1 Korin 5 - ŊWÀʼ NYÙY

Wír veé Korine màʼtì ŋgaà joònè aáwuné mvəm

¹ M kér gháʼ feyì fó yu ji wìr wùmòʼ lò ne, e kèʼ joonè e věn mvəm, a bó yòʼ dzə̀ wo dzə̀ wìr wo bó wù yòʼ fə̀m kiìn Nyùy wàa mùm. M yú ji wìr wùmòʼ shìíy a e wiiy tàr wov.

² Vèn yén kfə́ə joònè vən, kfə̀n raʼsì wún ji ka? Bo vèn kì yíi a dìy dìyìn. Vèn kér fó fəə́r wír wo wù yiìn kfə́ə kinyò kee ben fəə́rín fo věn mvəm.

³ Mo bó m yòʼ fə̀m dzəə̀n vèsən fó si, m dzə̀ vèsən fó shiliv, a m kwàŋ ne kém

⁴ e Tàr wòsən Jesus yir mo dzə̀ á yiì e wìr wo wù yiìn kfə́ə joònè woo ben. Kí nén a dzə jii, vèn wíy lóo dzə̀ʼə̀m, vèn wàa kuumé ji m dzə̀ sáa e věn mvəm fó shiliv, é vèn nèn lì vitaáví ve Tàr wòsən Jesus foon e vèn,

⁵ e wày wír woo shooy a dzə̀ e Satan kiwo, é wù yú mo wù koó. Kí bòŋ ji wún ŋgaàŋe bír, é wù biner shilív sə́, é shí wìy lùŋ e ghan se Tàr wòsən Jesus wíy kfən.

⁶ Mo vèn yén kfə́ə kinyò kee ben, kfə̀n raʼsì wún, kí yoʼ bòŋ gheéy. Vèn wáa kiíy ji kinyo ke bi kí yii keʼ shishàr, kí nèn ghànén e wírí mvəm réŋréŋ moo shinyaà she á ŋèʼèn meŋkfəŋ kighín kifur, shí yií, meŋkfəŋ mè kóʼ medzə̀m.

⁷ Vèn fəə́r *nyaà wo dzəə̀n liì wo mvə və̀n fo věn mvəm, é vèn nèn kfə̀n ji wír ve fíyi, là shilóm, mo Nyùy‑iì liìn ven, vèn wáa dzə. Nyùy‑iì lo fò Kristu, wù táŋrí vèsən réŋréŋ moo wan njiì wo wír veé Israyi yii seé e *Ŋkǎʼ Yáʼayshaà, kuúme mo Nyùy‑iì tinen áwune fó kpu.

⁸ Vèsən ku nèn a dzə wír ve fíyi bey, e làa yòʼ dzə́ə a way kiwó e vinyò ve mvə ví, bìʼ fo dzəə̀n kinyo ke bi kí, kfə́n a dzə liì kisaŋ. Vèsən wáa dzə wír vee là shilóm, a yiì a dzə̀ vinyo ve ru ví, e nèn a dzə moo wír ve á yí Ŋkǎʼ Yáʼayshaà e dzəə yee réŋ, yí kibán a dzə̀ kee là nyaà.

⁹ Vèn kuúmé ŋwàʼ wúmóʼó wo mò‑oò saŋen fo vèn. Mò‑oò sùúy shó ji lá vèn yòʼ a ghanén a vèn à vé kinjàŋe.

¹⁰ Mò‑oò suuy bèy, a bó yòʼ dzə̀ ji vèn wáa nyeŋ a wír ve bó á yòʼ kiìn Nyùy, ve á yii kfə́ə vinyò vee bey, kìn ŋgaàŋ jaŋ kinjàŋ, kìn wù taʼ a dzə̀ kifàʼ, kìn wù shóŋ vishóŋ, kìn dzə̀ ji wù ghvə́m anyùy kisaŋe. A kí lò, a dzə bèy, vèn kù màʼtì ndzə rə̀n máʼtin.

¹¹ Mò‑oò yoŋ a dzə̀ ji vèn wáa nyeŋ a wír ve vèsən yoŋ ji afə́r bìʼ kinyo ke Jesus Kristu ve á yii kfə́ə vinyò vee ben. Kìn dzə̀ ji ŋgaàŋ jaŋ kinjàŋ, kìn wù taʼ a dzə̀ kifàʼ, kìn wù ghvə́m anyùy kisaŋe, kìn wù kuunìn kuùnìn, kìn wù ghán, nó a dzə̀ meluʼ, kìn dzə̀ shóŋ, lá vèn yòʼ fə̀m a yikír vèn à ŋgaàŋ.

^12-13 Ké wìr ve bó vèsən áwune yòʼ dzəə̀n kintatì ki nén a dzə, a bó yòʼ dzə̀ m wàa nəə́ e mvəm wó, kù wíy saʼ Nyùy áwune. Wír ve dzə̀ vèsən wàa nəə́ aáwuné mvə̀m kinyòo dzə̀ ve á dzəə̀n e vèsə́n ŋgoo. A dzə̀ kíwun ke vé‑eè saŋen é Ŋwàʼ Nyùy jii, «Vèn jum wír wo wù kér liì wo bi fo věn mvəm.»