1 Korin 9 - ŊWÀʼ NYÙY

Kilíŋ ke wìr woo ŋgaà ntum Jesus Kristu

¹ Mómò, m dzə́ bèn, a dzə̀ m wàa yiì kinyo ke kiìn mo. Bó m yòʼ dzə̀ ŋgaà ntum Jesus Kristu à? M yòʼ‑oò lo yèn wun woo Tàr wòsən e sí yémé a? Bó ven vin yòʼ dzə̀ séʼ wo wù fəən fó lìm ye m lim fo wun rə̀n à?

² A wír ámóʼó fə̀m lò, a kìnèn ji bó m yòʼ dzə̀ rú ŋgaà ntum Jesus Kristu, bo bó yòʼ dzə̀ vèn kìnèn. Mo yiìn mo, bo vèn tátí vèn à Tàr wòsən Jesus, bo vèn dzə̀ kisəəm ke kí din ji m dzə̀ rú á ŋgaà ntum Jesus Kristu.

³ M nén a suúy e wír ve á rə́si túŋ wuú yém víne jii,

⁴ yòʼ dzə̀ á ji m bùŋ a dzə̀ kilíŋ. A m kòŋ, m wàa yikír, a nonín sa fo lìm fèn.

⁵ Bó yòʼ dzə̀ sá m wàa ker kilíŋ ke dzə̀ m wàa yiì mo Pita wùn aàŋgàa ntum Jesus Kristu ámóʼó, aàfə́r wun woo Tàr wòsən Jesuse yii à? A m kòŋ, la m yòʼ a ker sa wóom woo wiíy, a lì, é vèr wun wáa ghan à?

⁶ Bó dzə̀ ji kù mày vèr Banabar ve á kér fó a lìm lim e wó yérí, e bó a koóy kifá ke yi a?

⁷ Dzə̀ ji wìr lóo tiy e shùu rər, kfə̀n a tàʼ wun vifá və́ vé yi à? A wìr lim súm, la wù yòʼ a yi vifá veé sum fóo fèy à? A wìr shiy nyám, la wù yòʼ a kam sa vín, a no à?

⁸ M suuy vinyo vìn bèn, a m yú a dzə̀ fo wìr à? Kù dzə̀ kíwun ke Ŋwàʼ Nyùyi suuy sa.

⁹ Mooser‑iì sàŋ é Ŋwàʼ Nsər jii, «Wìr li nyám ji yì wáa nyèŋ sáŋ, aá wáa fetí, la wù yòʼ sùm shuu ji fo yì bóŋ sí.» Mo wù‑uù saŋen bey, bo Nyùy suuy kinyo kee shooy a dzə̀ e nyám sí kitu à?

¹⁰ Bó wù yòʼ suuy a dzə̀ e vèsən a? Vé‑eè sàŋ a dzə̀ fo vèsən, bìʼ fo wìr yii lóo lìm súm wìr, wù kù a kiíy ji wun wíy a ker a kifá fo fo, kìn dzə̀ ŋgaà lìm, kìn dzə̀ ŋgaà kav.

¹¹ A vèr lìm ne e věn mvəm réŋréŋ sá moo ŋgaà lìm wo wù wáy vifá e sum. Mo yéer yee ŋgoòy ye vèr wayin dzəə̀n kinyo ke kí fó ven dzəʼə̀m ye yí lo fo Nyùy, bó kí yoʼ ghèén ji vèn fó sá ver vifá ve ví kér dzəʼə̀m a dzə̀ yeé nsay fèn à?

¹² Mo wír ámóʼó kér kilíŋ, kooy vifá fo vèn, bó yòʼ dzə̀ vèr wàa ker kilíŋ ke kí shaa ké vee shooy vee wír à? Yii bèy, a bó vèr yòʼ‑oò lo lì kér kee kilíŋ gheéy. Vèr‑iì yèn ji kí bòŋ a ji vèr biímé ŋgeʼ sidzə̀m fó jivír fo sáʼka wo juŋ woo kùm Jesus Kristu wáa sàmèr cércér.

¹³ Vèn kì sá ji wír ve á lim e lav cù yeé Jerusalem adzə̀me kù yii yíkir a dzə̀ á fo fo. A wìr wo wíri wiy, cu Nyùy e kiwo wo kér sa ŋkoy fo vifa ve cù foo fèy.

¹⁴ Kù dzə̀ réŋréŋ sá mo Tàr wòsən Jesus‑eè suuyin ji wìr wo wù fiʼtì sáʼka Nyùy wo juŋ wáa yikír a dzə̀ á fo fo.

Por máʼtí kilíŋ ke ŋgaà ntum, a fìʼtì kinyo ke Kristu kisáŋ

¹⁵ Mo m fə̀m kér kilíŋ fo vinyò fèn vidzə̀m, bó m yòʼ‑oò yiì ne, a tàʼ kímóʼ kí gheéy. A bó m yòʼ sáŋ bèn ji á wáa yiì a vinyo vee shooy e mò. A dzə̀ ji m kfən lò, a tàʼ kee shooy, é kinyo ke m sévti fo mǒ shuù kìn ki lay kisáŋ, kù bòŋ ji m kpú á kpuún.

¹⁶ A bó yòʼ dzə̀ m wàa suúy kinyo, a sùmrì wún ji bìʼ fo m fiʼtì kinyo ke Jesus Kristu. Dzə̀ kinyo ke dzə̀ m kù a yiì. A m lò, a ten fó a fìʼtì sáʼka Nyùy wo juŋ, bo m li a dzə̀ lòn.

¹⁷ A dzə̀ ji kwàʼtì mo, e bó a yiì lim rə̀n, bo m kì taʼ vilaámé. Yii bèy, a bó yòʼ‑oò sìysì mo, kù‑uù wày Nyùy wáyín e mǒ kiwo.

¹⁸ Mo kí dzəə̀n ben, bo wóom woo séʼ dzə̀ ka lèn? Kù dzə̀ shéʼrí ye m shéʼri mo m fiʼtì sáʼka Nyùy wo juŋ fíʼtin kisáŋ, e làa yòʼ a dzər kifá ke kì dzə̀ á fò e mò woo ŋgaà fìʼtì.

¹⁹ Vèn kì sá ji m dzə̀ á fo mǒ kitu, a bó wìr wùmòʼ yòʼ kér mo gheéy. Yii bèy, m nen lì kitú kém ji kwǎn wìr dzə̀m ji m fiʼ kòóy wír Kristu anín.

²⁰ M lóo dzə vèr à wír vér veé Judàa, m nèn a yiì a dzə̀ liì wov ji m fiʼ kòóy a wír fo áwuné mvəm. M lo, m wàa tiír sa kiwuú moo áwune ve á dzə́ kév ji á wáa yu a dzə̀ fó nsər se Nyùy‑iì foon e Mooser, a bó nsər see shooy si yòʼ fə̀m dzəə́ kér kinyo fo mò. A m yii bèy cáʼ ji m fiʼ kòóy áwune sá ji wír Kristu.

²¹ M lóo dzə vèr à wír ve bó á yòʼ kiìn nsər see shooyi, m nèn kù a dzə sa moo áwune, e fíʼ koóy sa áwune ji wír Kristu. A bó yòʼ dzə̀ ji m dzə̀ e Nyùy mvəm lèn là nsər. Nsər ye yì kér mo lèn dzə̀ ye Kristu.

²² M kfə́n lóo dzə vèr à wír ve bó á yóʼ ne kìíy vinyo, aá nyaʼ vifá vímóʼ ví, m nèn kfə̀n sá moo áwune ji m fíʼ koóy sa áwune. A wìr fə̀m dzə̀ é le, a wù dzə̀ é le, bo m kù kfə́n moo ŋgaàŋ ji m fíʼ mùm kinyo ke dzə̀ m yiì, aáwune wìy lùŋ.

²³ A m yii vinyo vìn vidzə̀m cáʼ ji sáʼka Nyùy wo juŋ wáa dù a fo mbìy, wíri lóo yu, lóo sheʼrí, é m wáa sheʼrí sa.

²⁴ A dzə̀ vèn fìʼsìn vinyo vìn moo kileʼ ke wíri yii sénin anín, kù sò wír e mòʼón, e kòóy kifá. Vèn ku nèn a leʼ rì sa kén kee kileʼ moo wír wo wù léʼ ji wun ku sò kifá,

²⁵ a kuumé jii, wìr yii lóo dzə ji wun wíy nəə́ e ghay kinsènín, wù bàʼtí wún və́, e mèrìr a kijuŋ. Wù yii bèy, a vinə́ŋsí ve wù túyti sí sho vìn vi dzə̀, a bó yòʼ dzə̀ ví wìy shaàrì. Yii bèy, a vesən vee vinə́ŋsí ví wíy shaàrì.

²⁶ M nén a leʼ kém kee kileʼ tìítiy, a dù a dzə̀ é shùu so. A bó m yòʼ fun yéem yee mfùn moo wír wo wù fun a dzə̀ shwér.

²⁷ M nyavrì e wún wómé, merìr, é wú fiʼ biìmé ŋgeʼ sidzə̀m, fo Nyùy wìy yèn ji bó m yoʼ ghèén, e tsə̀ʼ mo fo aŋgaà və́ lìmé ŋgoo. A kfə̀n dzə̀ mo wo mò‑oò yéʼey aŋgaà və́ lìm vee shooy.