1 Korin 2 - ŊWÀʼ NYÙY

Por yòʼ tíy e vifii ve dzəə̀n və́

¹ Afə̀r vem, vèn kuúmé mo mò‑oò wìyìn, a fìʼtì e vèn mo Nyùy dzəə̀n, a dzə̀ kinyo ke kí‑iì dzəə̀n fó mbìy e kilìr. A bó m yòʼ‑oò ló a fìʼtì, a shèŋrì lám, a dìn vifií a dzə̀ vém,

² bìʼ fo mò‑oò wayin ji vèsən lóo dzə, m kù a tiír vifií cáʼ ji m wáa fìʼtì kinyo a dzə̀ ké Jesus Kristu, bo taaka kpú ye wù‑uù kpuun é kintam.

³ M nen wìy moo wír wo bó wù yòʼ kiìn kinyo ke dzə̀ wù yiì, shilív shém shí wáa buʼ, m wáa fàn ji kìn bó yòʼ dzə̀ m kìíy á móo suúy kinyo e vèn, aá yú.

⁴ A bó m yòʼ‑oò ló a fìʼtì kinyo kee shooy, a bìnèr ven e kisúŋnìn kímóʼ kí ke dzə̀ wìr nàŋsín, e shèŋrì, kí wàa dìn vifií. Mò‑oò fiʼtì, a din Kiyoy ke Nyùy vitaáví ve ví dzəə̀n é kinyò fèn.

⁵ A mò‑oò yiì bey, ji kú a yiì vitaáví vé wun woo Nyùy, é bo vèn wáa way shilív e Jesus Kristu wùn, e làa yòʼ a way a dzə̀ bìʼ kinyo ke wìr suuy, a kí din vifií.

Por tíy e vifii a dzə̀ ve dzəə̀n vé Nyùy

⁶ Yii bèy, a wír ve á yú a dzə̀ fo Kiyoy ke Nyùyi nèn yú kév kinyo ke m fiʼtì kìn, a kí din a dzə̀ vifií vé Nyùy. A bó vifií vee shooy vi yòʼ dzə̀ vé wìr veé ndzə fèn, a bó ví yòʼ fə̀m lò sa fo wír ve á kér ndzə yee lèn rə̀ne. Áwune kér vitaáví a dzə̀ lèn, a ví kù sí lo, e ŋeemé, e lày.

⁷ A vifií ve vèr fiʼtì vìn vi dzə̀ kinyo ke kí‑iì dzəə̀n é kilìr, kfə́n a dzə kinyo ke Nyùy‑iì sìysìn fo wùn vifii, é bo ndzə wìy a kèʼ ji wun wíy lì vèsən, e way e wùn mvə̀m vijùŋ.

⁸ A bó wír ve á sáʼ ndzə yee lèn rə̀ne yòʼ‑oò lo kìíy sa kinyo kee shooy. A vé‑eè bóo kiíy, bo bó á yòʼ‑oò lo kùm Taàtá Jesus e kici, a tíy wun vitú ve saʼ e dzə̀m.

⁹ A dzə̀ kíwun ke vé‑eè saŋen é Ŋwàʼ Nyùy jii: «Vinyo ve bó wìr yòʼ‑oò yiì ne yèn, a bó á yòʼ‑oò yiì ne yù, a bó ví yòʼ fə̀m‑eè yiì ne wìy e wìr vifii, ví dzə̀ víwun ve Nyùy‑iì sìysìn fo wír ve á koŋ wune.»

¹⁰ Nyùy nèn yiì, Kiyoy kfə́ kí wáa dìn kinyo kee shooy a dzə̀ e vèsən. A kù dzə̀ Kiyoy kfə́ kin ke kí yii tar vinyo vidzə̀m, a fə̀m dzə̀ kinyo ke kí dzəə̀n e Nyùy sar bvə̀m.

¹¹ Dzə̀ rú, bìʼ fo bó yòʼ dzə̀ wìr kìíy kinyo ke wùmòʼ kwaʼtì fo wùn shiliv, kù kì shilív shé ŋgaàŋ. Kù dzə̀ sá mo bó yòʼ dzə̀ wìr kìíy kinyo ke Nyùy kwaʼtì, e shaà Kiyoy ke wun woo Nyùy.

¹² A Kiyoy ke Nyùy wayin e vèsə́n meliv kí yòʼ lò a dzə̀ fó ndzə fèn. Wù wày a dzə̀ kfə́ kee Kiyoy ji kí wáa yiì, é vèsən wáa kiíy ambùʼmé ve wù bùʼùn vèsən shó adzə̀m.

Kù kì wír wo wù kér Kiyoy ke Nyùy vifií vé Nyùy

¹³ Vèsən nén a yu a dzə̀ fo Kiyoy ke Nyùy ki, e bó a kiíy mó a fèr vinyo vìn e wíri. A bó vèsən yòʼ fer a dzə̀ e vifií ve dzəə̀n vé wìr vi. A dzə̀ vèsən wàa naàrì vinyo ve ví lo fo Kiyòy ke Nyùy vìn a dzə̀ e wír ve Kiyoy kee shooy ki siìn aáwuné meliví.

¹⁴ A bó yòʼ dzə̀ wír wo wù buŋen Kiyoy kee shoon fo wùn shiliv, wù wáa kòŋ fó koóy ambùʼmé ve Kiyoy ke Nyùy ki din vìn. Wù lo kfə́, wù nèn a yen ji vinjeenjèm ve vinyò. A bó yòʼ dzə̀ wù kìíy mo á dzəə̀n, bìʼ fo kù yii Kiyoy ke Nyùy, bo wìr wáa kiíy.

¹⁵ Yii bèy, a wìr wo Kiyoy ke Nyùy ki dzəə̀n e wùn shiliv nèn kiiy móo sayrí vinyo vidzə̀m, a bó yòʼ dzə̀ wìr sàyrí kfə́,

¹⁶ bìʼ fo vé‑eè saŋen jii, «Bó wìr yòʼ dzə̀ shó wo wù kiìn kinyo ke Nyùy kwaʼtì, e bóo tir wun.» Vèsən wáa dzə késən, aá sí kér kwaʼtì a dzə̀ yé Kristu.