1 Korin 6 - ŊWÀʼ NYÙY

Wír veé Korine li vinyo veé kintatì, du, bí wír vee fó ndzə sho

¹ Mo vinyo vìn vi dzəə̀n ben, bó kí yoʼ ghèén ji wìr fo vèn lóo ker kinyo wùn fər və wùmòʼ, wù shaà fó neèr e wír Nyùyí si, e dù, e neèr a dzə̀ e wír ve bó á yòʼ kiìn Nyùyí si ji á sáʼ.

² Bó vèn yòʼ kì ji ghán sí wíy gheén, é wír ve dzəə̀n vé Nyùyi wáa tinén nsaʼ se wìr veé ndzə adzə̀m à? Mo wíy a tinén ven nsaʼ se wìr veé ndzə vìn adzə̀m, a dzə̀ vèn kfə̀n a mùm ntéŋ fó a tinén menyorìn me mè kooy e věn mvəm é le?

³ Bó vèn yòʼ kì ji vèsən wíy a tinén sa nsaʼ se nshèelav se Nyùy à? Mo kí dzəə̀n ben, a dzə̀ vèn kù kìíy sa mó a tinén vinyo ve ví kooy a dzə̀ é nsay fèn.

⁴ Kfə̀n yiì ka, bo vèn wáa lì, a dù, a neèr e wír ve bó á yòʼ kér kilíŋ e kintatì ke wír Nyùyí si?

⁵ Vèn wáa woomé fo věn vitu. Bó fèn dzə̀ ji wìr yòʼ dzə̀ e věn mvəm wo wù kér vifií ve dzə̀ wù wàa tàr vinyo ve ví kooy e ven vee afə́rí mvəm á?

⁶ Yiì ka, bo wìr fo vèn wáa lì fə́r və, a dù sho e làv nsaʼ, é wùn wun wáa tiy a dzə̀ e wír ve bó á yòʼ yú fo Nyùyí si.

⁷ A bó kí yoʼ fə̀m ghèén ji fə̀r wùn fə̀r wáa saʼ nsaʼ. Mo vèn yii bèy, vèn sí maʼ a dzə̀ kintatì. Kí bòŋ ji wìr jáy kinyo e wìr, wù màʼtì, e baàmè fo wùn wun wáa saʼ nsaʼ. Wìr lóo boʼ wír, ŋgaàŋ màʼtì, é wù bóʼ.

⁸ A bó vèn yòʼ yii kee shoon. Vèn jáy kén vinyo aàfə́r véné jáyín, kfə̀n bóʼ áwune.

⁹ Bó vèn yòʼ kì ji wír ve á yii liì wo bií yòʼ dzə̀ á wìy shòv sáʼ Nyùy e si à? Kìn dzə̀ ji ŋgaàŋ jaŋ kinjàŋ, kìn wù ghvə́m anyùy kisaŋe, kìn wù li wiiy wìr, kìn wiíy ghán viŋkar, kìn lumèn shaà wiíy, a lì lumèn,

¹⁰ kìn ŋgaàŋ dzə̀ shóŋ, kìn wù taʼ kifàʼ, kìn wù ghán, nó noón, kìn wù kuunìn kuùnìn, kìn wù faasì kimfaàsì. Vèn nèn a yen fo wìr wáa boʼtí kitú kfə́. Bó yòʼ dzə̀ kfə́ə wìr vee béne wìy nə̀ə́ e Nyùy mvə̀m saʼ gheéy.

¹¹ Yì‑iì dzə̀ fó mbìy, a ven ámóʼó yii vinyo vee shoon. Nyùy nèn wìy sù vinyo vee shoon fo věn wùn, e lì ven ji və́ vee wír. A wù lèéy ne ji vèn sì á wír vee là njò, bìʼ kinyo ke Tàr wòsən Jesus Kristu wùn Kiyoy ke wun woo Nyùy ki‑iì yiìn fo vèn.

Nyùy fó vifá vidzə̀m e wír vəə́, a bó yòʼ dzə̀ ji á wáa yiì liì kisaŋ sho

¹² A tàm wír wù nèn a bìʼ jii, «A dzə̀ lèn m wàa yiì vinyo vidzə̀m, a bó kímóʼ kí yòʼ dzəə́ kér nsər fo mò.» M nén a bìnèr kém jii, bó yòʼ dzə̀ vinyo vidzə̀m ve m yii vi wàa sə mo, a bó yòʼ dzə̀ sá m biìmé, e fò kitú kém e kímóʼ kí.

¹³ Yii bèy, a dzə̀ wùmòʼ kfə̀n a bìʼ sa jii, «Nyùy‑iì fèr vifá ve yi ji á wáa yi e bvə̀m, e fèr bvəm ji á yí vifá ve yi sho.» Yii bèy, vèn wáa kiíy ji Nyùy lèm ne a kishiíy ke wù wíy laàr vifá ve yi, é shúuyii may sá. A bó wúné yòʼ wíy mày bèy. Nyùy yòʼ‑oò lo bòm wún ji wìr li, a jàŋ a dzə̀ kinjàŋ sho. Wù‑uù bòm ji wìr wáa lìm sho a dzə̀ á fo Tàr wòsən Jesus Kristu, a dzə̀ wun woo Tàr wòsən wo wù kér wún wìr e dzə̀m.

¹⁴ Vèn ku nèn a kuumé jii, mo Nyùy‑iì yiìn, Tàr wòsən Jesus və̀n fəə́ fó kpu, wù kù wíy lì vitaáví və́ vee shooy, e fəə́r saa vèsən.

¹⁵ Bó vèn yòʼ kì ji vèn kér wún ben, a dzə̀ mbìv wùn Jesus Kristu yìmòʼ a? A dzə̀ wìr yèe, e bóo lì kifá ke dzəə̀n ké Jesus Kristu, e fo ji ké sàkì? Nyaa mò, bó yòʼ dzə̀ kí wàa dzə bèy.

¹⁶ Bó vèn yòʼ kì ji wìr lóo lì sàkì, bo wùn wun tàtí ne, a dzə wún e mòʼón à? A dzə̀ kinyo ke vé‑eè saŋen é Ŋwàʼ Nyùy jii, «Áwune vee wír abàá nén a dzə wún e mòʼón.»

¹⁷ Yii bèy, wìr wo wù tatin kfə́ a dzə̀ wùn Tàr wòsən Jesus sì wùn wun shilív shimòʼón.

¹⁸ Kí nén a dzə jii, vèn léʼ á liì woo kùm kinjàŋ və̀n e dzə̀m. Vinyo ve bi vímóʼ ví ve wìr yii vi dzə̀, a bó wù yòʼ yii a dzə̀ e wún vəə́. Wìr wo wù jaŋ kinjàŋ nén a yiì a dzə̀ vinyo ve bi ví e və́ woo wúné.

¹⁹ Bó vèn yòʼ kì ji wún wóné dzə̀ lav ye Kiyoy ke Ranén kí shiiy sho à? Fó Nyùy Kiyoy kfə́ kee shoon, a bó yòʼ kér ven vitú vén, kér wun woo Nyùy ven.

²⁰ Wù‑uù yùn ne ven, e tàŋ káv e gháʼán. Vèn ku nèn a lì wún wón, a yiì vinyo sho a dzə̀ ve á wáa burí Nyùy.