghvəm a dzə̀ wun.

¹³ Mo vèn siìn wír Taàtá wòsən Jesus Kristu, vèn wáa yu wír ve á kér sáʼ adzə̀m. Kìn dzə̀ fon wo kuʼùn wo wù tíy vitú,

¹⁴ kìn visher və́ ve wù lèmèn ji á wáa saʼ woŋ, a màʼ ŋgeʼ e vé jayi, a sheʼrí wír ve á yii réŋ.

¹⁵ Á mo Nyùy koŋ ji vèn wáa yiì a dzə̀ vinyo ve ru ví, e fíʼ a sətí shúu wìr ve á méŋ kinyo ke ru kí, jiŋ jìŋèn, lo, á wàa lor ven.

¹⁶ Vèn wáa dzə, a yiì vinyo vén moo wír ve Nyùy tinen ne fo lòn, á bóy. Yii bèy, lá vèn yòʼ a kwàʼtì jii, mo vèn bòyìn ne, a dzə̀ vèn wàa yiì a vinyo ve bi ví lèn, là kinyo. Vèn kú a lì vitú vén ji akwǎn Nyùy, aá sí yú a dzə̀ á fo fo.

¹⁷ Vèn wáa ghvəm wir dzə̀m, a kòŋ afə́r vén ve vèn áwune tatin e Kristu kinyò, a neŋ e Nyùy sar, e kfə̀n a yu sáʼ fòn wo kuʼùn.

Wír Nyùyi li mfìʼ fo Kristu

¹⁸ Ven ve vèn lim ji akwǎn wírií kú a yu atàr vén, a neŋ a dzə̀ aáwuné sar. Lá wìr yòʼ a yu a dzə̀ wír wo wù géʼ e wun cáʼcáʼ. Wù wáa yu sa wír wo wù nyavrì e wun.

¹⁹ Vèn wáa kiíy jii, aá lò, a nyàvrì e wìr, a bó ŋgaàŋ yoʼ fə̀m jày kinyo, wù ku yòʼ biìmé biimén ji bìʼ fo wun yú kfə́ a dzə̀ fo Nyùy, Nyùy wàa sheʼrí a ŋgaàŋ.

²⁰ A bó yòʼ dzə̀ wù wàa sheʼrí wír wo á ndzə́n, a wù dzə́ ji nyaáŋ, aá ndzə́n a dzə̀ fo wùn jay. Wù kù yii shéʼri a dzə̀ wír wo wù yii kfə́ a dzə̀ vinyo ve ru ví, aá nyavrì sho kisáŋ, a wù kù dzə́ ji nyaáŋ, yú a dzə̀ fo Nyùy.

²¹ A dzə̀ mo Nyùy‑iì liìn ven ji kí wáa koóy ven réŋréŋ mo kí‑iì kooy Kristu. Wù‑uù yén ŋgeʼ a dzə̀ bìʼ ven ji vèn li mfìʼ fo fo, a yiì a mo wù‑uù yii.

²² Wù yòʼ‑oò lo yiì yiì kinyo ke bi kímóʼ kí gheéy, a bó wù yòʼ‑oò lo yiì sùúy kinyo ke kisaŋ ki fo wùn shuù.

²³ Wíri‑iì kuurì wun, a bó wù yòʼ‑oò lo yiì bìnèr. Vé‑eè nyavrì sho, la wù yòʼ a taamé wír gheéy. Wù kù‑uù wày vinyo vidzə̀m a dzə̀ e Nyùy kiwo, Nyùy wo wù kù yii bin nsaʼ wìr dzə̀m mo yì dzəə̀n.

²⁴ Wúnwun woo Jesus‑eè lo siìr vinyo vesən ve bi ví a dzə̀ e wùn kitu, e kpù shó e kintam. A wù‑uù kpú bèy, ji vèsən fiʼ kpù sá fo mbìv vinyò ve bi ví, e nèn a dzə, a yiì a dzə̀ vinyo ve ru ví. A dzə̀ vileémé və́ vin ve ví yiìn ne, vèsən bónén fo vèsə́n yàsí.

²⁵ Vèn‑eè dzə́ fo mbìy, ján janén moo njiì wo wù jayin dzə́ə, a vèn kfə̀n ne lèn fo Nshìy won wo wù danèr ven, shiy melív men.