1 Korin 7 - ŊWÀʼ NYÙY

Kinyo kee kùm wiíy wùn lum

¹ M nén a tàʼ, e bìnèr lèn a dzə̀ fó kinyò ke vèn‑eè saŋen, e dzə̀r e mò. Dzə̀ rú, kí dzə̀ kijuŋ, a wìr fen yèn ji bó yòʼ dzə̀ wun kùm wiíy.

² Yii bèy, mo kí fə̀m dzəə̀n ben, a kinjàŋ ki kù gháʼ ghaʼán, kí nén a bòŋ jii, wìr wáa ker və́ə woo wiíy, é wiíy wáa ker a və́ə woo lúm.

³ Lùmèn kú a yiì e wiiy və mo dzə̀ wiíy wàa kòŋ, é wiíy wáa yiì sa e lum və mo dzə̀ wù wàa kòŋ,

⁴ a kiíy ji bó wiíy yòʼ dzəə́ kér a vitaáví fo və́ woo wúné, sí kér a lúm və. A bó lùmèn yòʼ dzəə́ kér saa vitaáví fo və́ woo wúné, sí kér a wiíy və.

⁵ Kí nén a dzə jii, wìr wáa yen fó ten wùmòʼ, a bó dzə̀ á ji sìysì wùn wun abaà ji á ku shìíy jeéy jeéy é bǎm vishiíy vímóʼ ví ji á fíʼ a bùnrì Nyùy. Ghán see shooy si shaa, wùn wun kù nèn kfə̀n, a shiíy, fó fo kilíŋ, é Satan báyír wùmòʼ, é wù tó é kinyò, bìʼ fo wù mùmèn ntéŋ fó kuʼtí wún və́.

⁶ M suuy vinyo vìn bèn, a bó m yòʼ fó a dzə̀ nsər ji wìr kú a ker a wiíy. Ke m suuy ki dzə̀ jii, a dzə̀ wír, wù wàa ker a wiíy və.

⁷ A mày fo mò, bo m koŋ ji wìr dzə̀m wáa dzə a moo mo, là wiíy. Yii bèy, ké wìr ki kù dzə̀ ke Nyùy foon e ŋgaàŋ, wír e kin ki, wír e kin ki.

⁸ Fo wír ve á dzə̀ə́ kisáŋe, m nén a suúy jii, kí bòŋ a ji áwune goʼ bey, a dzə sa mo m dzə́. A dzə̀ kíwun ke m suuy sa e wìr wo lum və, kìn wiiy və kpuun ne.

⁹ Yii bèy, a dzə̀ a bó yòʼ dzə̀ áwune kùʼtí wún wóv, bo kí bòŋ ji wìr wáa tàʼ wiíy və, é wiíy wáa tàʼ lúm və. Bòŋ kee shooy, e shaà fo shilív shé wìr shi wáa baarí ji bo wun kì kér wiíy kìn lúm.

¹⁰ M nén a suúy fo wír ve á sí dzə́ e melavi jii, wiíy wáa yen a fó fəə fo lum və. A bó m yòʼ suuy bèn ji suuy a mo, dzə̀ nsər ye foon Tàr wòsən Jesus Kristu.

¹¹ Yii bèy, a wù fəə̀, bo wù kér fó gòʼ bèy, e làa yòʼ dù, e yen wùmòʼ woo lúm. A dzə̀ wù kù kfə̀n a dzə̀ fo lum və, aá mán vinyo. A kù dzə̀ kíwun ke m suuy sa e vilum jii, lá wìr yòʼ fə̀ə́r a wiíy və.

¹² Fo kibér ke wìr ve lum kìn wiiy və yòʼ dzəə̀n ŋgaà biìmé, m nén a tàʼ, e suúy kinyo ke kwaʼtì mo, a bó yòʼ dzə̀ nsər ye foon Tàr wòsən Jesus. A wìr Kristu kér wiíy, a bó yòʼ dzə̀ ŋgaà biìmé, wù wáa kòŋ ji bo wùn lum kù kì dzə́, lá wù yòʼ fə̀ə́r.

¹³ A wiíy lò, a ker lúm wo bó yòʼ dzəə̀n ŋgaà biìmé, a wù koŋ ji wùn wun kú a dzə, lá wiíy yòʼ fəə̀ sá.

¹⁴ M suuy bèn, bìʼ fo wiíy wùn lum lóo dzə bèy, a biímé ne Nyùy woo shooy woo wír wo bó yòʼ dzəə̀n ŋgaà biìmé bìʼ wír wo wùn wun dzə́ e lav a dzə̀ ŋgaà biìmé. Kí búŋ fó bèy, la wón wìr vee shooyi yòʼ dzəə nə̀ə́ e wír Nyùyí mvəm mo vèsən kiìn ji á yii nəə.

¹⁵ Yii bèy, a wìr wo bó yòʼ dzəə̀n ŋgaà biìmé və̀y fen yèn ji wun‑éè javsin, á màʼtì, é la woo shooy wo dzəə̀n ŋgaà biìmé yòʼ a kwàʼtì ji dzə̀ wun kù a dzə wùn wìr woo shooy. Nyùy‑iì shòʼ vèsən ji vèsən wáa ker a dzə̀ á dzəʼə̀m yee nyaáŋ.

¹⁶ A wìr lò, a ci ciín, wò woo wiíy, à kìíy fó feé ji dzə̀ à yiì, Nyùy lùŋèr lúm wò? Wò woo lumèn, à kìíy fó feé ji dzə̀ à yiì, Nyùy lùŋèr wiíy wò?

Wír Nyùyi kú a gòʼ e dzə̀ʼə̀m ye Nyùy‑iì liìn áwune, aá kérí

¹⁷ Fo vinyò vìn vidzə̀m, ke kí dzəə̀n é shií kí dzə̀ jii, wìr kú a jùmrì dzəʼə̀m rə́ a dzə̀ á ye foon Nyùy e wun, a dzə̀ yíwun ye wù‑uù sí kér e ghan se Nyùy‑iì li wun ji və́ə woo wír. Á yéem yee nsər ye m fó e vintatì ve wìr Nyùy vi virə́ʼ vidzə̀m.

¹⁸ Kí nén a dzə jii, a Nyùy‑iì li wír, a vé‑eè sàŋ ne *mbèʼ sə́ mo liì woó Juda dzəə̀n, la ŋgaàŋ yòʼ dzə́ə a tàʼ lèn ji wun búŋ fó wìr woó Juda. A wìr‑iì dzə̀ là náŋsín, la wù yòʼ dzə́ə a tàʼ lèn ji á náŋsín wun.

¹⁹ Kìn wìr dzə̀ wo naŋsín, kìn dzə̀ woo là náŋsín, kee shooy ki yòʼ kér kinyo kímóʼ kí fo Nyùy. Ke kí dzəə̀n é shií kí dzə̀ ji wìr wáa yu a kinyo ke Nyùy suuyì.

²⁰ Wìr dzə̀m ku gòʼ, a dzə mo Nyùy‑iì li wun, a wù dzə̀.

²¹ A wìr‑iì dzə̀ kwǎn wìr e ghan fóo fèy, la ŋgaàŋ yòʼ a ci kee shooy. Yii bèy, a wù ben yèn kintóʼ ke dzə̀ wù fəə̀ fó vikwàn, wù kù yòʼ fəə̀.

²² Vèn wáa kiíy ji wìr wo Nyùy‑iì liìn, a dzə̀ kwǎn wìr sì á wan wòŋ lèn e mvə̀m kinyò ke Tàr wòsən Jesus Kristu. A wo Nyùy‑iì liìn a dzə̀ wan wòŋ, kfə̀n ne lèn a ji kwǎn Kristu.

²³ Wù‑uù yùn ne ven, e tàŋ káv e gháʼán. Lá vèn yòʼ dzə́ə màʼtì wun, a rèŋ vikwàn fó vinyò ve bóm wíri.

²⁴ Afə̀r vem, kí nén a dzə jii, wìr ku gòʼ a dzə e wùn dzə̀ʼə̀m ye wù‑uù kér e ghan se Nyùy‑iì liìn wun ji və́ə woo wír, a yu lèn a dzə̀ fo wun woo Nyùy.

Por shu ji dzə̀ wír wù gòʼ ji koy, a lìm lim Nyùy

²⁵ Ké wír ve bó á yòʼ sí kér vikìy kìn alúm ki nén a dzə, a bó Tàr wòsən Jesus yoʼ fò mo kinyo ke dzə̀ m sùúy e vee shooyi. Yii bèy, m yíi suúy kém ke m kwàʼtìn. A dzə̀ vèn wày shilív shó, bìʼ fo Tàr wòsən Jesus rə́si sə́ mo, a m jumrì a dzə̀ kinyo ke dzəə̀n ke ru kí.

²⁶ M nén a yen jii, vèsən vee wír Kristùu dzə̀ lèn bèn, aá yén ŋgeʼ sinín. Kí nen bòŋ e ghan sé ŋgeʼ fèn ji wír vee shooyi ku gòʼ, a dzə a mo á dzəə̀n.

²⁷ A wìr sí kér wiíy, la wù yòʼ dzə́ə a tàʼ ji wun maʼti, e fíʼ a dzə fo wùn kitu. A wìr dzə̀ə́ fo wùn kitu, la wù yòʼ kfə̀n a tàʼ ji wun ku kòóy a wiíy.

²⁸ Yii bèy, a wìr yèn ji wun‑éè taʼ wiíy, bo bó yòʼ dzə̀ jay. A wánlè wiíy kòóy lúm, bo bó yòʼ dzə̀ sá jay. Ke vèn wáa kuumé ki dzə̀ jii, a wìr lò, e kfə̀n a kèʼ kfəə́, bo wù dzə̀sì ne kibeʼèy. A m taʼ kém cáʼ ji m boyir á vee shooy vee wír fo kibèʼèy fen.

²⁹ Afə̀r vem, m suuy bèn, a kí dzə̀ jii, ghán se Nyùy‑iì foon e vèsən fen si kù bèr ne a shishàr. Kí nén a dzə jii, kèʼ fo lèn, wír ve á sí kér vikìyí wáa yiì a vinyo vév mo bó á yòʼ sí kérí.

³⁰ Wír ve á diy kpúu wáa yiì mo bó yòʼ koò kpú áwune, é wír ve á shéʼri kév sheʼríné wáa yiì a mo bó kinyo ki yòʼ boŋ áwune. Wír ve á kávnin wáyí wáa yiì mo bó á yòʼ kávnin wáy gheéy.

³¹ Wír ve á kér ntàʼtìn e ndzə fèn adzə̀me ku nèn a yiì vinyo vév moo wír ve bó á yòʼ wáy vifií é vinyò veé ndzə fèn. Vèn kú a yiì bèy, bìʼ fo ndzə rə̀n dzəə̀n lèn bèn, a yì sí dunìnè.

³² M suuy vinyo vìn bèn, bìʼ fo m koŋ ji vèn wáa dzə, é la vinyo vee kùm dzəʼə̀m rə̀n vi yòʼ a rəsí, a jivír ven. Wìr wo wù kòŋèn, a dzə là wiíy dzə̀ wo wù wáy vifií a dzə̀ e Tàr wòsən Jesus kinyò, yii kinyo cáʼ ji wáa bòŋ wún Tàr wòsən Jesus.

³³ Wìr wo wù kér wiíy kér fó kù a way vifií a dzə̀ é dzə̀ʼə̀m yeé nsay fèn, a yiì vinyo cáʼ ji wún wiiy vəə́ fíʼ a bòŋ.

³⁴ Wù nén a dzə bèy, a tùʼtìn e vinyò mbìv sibaà. A kù dzə̀ réŋréŋ sá mo kí kooy vikìy. Wiíy wo wù kòŋèn, a dzə kfə́ là lúm, dzə̀ sá wù wày vifií e Tàr wòsən Jesus kinyò, e nèn a kòŋ cáʼ ji wun tátí shilív sə́ wùn à kitú kfə́ kí, e fò a dzə̀ e Nyùy. Wiíy wo wù kér lúm kér fó kù a way vifií a dzə̀ é dzə̀ʼə̀m yeé nsay fèn, a yiì vinyo cáʼ ji wún lum vəə́ fíʼ a bòŋ.

³⁵ M suuy vinyo vìn vidzə̀m cáʼ bèn ji m fiʼ sə̀ á ven. A bó m yòʼ taʼ, e sətí dzə́ə fo wìr wùmòʼ gheéy. M suuy a dzə̀ ji wìr dzə̀m fíʼ kiíy a kinyo kee réŋ ke dzə̀ wù yiì, e bóo fíʼ tiír vifií a dzə̀ e Tàr wòsən Jesus wùn shilív shimòʼón.

³⁶ Kí nén a dzə jii, a wìr wùn wánlè wiíy‑iì sí koŋnìnè, wù yén ji a wun dzə̀ là fó lì, e way e lav, bo bó wun yoʼ yiì réŋ e wiíy, e kfə̀n yèn ji dzə̀ wun kù wáy é lav, bìʼ fo bó yòʼ dzə̀ wun kùʼtí wún, wù waà wày. Kee shooy ki yòʼ dzə̀ jay.

³⁷ Yii bèy, a wìr wày shilív ji dzə̀ wun kù a dzə wùn mòʼón, a wù fèn kì rú ji dzə̀ wun kùʼtí wún və́, a bó wìr yòʼ kan sa wun ji wù ku wày wiíy woo shooy e lav, wù kù màʼtì, é wùn ŋkar rə wáa dzə bèy. A wù yiì bèy, bo dzə̀ réŋ.

³⁸ Kidzə̀m ki nén a dzə jii, a wìr wày wánlè wiíy wo wùn wun koŋnìnè e lav, bo wù yiì a réŋ. Yii bèy, wìr wo wù kurin shilív ji wun kú a dzə dzəə́n bey, yiì kijuŋ feyì.

³⁹ Ké wiíy woo ŋgaà lum ki nén a dzə jii, wù kú a dzə a wùn lum və, e meé e ghan sé kpu. A kí kòóy ji lum və kpú, bo dzə̀ wù nə̀ə́ e lùmèn wo wù kòŋěn lav, a bèn dzə̀ wír wo wù tíy sa e Tàr wòsən Jesus kinyò.

⁴⁰ Yii bèy, mo m fə̀m suuy bèn, kém ke m yenen kí dzə̀ jii, a wù gòʼ bèy, wù wàa yu a vijuŋ, e shaà. A m suuy bèn, a m yén ji m yú a dzə̀ á fo Kiyoy ke Nyùy ki.