1 Korin 14 - ŊWÀʼ NYÙY

Mbùʼme Nyùy woo kùm lám see jeéy jeéy

¹ Vèn ku nèn toòmé kinyo a dzə̀ kee ji wìr wáa kòŋ wíri, a way vifií ji Nyùy fó á ven ambùʼmé ve dzə̀ vèn wàa sə kintatì sho, bo taaka ji vèn wáa yu kinyo fo wun woo Nyùy, a tiisí e wíri.

² Vèn wáa kiíy jii, a wìr súŋnin e làm wo bó wù yòʼ kiìn, bo wù súŋnin a dzə̀ e Nyùy, wù yòʼ súŋnin e wíri, fer vinyo ve ví dzəə̀n é kilìr mo Kiyoy ke Nyùy ki dom wun.

³ Yii bèy, wìr wo wù yú kfə́ kinyo fo Nyùy shuù, e bó a tiisí, wù súŋnin a dzə̀ e wíri, lumèr kintatì, távir melív mev, kfə̀n rəər sa melív mev.

⁴ Wìr wo wù súŋnin e làm wo bó wù yòʼ kiìn lumèr a dzə̀ sə́ shee shilív, a wìr wo wù tiísi a dzə̀ kinyo ke wù yú fo Nyùy lumèr melív me kintatì.

⁵ M nén a kòŋ ji ven adzə̀m wáa suŋnín e Nyùy e làm se bó vèn yòʼ kiìn. Yii bèy, a ke m koŋ e ŋàŋ kí dzə̀ ji vèn wáa yu a vinyo fo Nyùy, a tiisí e kintatì. Wìr wo wù tiísi ntum Nyùy, wù yii kinyo ke kí sə́ wíri, e shaà ké wìr wo wù súŋnin e làm wo bó wù yòʼ kiìn, a bó dzə̀ ji wìr wùmòʼ dzə̀ fó wo wù tóʼti lám woo shooy, é bo kí sə́ kintatì.

⁶ Afə̀r vem, a m wìy lèn, a suŋnín e vèn a dzə̀ é làm wo bó vèsən yòʼ kiìn, bo m sə́ ven é gha? A dzə̀ m kù sə̀ ven cáʼ, a m bèn kér kinyo ke fíy kímóʼ kí ke Nyùy dìnèn e mò ji m fer e vèn, é vèn kfən kìíy wun, e shaàsìn. Kìn dzə̀ jii, m wáa yu vinyo fo wun, a tiisí e vèn, kìn ji m yéʼéy ven vinyo və́ vímóʼ ví.

⁷ A dzə̀ vèsən lì mfìʼ kinyò kìn fo loŋ ye á yii tóŋé, e kfə̀n lì fo luŋ ye á yii kumè. A bó vifá vìn vi yòʼ fə̀m súŋnin fo wùn kitu mo vèn súŋninè. Yii bèy, a wìr dzə̀ là fóo kùm kijuŋ, la wìr yòʼ yù jí lùŋ.

⁸ Kí kfə́n a dzə jii, a wìr tóŋ sóŋ ji á fəə́, a dù rə́r, e làa yòʼ a toŋ, é jì wáa fəə, la wìr yòʼ fəə̀.

⁹ Dzə̀ réŋréŋ sá mo bó yòʼ dzə̀ wìr kìíy kinyo ke vèn suuyì, a vèn súŋnin a dzə̀ é làm wo bó á yòʼ yú, bo vèn sí súŋnin mo tóŋ shwér shuu wón.

¹⁰ Vèn kì sá ji kfə́ə làmé dzə̀ é kitu ke nsay e neénín, a wo wú buŋen nsàvi yòʼ dzə̀.

¹¹ Yii bèy, a wìr lò, a suŋnín e mò a dzə̀ é làm wo bó m yòʼ kiìn, la m yòʼ dzəə yù. M nèn a yen wun ji wir kitum, wù wàa yen sa mo ji wir kitum.

¹² M nén a tir ven jii, mo vèn sí wáy vifií ji vitaáví vé Kiyòy ke Nyùy vi wáa yensín e věn mvəm, vèn kú a jùmrì kitú ke kinyò ji á wáa ker a dzə̀ vee shooy vee ambùʼmé ve dzə̀ á wàa tavír kintatì.

¹³ Kí nén a dzə jii, wìr wo Nyùy bùʼùn, a wù lò, a suŋnín e làm wo bó wù yòʼ kiìn, wù wàa lon ji Nyùy ku yiì sa, é wun kiíy á móo toʼtí kinyo kee shooy, é wíri yú.

¹⁴ A m suuy bèn, bìʼ fo m yii lóo bùnrì Nyùy e làm wo bó m yòʼ kiìn, wàa bùnrì shilív shém, a bó m yòʼ bunrì fo mǒ vifii.

¹⁵ Mo kí dzəə̀n ben, bo m yíi yèe le? M yíi lò, é m maʼti, é shilív shém shí wáa bùnrì mo Kiyoy ke Nyùy ki bánri mo. M lo sa, é m bunri fo mǒ vifii. M lo, é m maʼti, é shilív shém shí yov luŋ, yií lo, é m yov sá fo mǒ vifii.

¹⁶ A là bey, wìr fo vèn wáa bùnrì, a wù bunrì fo shiliv é làm wo bó wù yòʼ kiìn, la wìr wùmòʼ yòʼ bìnsí ji amen, a bo wù yú lám woo shooy.

¹⁷ A wìr fə̀m beerì Nyùy e dzəə fóo fèn moó le, bo bó kí yòʼ lumèr shilív shé wìr woo fó ghaŋ gheéy.

¹⁸ Mómò, m lo, m wàa suŋnín e Nyùy e làm wo bó m yòʼ kiìn e shaà ven adzə̀m, a m beerì Nyùy bìʼ kee shoon.

¹⁹ Yii bèy, m lóo suŋnín e mvə̀m kintatì, m wàa kòŋ ji m suúy jí sitàn cáʼcáʼ a dzə̀ fo mǒ vifii, e yèʼéy wíri shó, e shaà móo rəsí, a suŋnín jí nsə̀kì e ghvə̀m e làm wo bó wíri yòʼ yú.

²⁰ Afə̀r vem, lá vèn yòʼ a kwàʼtì vinyo moo wónlè. Vèn kú a meŋ a dzə̀ kinyo ke bi kí moo wón ve bóri, yii bèy, a kwàʼtì vinyo moo ŋgày sé wìr.

²¹ Vèn yén ri mo vé‑eè saŋen é Ŋwàʼ Nyùy ji Nyùy suuy jii: «M wíy a suŋnín e wír vìne, a m wíy a shaà a dzə̀ fo vitúm vi, vitúm, a ví súŋnin a dzə̀ lám se sən sí. Fə̀m mo m wíy a suŋnín bèy, bó wír vémé yòʼ wíy a yuurí.»

²² Kinyo kìn ki din jii, mbùʼmé woo ji wìr wáa suŋnin e làm wo bó wù yòʼ kiìn yòʼ dzə̀ á kisəəm fo aŋgàa biimée. Kù dzə̀ kisəəm ke kí din wír wo bó yòʼ dzəə̀n ŋgaà biìmé, bìʼ fo wù kù yíi ŋway kfə́ ŋwayín. Kinyo ke wìr yú a dzə̀ fo Nyùy shuù, e bó a tiisí ki nén a dzə kisəəm fo aŋgàa biimée.

²³ Kí nén a dzə jii, a vèn dzə̀ʼə̀m e věn kintatì, wìr dzə̀m keʼ, a suŋnín lám sí jeéy jeéy, wìr wùmòʼ du, a nəə́, a dzə̀ mbuʼŋgàŋ, kìn nəə wír wo bó yòʼ siìn ŋgaà biìmé, e yù bey, wù kù a suúy kfə́ ji vèn báa a baán.

²⁴ Ŋgaàŋ wáa nəə́, a wìr dzə̀m fiʼtì a dzə̀ kinyo ke wù yú fo Nyùy, bo wù yií yu kinyo ke vèn suuy kidzə̀m, é kí nəə́ e wùn shiliv, a saʼ wun fo wùn vinyò ve bi ví.

²⁵ Mo kí sáʼ bèy, é wù nèn kuùmé vinyo ve wù litì e wùn shiliv vidzə̀m, e tsə̀m fó nsay, a fo ghvə́m e Nyùy, a binsí ji Nyùy dzə̀ rú e věn mvəm.

Mo dzə̀ kintatì ki wàa bùnrì, a yiì vinyo réŋréŋ

²⁶ Afə̀r vem, kinyo ke m suuyin kidzə̀m ki dzə̀ ji ka? Mo vèn yii lóo dzə̀ʼə̀m, wùmòʼ lò, e màʼ luŋ, wùmòʼ wàa yeʼéy wíri e kinyo ke wù kér ki, wùmòʼ wàa fìʼtì kinyo ke fíy kímóʼ kí ke Nyùy dìnèn e wun, wùmòʼ wàa suŋnín e làm wo bó ŋgaàŋ yòʼ kiìn, é bo wùmòʼ wáa bìnèr kinyo kee shooy, é wíri wáa yu. Vèn ku nèn a kuumé cáʼ ji vèn wáa yiì vinyo vìn vidzə̀m, é ví wáa tavír a dzə̀ kintatì.

²⁷ A wír ve á kì yíi a suŋnín e làm se sən sí dzə̀ fó, á fò kilíŋ e wíri abaà, kìn ataár, e làa yòʼ shaà bèy. A wìr wo wù binèr kinyo kee shooy kù kér sa fó a dzə.

²⁸ A wù bùŋ, lá wír vee shooyi yòʼ dzə́ə a suŋnín e kintatì, á nèn a dzə kisə́sə, a suŋnín e Nyùy a dzə̀ fo áwuné shiliv.

²⁹ Vèn fó sá kilíŋ e wíri abaà ve á yú kinyo fo Nyùy, tiísi e kintatì. Á lóo tiisí, wìr dzə̀m wàa yuurí kijuŋ, a sayrí.

³⁰ A wìr lòo tiisí bèy, Nyùy suúy kinyo e wìr wo wù kì dzə́ fo nsay wùmòʼ, wo wù kì súŋnin və̀y sə̀sín, e fò kilíŋ e wìr woo shooy.

³¹ Vèn lóo yiì bèy, é wíri nèn a ker kilíŋ ké a fìʼtì kinyo ke Nyùy tiisin aáwune amòʼón amòʼón, é wìr dzə̀m wáa yuurí, é melív mev mè wáa lùm.

³² Vèn wáa kiíy jii, Nyùy súŋnin e wìr, kù nèn kìíy a ŋgaàŋ ghán se wù tiísi, a bó yòʼ dzə̀ ji kú a dzə e ghan see shó.

³³ A Nyùy sìysì bèy, bìʼ fo wù koŋ kfə́ a dzə̀ nyaáŋ, wù yòʼ koŋ njèʼèr. Ké vikìy kí nén a dzə jii, vèn kú a yiì réŋréŋ á mo vintatì ve wìr Nyùy vímóʼ ví yii vidzə̀m.

³⁴ Vèn báʼti e kintatì, vikìy wàa dzə kisə́sə. Bó yòʼ dzə̀ kirə́ʼ kév fó a suŋnín, á kú a yuurí yuurín. A dzə̀ kíwun ke nsər suuyì.

³⁵ Aáwune kér kinyo kée dzər, á kfə́n fo laʼ, bo á dzə́r a dzə̀ áàlúm véví. Bó kí yoʼ ghèén ji wiíy wáa tiy e kintatì kí si, a suŋnín.

³⁶ Fo vinyò vìn vidzə̀m, m nén a dzər e vèn ji vèn sà sí kwaʼ ji kinyo ke Nyùy ki‑iì lò a dzə̀ fo vèn á? Mo vèn kwaʼ ji vé‑eè wìy, e fìʼtì a dzə̀ e vèn cáʼ a?

³⁷ Wìr fo vèn wo wù yén ji Nyùy bùʼ ne wun, wun wáa yu kinyo fo Nyùy shuù, kìn Nyùy bùʼ wun a dzə̀ é dzəə rəné, bo dzə̀ ŋgaàŋ kìíy ji vinyo ve m sáŋ vìn vi dzə̀ rú á ve ví loòn fo Tàr wòsən Jesus Kristu.

³⁸ A wìr lò, a kìnèn, vèn kù mèŋ ŋgaàŋ méŋén.

³⁹ Afə̀r vem, vèn ku nèn a yaŋrí kén a dzə̀ ji Kiyoy ke Nyùy ki buʼ ven, é vèn wáa yu kinyo fo Nyùy, a tiisí e kintatì. Yii bèy, lá vèn yòʼ a bìnsìn fo wìr lo, a suŋnín e làm wo bó wù yòʼ kiìn.

⁴⁰ Kù dzə̀ cáʼ ji vèn wáa sìysì vinyo mo dzə̀ ví wàa dzə, a yiì e dzəə ye gheenén.