1 Korin 12 - ŊWÀʼ NYÙY

Ambùʼmé ve Kiyoy ke Nyùy ki buʼ wír Nyùy sho

¹ Afə̀r vem, m nen kfə̀n a tàʼ ji vèn kiíy rú á vinyo ve Kiyoy ke Nyùy ki yii buʼ wír, wù wàa yiì.

² Vèn wáa kuumé mo vèn‑eè dzə́, a bó vèn yóʼ ne kìíy Nyùy. Vinyo vi‑iì rə́si bóʼti ven vinín, səŋrì, a vèn fer vifá, cu ji anyùy, a bó vee shooyi yòʼ ŋeʼè.

³ M nén a tàʼ lèn ji vèn kiíy kijuŋ a ji wìr wo wù suuy kfə́ kinyo ke kí loòn a dzə̀ fo Kiyoy ke Nyùy ki yòʼ dzə̀ á wù kfə̀n a dzə ji lòné shóv Jesus. A bó yòʼ dzə̀ wìr kfə̀n a fìʼtì ji dzə̀ Jesus wo dzəə̀n Tàr, a bó bánrí Kiyoy ke Nyùy ŋgaàŋ.

⁴ Fo ambùʼmé ve Kiyoy ke Nyùy ki buʼ wíri shó, kí nén a dzə ji á dzə̀ á jeéy jeéy, a Kiyoy ke Nyùy ke kí fó ki kù mày kimòʼón.

⁵ Kù dzə̀ réŋréŋ sá mo lim se wìr Kristu si dzəə̀n jeéy jeéy, a wun woo Tàr kù jòʼsì e mòʼón.

⁶ Wíri kfə́n a yiì sa lim sév é dzəə sí dzəə sí, a Nyùy wo wù fó vitaáví aáwune adzə̀m, bo á wáa yiì, kù mày e mòʼón.

⁷ A Nyùy yii, a vitaáví vé Kiyòy kfə́ ví yénsin e wìr mòʼón mòʼón lìm, e fíʼ a sə kintatì kidzə̀m.

⁸ Wù lo, wù bùʼ wír wùmòʼ e vifií ví, wù wàa suúy vinyo a dzə̀ mo ví kù dzəə̀n. A kù kfə̀n buʼ wun wùmòʼ, a wù fiʼtì vinyo e dzəə ye dzə̀ wíri yù.

⁹ Kfə̀n buʼ wun wùmòʼ woo wír, a wù wáy shilív é vinyò ji dzə̀ Nyùy kù yiì a vinyo vee shooy, a kù kfə̀n buʼ wun wùmòʼ, a wù fer wír ve á joykìrì.

¹⁰ Wù buʼ wùmòʼ, wù wàa yiì viŋgaʼnìn ve vinyò, wùmòʼ wàa tiisí vinyo ve wù yú a dzə̀ fo Nyùy shuù. Wù kfə̀n bùʼ wùmòʼ, wù yén kinyo, wù kìíy ji kí sà lò a dzə̀ fo Nyùy mo dzə̀ sə́m a. Lóo dzə wùmòʼ, wù nèn bùʼ e kiliímé ki, wù wàa suŋnín lám se bó wù yòʼ kiìn, e bùʼ wùmòʼ a dzə̀ e vituʼùr ví, wù wàa yu lám see shooy sho, a toʼtí e wíri.

¹¹ Á wáa yiì vinyo vìn e dzəə sí dzəə sí ben, a kù yuŋrì wun woo Kiyoy ke Nyùy wùn mòʼón, bo á wáa yiì. Wù jav ambùʼmé vìn e wìr mòʼón mòʼón, a kù dzə̀ mo kiìn wun.

Kintatì ke wìr Kristu ki dzə̀ moo wún wìr

¹² A dzə̀ vèsən fìʼsìn kinyo kìn a dzə̀ mo wún wìri dzəə̀n. Wú kér vibar vinín, yii bèy, a kù dzə̀ ji wún e mòʼón. Mo vibar ve wùn vin vi yùŋsìn, e fèr wún wìr e mòʼón, kù dzə̀ réŋréŋ sá mo kintatì ke wìr Kristu ki dzəə̀n.

¹³ Vèsən dzə̀ wír jeéy jeéy, ámóʼó dzə̀ veé Juda, ámóʼó vitúm ve sən ví, ámóʼó akwàn, ámóʼó nén a dzə wón wòŋ. Yii bèy, a kù dzə̀ Kiyoy kee shó kimòʼón ke kí‑iì liìn vèsən adzə̀m, e tàtí ji wún e mòʼón, a dzə̀ kíwun ke Nyùy wayin e wìr mòʼón mòʼón shiliv.

¹⁴ Vèsən kì ji wúné yii dzə́ vibar jeéy jeéy, a bó yòʼ jòʼsì kibar ke wùn kimòʼón, kí fèr á wún.

¹⁵ A kiwuú kí fə̀m lò, a suúy jii, «Mo bó m yoʼ mèé moo kiwó, bo bó m yòʼ dzəə́ taʼ, a dzə kibar ke wùn kímóʼ kí,» bo kí kù bár a dzə̀ é wùn fóo fèy.

¹⁶ A kituʼùr kí lò sa, a suúy jii, «Mo bó m yoʼ mèé moo sí, a m dzə̀ kém kituʼùr, bo bó m yòʼ dzəə́ taʼ, a dzə kibar ke wùn kímóʼ kí,» bo kí kù bár a dzə̀ fó.

¹⁷ A wúné jòʼsì ji sí, wìr wàa yu vinyo e le? A wú jòʼsì ji kituʼùr, wìr wàa yu kirəm ke kifa e le?

¹⁸ Ke kí dzəə̀n kí dzə̀ jii, Nyùy‑iì bòm wún wìr, e nàŋsín vibar jeéy jeéy a dzə̀ á mo kiìn wun.

¹⁹ A kibar ke wùn kí jòʼsì kimòʼón, á yòŋ ji wún é le?

²⁰ Wúné dzə̀ vibar jeéy jeéy, bo ví tátí, a dzə ji wún e mòʼón.

²¹ A bó yòʼ dzə̀ sí yí kfə̀n lò, a suúy e kiwó ki ji bó m yòʼ kér shií fo wò. A bó yòʼ dzə̀ kitú ki kfə̀n sùúy sa e kiwuú kí bey.

²² Ke kí dzəə̀n kí dzə̀ jii, vibar ve wùn vímóʼ ví dzə̀, a ví yénsin fo tèr. Yii bèy, a vee shooy vi bùŋ, la wìr yòʼ dzə́ə a ŋèʼ.

²³ A vibar ve wùn ve ví yénsin fo tèr vìn vi kfə̀n dzə̀ víwun ve vèsən géʼ sho e ŋàŋ. Vèsən lo, á wàa leéy, a geʼ e virə́ʼ vé wùn ve bó ví yoʼ bòŋ fó a yen vi, a naŋsín, a sətí e ndzə̀y sí,

²⁴ a bó vèsən yòʼ géʼ sa e ve ví kiʼ vijuŋ vi bey. A kù‑uù bòm Nyùy wún wìr, wú wáa dzə bèy, aá wáa ghvəm vibar ve ví yénsin fo tèr, a shaà vímóʼ ví.

²⁵ A wù‑uù yii bèy jii, vibar ve wùn ví wáa geŋsín kijuŋ, a lìm lim e mòʼón, é kímóʼ kí wáa tom a kímóʼ kí.

²⁶ Kí nén a dzə jii, a kibar ke wùn kímóʼ kí lò, a nyar, bo vibar ve wùn ví tàtí ne, a nyar vidzə̀m. Aá lò, a geʼ e kímóʼ kí, bo vibar ve wùn vidzə̀m vi sí yú vijuŋ.

²⁷ Ké wùn wo dzəə̀n wó Jesus Kristu ki nén a dzə jii, dzə̀ á ven vin ve dzəə̀n wún və́ woo shooy, a wìr mòʼón mòʼón dzə̀ kibar kfə́ ké wùn kímóʼ kí.

²⁸ A Nyùy‑iì lèm ne wíri, á wáa yiì lim jeéy jeéy é kintatì ke dzəə̀n ké wìr və́ kin. A vé mbìyi dzə̀ ve dzəə̀n aŋgàa ntum Jesus Kristu, ve á batiné dzə̀ wír ve á lo, á wàa yu kinyo fo wun woo Nyùy, a tiisí e wíri, ve á meen ji ataári nén a dzə wír ve á tóʼti kinyo ke Nyùy e wíri. Aámóʼó dzə̀ ve wù‑uù foon vitaáví, á wáa yiì vinyo ve ghaʼtín ví, ámóʼó wáa fèr kév a dzə̀ aŋgàa yàsí. Wù kfən lèm ámóʼó, á wáa sə wíri, ámóʼó wáa sìysì vinyo ve kintatì, ámóʼó lo, á wàa suŋnín lám se bó á yòʼ kiìn.

²⁹ Yii bèy, a bó yòʼ dzə̀ wír adzə̀m ve dzəə̀n aŋgàa ntum Jesus Kristu, a bó yòʼ dzə̀ adzə̀m ve dzə̀ á yù kinyo fo Nyùy, e tiìsí e wíri. A bó yòʼ dzə̀ sá adzə̀m ve dzə̀ á tòʼtí kinyo ke Nyùy, kìn ve dzə̀ á wàa yiì vinyo ve ghaʼtín ví,

³⁰ kìn ve dzə̀ á wàa fèr aŋgàa yàsí, kìn ve dzə̀ á wàa suŋnín e làm se bó á yòʼ kiìn. A bó yòʼ dzə̀ sá wír adzə̀m ve dzə̀ á wàa yu lám se bó á yòʼ kiìn sin, a bìnèr e wíri.

³¹ Mo Nyùy jàvìn ambùʼmé vìn bèn, vèn ku nèn wày vifií ji vèn wáa ker a dzə̀ á ve á tíy mbìy. Yii bèy, a kinyo ke m yíi a dìn e vèn lèn ki dzə̀ ke vèn kú a jùmrì, a kí shaà ambùʼmé vìn adzə̀m.