1 Korin 3 - ŊWÀʼ NYÙY

Wír veé Korine wáa yu fo Kiyoy ke Nyùy ki, a dzə shuu e mòʼón

¹ Yii bèy, afə̀r vem, yì‑iì dzə̀ é ghan se vèsən‑eè dzəə̀n, a bó yòʼ‑oò dzə̀ m sùŋnín e vèn moo wír ve á sí yú a dzə̀ fo Kiyoy ke Nyùy ki. M nèn a suŋnín e vèn a dzə̀ moo wír ve á dzəə́ yú a dzə̀ mo mensə́ mev mè limè, bìʼ fo vèn kù‑uù dzə̀ə́ e Jesus Kristu kinyò moo wón ve bóri.

² Mò‑oò kér ven moo wón ve á dzəə́ fó a dzə̀ vín sho, a bó yòʼ dzə̀ á wàa fo vifá ve kfərín ví aáwune. A mò‑oò yiir ven bey, bìʼ fo vèn yòʼ‑oò ló ne mèé fó yi vifá ve yi, a bó vèn yóʼ ne fə̀m mèé sa lèn.

³ Vèn kù dzə̀ə́ moo wír ve á yú a dzə̀ fo mensə́ mev mè. Mo vèn rə́si gheʼnìnè, táŋnin ghán sidzə̀m, bó kí yòʼ din ji vèn dzəə́ yú a dzə̀ fo mensə́ men mè à? Vèn kù dzəə́ yii a dzə̀ kinyo ke wír veé ndzə fène yii.

⁴ Mo vèn kù dzəə́ lo, wìr wàa suúy jii, «M dzə̀ wír Por», kày wàa suúy jii, «M dzə̀ kém wír Apolor», bó kí yòʼ din rú ji vèn yii a dzə̀ mo wír veé ndzə fène yii à?

⁵ M nén a dzər e vèn jii, Por sà dzə̀ la, Apolor la, bo vèn wáa yiì bèy a? Vèr wun vìn kù dzə̀ cáʼ ji aŋgàa lìm Nyùy ve á yiìn, bo vèn wáy shilív e Jesus wùn. A wìr fo vèr kù yii a dzə̀ rə́ yee lim ye Nyùy dìnèn.

⁶ Mò‑oò dzə̀ kém moo wír wo wù biy kifá bíyin, Apolor nèn a dzə kfə́ moo wír wo wù wáyri mendzə́v shó, a nèn yii Nyùy, bo kifá kee shooy ki wáa kuy.

⁷ A bó ŋgaà bìy, kìn ŋgaà wo wù wáyri mendzə́v shó yòʼ kér kinyo kímóʼ kí gheéy. Kù kér Nyùy wo wù yii, bo kifá kee shooy ki wáa kuy.

⁸ Wìr wo wù bìyìn wùn à wo wù wáyri mendzə́v shó ku nèn a dzə réŋréŋ, a Nyùy wíy a laamé wír a dzə̀ mo wù lìmèn rə́ yee lim.

⁹ A ver vee abaà víne tàtí wó a dzə̀ vèr à Nyùy ji á wáa yiì lim rə́. Vèn nén a dzə kén moo súm wo Nyùy taʼ, e fùm, e kfə̀n a dzə moo lav ye wù bómé.

¹⁰ Nyùy nèn shòʼ mo, e fò mo vifií, m wáy kinsə̀ŋ ke lav rə̀n moo ŋgaà kimbom wo wù kiìn lim rə́ kijuŋ. Mo m wayin, wùmòʼ woo wír nén a bom lav yee shooy. Kí nén a dzə cáʼ jii, wìr lóo bom, wù kù yòʼ kìíy a mo wù bóm e kinsə̀ŋ foo fèn.

¹¹ A bó yòʼ dzə̀ wìr kfə̀n a way kímóʼ kee kinsə̀ŋ, e shaà ke vé‑eè wayin ne, a dzə̀ Jesus Kristu.

¹² Wíri nén a bàʼrì e kitu wo e dzəə sí dzəə sí. Wìr wùmòʼ lì kfə́ a dzə̀ *kisha ke mbàm ke baar kí, wùmòʼ lì ke fəvír kí, é bo wùmòʼ li a dzə̀ tíy see moo *síbaŋ wùn à *saàkìnshìy, a bom sho. Wùmòʼ nèn bàʼrì kfə́ e vicí ví, wùmòʼ tùy kfə́ tuyín, e wàyrí e wúy sí, kìn e visáŋsáŋ ví.

¹³ Aá fə̀m bàʼrì e le, bo kishiíy kí wíy gheén, aá ku yèn mo yé wìr yee líme dzəə̀n. Wíy lòo dzə e kishiíy ke Kristu kfənen ne, é wù wáa mùm lim wìr dzə̀m a dzə̀ e və́yí. Və́yí kumè, aá nèn yèn mo yí dzəə̀n.

¹⁴ Kifá ke wìr bàʼrìn é kinsə̀ŋ foo fèy ki goʼ là shwí, é ŋgaàŋ nèn a ker vilaámé fo wùn lìm.

¹⁵ Ké wìr ki shwí, bo wù ràn ne vilaámé. Yii bèy, é wúnwun kitú kfə́ ku yòʼ lùŋ, a dzə moo wír wo wù meen fó kinshwí ke lav.

Wír Kristùu dzə̀ lav Nyùy, a yì kér fó a dzə e ránén

¹⁶ Mo vèn seʼnìn bèy, bó vèn yòʼ kì ji vèn dzə̀ lav Nyùy, a Kiyoy ke wun woo Nyùy ki shiiy sho à?

¹⁷ A wìr bìvír lav Nyùy rə̀n, bo Nyùy kù laar ŋgaàŋ láarin, bìʼ fo dzəə̀n lav rə, a yì kér fó a dzə e ránén, a dzə̀ ven vin lav yee shoon.

¹⁸ La wìr yòʼ a boʼtí kitú kfə́. A wìr lò, a kwàʼtì ji wun sí kér və́ vee vifií mo wír veé ndzə fène kwaʼà, wù wàa kiíy jii, a dzə̀ wù kù lì kitú kfə́ ji kiyúŋ, e bóo fíʼ kiíy rú á kinyo ke dzəə̀n ke ru kí.

¹⁹ A m suuy bèn, bìʼ fo vinyo ve wír veé ndzə fène yén ji vifií ví dzəə̀n ve Nyùy yén kfə́ ji kiyúŋsì. A dzə̀ kíwun ke vé‑eè saŋen é Ŋwàʼ Nyùy jii, «Nyùy koó afií a dzə̀ é kitam ke koʼorin áwune.»

²⁰ Aá kfə̀n‑eè sàŋ sá jii, «Nyùy Tàr kì ji vinyo ve afií kwaʼtì vi yòʼ kér ndzə̀n.»

²¹ Kí nén a dzə jii, lá wìr yòʼ fə̀m a sevtí a ji wun dzə̀ wir wìr wùmòʼ. Vèn wáa kiíy ji vinyo vidzə̀m vi sì á vén.

²² Kìn dzə̀ vé Por, kìn vé Apolor, kìn vé Pita, kìn dzə̀ ndzə rə̀n, kìn dzəʼə̀m, kìn kpú, kìn dzə̀ vinyo veé ghan sin, kìn dzə̀ ve ví dzəə́ wìy a wìy, bo vinyo vìn vidzə̀m vi kù dzə̀ vén.

²³ A vitú vén ví dzə̀ e Kristu kiwo, a kér Nyùy wun woo Kristu.