1 Korin 4 - ŊWÀʼ NYÙY

Wír veé Korine wáa yu fo aŋgàa ntum Jesus Kristùu

¹ Vèn kú a yen ver ve á yéʼey ven ji aŋgàa lìm Jesus Kristu ve Nyùy wayin vinyo və́ ve ví‑iì dzəə̀n é kilìr e věr kiwo.

² Kinyo ke kí dzəə̀n é shií kí nén a dzə jii, wìr wo wù leey fo wìr kifa kú a yiì a dzə̀ á mo ŋgaà kifa suuyì.

³ Kém kí nén a dzə jii, a vèn fə̀m suuy ji ka kùm lim yém, bo bó m yòʼ yén a kee shooy gheéy. Kìn dzə̀ʼə̀m ala, a kàʼày kinyo kém, bo bó m yòʼ yéné. A bó yòʼ dzə̀ wàa sayrí mo kitú kém, mo m kiìn.

⁴ M dzə́ bèn, a bó shilív shém shí yòʼ sáʼ mo fó kinyò kímóʼ kí. Yii bèy, a bó yòʼ dzə̀ ji m bùŋ jay. A dzə̀ kù a sayrí Nyùy lim yém, a dìn fo jay dzəə̀n.

⁵ Mo kí dzəə̀n bey, bo kí yoʼ ghèén ji vèn wáa sayrí kinyo ke wìr, a tav, a toʼ mo vèn yén, a kí dzə̀. Wíy lóo dzə e ghan se Tàr wòsən Jesus Kristu wíy kfən, é bo din wun mo kí dzəə̀n. Wù wíy fəə́r vinyo ve ví dzəə̀n lèn e kilìr vidzə̀m fo meranén, e kfə̀n dìn vinyo ve wíri kwaʼtì aáwuné meliv. Wù yii bèy, é nèn a sheʼrí Nyùy wír réŋréŋ mo kinyo kfə́ kí dzəə̀n.

⁶ Afə̀r vem, m kì fiʼsìn vinyo vìn vidzə̀m e vèr Apolor wùn ji kí fíʼ dìn ven mo dzə̀ vèn wàa yiì sa. A m taʼ ji vèn wáa jùmrì a dzə̀ vinyo ve vé‑eè saŋen é Ŋwàʼ Nyùy, fo wìr wáa tiy e wìr wùmǒʼ mbìv, a ràʼsì wún, e nèn a leéy wùmòʼ woo wír ntéŋ.

⁷ A bó wò woo wír wo à tíy fo mbìy və̀n yòʼ fə̀m dzə̀ jeéy fo wùmòʼ. Vinyo ve à kiìn vidzə̀m vi yòʼ dzə̀ ve foon Nyùy e wò à? A dzə̀ à yèe, e bóo kfə̀n a ràʼsì wún shó, mo bó á yòʼ fò wò foón?

⁸ Ven ve vèn suuy ji vèn kùʼkìr ne, vèn ku yòʼ kùʼkìr rú á? Kí vèn sí kér vifá vén vidzə̀m, a vèn sì afon? Bó kù jòʼsì ver ve bó á yoʼ mèé e kifa a? M koŋ kém ji kí wáa dzə rú bey, é vèn wáa saʼ kijuŋ, é vèsən tátí, a saʼ sáʼ yee shooy adzə̀m.

⁹ Fo vèr vee aŋgàa ntum Jesus Kristu, m nén a yen ji Nyùy lèm ne ver fó tsəə́tsən, a vèr sì á moo wír ve á liìn, a dù sho ji á du, e yuyrí e wáynjáŋ, a sì kileèy ke wìr dzə̀m leey, à nshèelav se Nyùy si shó.

¹⁰ Vèr ku nèn a yu kér a dzə̀ fo Jesus Kristu, aá fə̀m yoŋ ver ji viyúŋ é le. Kù mày ven ve dzə̀ á wàa yen ji afií é vinyò ve Kristu. Vèr kù dzə̀ kér anjoó, kù mày ven ve dzəə̀n antav. A dzə̀ wíri wàa ghvəm ven, a bó á yòʼ leey ver, yéné.

¹¹ Kèʼ fo ghan, e meé lèn, vèr kù dzəə́ lo, búŋ kifá ke yi, búŋ ke noón kí. Bó vèr yòʼ kér ndzə̀y sé a kur. Á kù nyavrì e vèr nyávrin, a vèr ján janén, là fó shiíy,

¹² katìr, lim lim e wó yérí, e bó a yikír. Wíri lóo kuùrì ver, vèr kù a sheʼrí áwune shéʼrín. Á lóo bàn ver, vèr kù a biimé biimén, e làa yòʼ a ghay.

¹³ Á lóo lor kinyo e věr wùn, vèr kù a bìnèr ji weè. Wìr dzə̀m kù leey ver e meé lèn moo viŋgà ve á maʼày e ròŋ. Vèr dzə̀ kér ji afə̀ʼdzə́n fo wír veé wòŋe adzə̀m.

¹⁴ M sàŋ vinyo vìn fo vèn ben, a bó yòʼ dzə̀ ji m taʼ a ji vèn wáa rəsí, a woomé. M taʼ, e tir ven tírín moo wón vém ve m kòŋèn é ŋàŋ.

¹⁵ A vèn fə̀m kér wír wií wií ve á yéʼey ven kinyo ke Jesus Kristu, bo tàr won wo wù‑uù dànèn ven é kinyò foo fèn kù jòʼsì e mòʼón. A dzə̀ mo woo Por wo dzəə̀n tàr won wo wù‑uù dzəən ven é kinyò fèn e ghan se mò‑oò wìyìn, a fìʼtì sáʼka woo kùm Jesus Kristu e vèn.

¹⁶ M nén a lon ji vèn kú a tiír sa kiwuú kén á mo m tiir kém.

¹⁷ Á kinyo ke kí yiìn, bo m túm Timoti və̀n ji wù wiy, e yèn á ven. Dzə̀ wán wom bìʼ kinyo ke Jesus Kristu, a wù tíy sa e kinyò foo fèn shilív shimòʼón, a m koŋ wun feyì. Wù yíi wìy, é wù kfən màysì, e naàrì ven kinyo ke m yéʼey e vintatì ve Kristu vidzə̀m mo dzə̀ wìr wo wù tatin wùn Jesus Kristu wàa tiír kiwuú kfə́, a fìʼ.

¹⁸ Wír ámóʼó lò ne e věn mvəm, a meenín, bìʼ fo á kwaʼ ji bó m yòʼ dzəə́ yìi wìy a fo věn wùn.

¹⁹ A Nyùy sə̀, bo bèr shishàr, é m kfən wìy. M wíy wìy, é bo vèsən yén vitaáví ve wír vee shooyi kér e Jesus Kristu kinyò fèn, a bó á yòʼ dzəə́ wìy rəsí, a kùm a dzə̀ shuu.

²⁰ Ke kí dzəə̀n kí dzə̀ ji sáʼ Nyùyi yòʼ dzə̀ á kinyo ke á wáa kùm a dzə̀ shuu. Yí kér vitaáví, aá yii mo yí dzəə̀n.

²¹ Vèn koŋ kén ji m wíy lóo wìy, m yèe e vèn? Dzə̀ ji m wìy a wìy a dzə̀ e ŋgwàne, mo vèn‑éè biner melív men, é m wáa wìy ji weè, e shilív she juŋ shi á?