1 Korin 11 - ŊWÀʼ NYÙY

Liì wo vintatì vi wáa jùmrì e ghan sé bùnrì

¹ Vèn kú a bìʼnìn mo réŋréŋ mo m biʼnìn Jesus Kristu.

² M shéʼri ven féyì, bìʼ fo vèn kuúme mo ghán sidzə̀m, kfə̀n kuúme vinyo ve mò‑oò yeʼeyin ven shó, yii mo ví dzəə̀n.

³ M nén a tàʼ ji vèn kiíy kijuŋ a ji Kristu tíy vitú fo wìr wo dzəə̀n lumèn e dzə̀m, a lùmèn dzə̀ kitú fo wiiy və, Nyùy nén a dzə kitú fo Kristu.

⁴ Kí nén a dzə jii, a lùmèn lò, a bùnrì, kìn wù tiísi a dzə̀ ntum Nyùy, a wù kér tán é kitu, bo wù káy a Kristu wo dzəə̀n ji kitú kfə́ káyín.

⁵ Yii bèy, a dzə̀ la wiíy yòʼ a bùnrì, kìn wù tiísi a dzə̀ ntum Nyùy e kitú kfə́ kí kinshóʼ. A wù yii bèy, bo wù sí din ji bó wun yòʼ dzə̀ e lum və́ sar, nèn shoor lúm və wo dzəə̀n kitú kfə́. Wiíy wo wù kér kitú kfə́ là sə́tí kù dzə̀ réŋréŋ moo wo wù kwaàyìn kitú kwáayin.

⁶ A wù yèn ji bó yòʼ dzə̀ wù sə̀tí kitú kfə́, kí bòŋ ji wù maysi, e kwaày kwaàyìn. Yii bèy, mo dzəə̀n woómé fo wiíy wáa ghan e kitú ki kilor, wù ku sə̀tí kitú kfə́.

⁷ A bó yòʼ dzə̀ lùmèn wàa bùnrì e táné kitu, bìʼ fo wù dzəə̀n nsə̀nin Nyùy, din a dzə̀ vijuŋ ve wun woo Nyùy. A wiíy nèn din kfə́ vijuŋ a dzə̀ ve dzəə̀n vé lum və.

⁸ A kí dzə̀ bey, bìʼ fo Nyùy‑iì bomen wiíy a dzə̀ fo lùmèn wùn, a bó wù yòʼ‑oò lo bòm lumèn fo wiíy wùn.

⁹ A bó wù yòʼ‑oò bòm sá lumèn bìʼ wiíy. Wù‑uù bòm a dzə̀ wiíy bìʼ lumèn.

¹⁰ Kí nén a dzə jii, a dzə̀ wiíy kù a sətí kitú kfə́, a dìn ji wun dzə̀ e lum və́ sar, é nshèelav se Nyùy si wáa yen, a binsí wun.

¹¹ Mo kí fə̀m dzəə̀n ben, vèsən kì jii, fo dzə̀ʼə̀m ye vèsən kér vèsən à Tàr wòsən Jesus, bó wiíy yòʼ dzə̀ fo wùn kitu, a bó lùmèn yòʼ dzə̀ sá fo wùn kitu.

¹² Mo Nyùy fə̀m‑eè bomen wiíy a dzə̀ fo lùmèn wùn, wiíy nén a dzəə́ sa lumèn, a wír adzə̀me kù lò a dzə̀ fo Nyùy.

¹³ Fo ké wiíy wo wù bunrì e kitú ki kilor, a dzə̀ vèn kù shù sa fo věn vitu mo dzə̀ kí wàa dzə.

¹⁴ Mo ndzə yii dzə́, wìr dzə̀m kì ji kí yoʼ ghèén a ji lùmèn wáa tiír kitú.

¹⁵ Yii bèy, a kee shooy ki dzə̀ viŋgòn ve wiíy. Nyùy‑iì fó nə́ŋ sìn sho ji sí wáa sətí a kitú kfə́.

¹⁶ A wìr lò, a kìnèn, wù wàa kiíy ji dzə̀ á mo vèsən‑eè sí yii, a bó m yòʼ yén, a vintatì ve Nyùy vímóʼ ví yii jeéy.

Mo dzə̀ kintatì ki wàa yi vifá ve yi vee bìʼ Kristu

¹⁷ Kinyo kímóʼ kí nén a dzə sa ke m taʼ, e tir ven shó, a dzə̀ kinyo ke vèn yii, la kí yòʼ a bòŋ mo gheéy. Vèn dzəʼə̀m e kintatì ji á bunrì a dzə̀ Nyùy, fəə̀ kinyo ke bi kí, e shaà ke juŋ ki.

¹⁸ A ké mbìy ki dzə̀ jii, m yú ji vèn tárnin e kintatì, á wàa dzə a shuu jeéy jeéy. A m yén ji tàm bo dzə̀ á rú,

¹⁹ bìʼ fo a dzə̀ jeéyjeéy kù a dzə e věn mvəm, é bo wír ve Nyùy bínsíi fíʼ a yensín mo á yénsin bèn.

²⁰ Ke m yén ki dzə̀ jii, vèn yii tárnin ji á yí vifá ve yi vee bìʼ Tàr wòsən Jesus, la vèn yò a yi a dzə̀ á víwun.

²¹ A m suuy bèn, bìʼ fo m yú jii, vèn tárnin, tiir vifá ve yi, wìr kù nèn tò, a yi və́. Ámóʼó nèn gòʼ e jìŋ, aámóʼó kì nò ne, a baa baán.

²² Kee ben ki dzə̀ ka? Bó vèn yòʼ kér sén see lav fo dzə̀ wìr yì və́ vee vifá, e nò mvə́ə mee meluʼ à? Vèn taʼ, a shoór kintatì ke Nyùy, a yiì, é wír ve bó á yòʼ kér kifá kée wìy shoo wáa woomé bìʼ ka? Kinyo ke dzə̀ m sùúy kí dzə̀ ka? A dzə̀ m wàa sheʼrí ven fó kinyò fèn a? Bó yòʼ dzə̀ m wàa sheʼrí gheéy.

²³ Mò‑oò lo yèʼéy ven mo dzə̀ vèn wàa yiì, a mò‑oò yù kinyo kee shooy a dzə̀ fo Tàr wòsən Jesus. A kí dzə̀ jii, yì‑iì dzə̀ vitsə́ʼ ve vé‑eè yíi kar menàŋ, aá koó Tàr wòsən Jesus, wù nèn lì ntuʼ kiban,

²⁴ e beèrì Nyùy, e bèʼnín, e sùúy jii, «Kin ki dzə̀ wún wóm wo m fó fo vèn. Vèn wíy siiy, vèn wàa yiì bèn, a kuumé mo.»

²⁵ Á yí, wù nèn kfə̀n lì sa bàr, e sùúy jii, «Bàr və̀n dzə̀ *mensaŋ me fíy mè me Nyùy wíy gwàr vèn áwune e mensə́ mem mè. Vèn wíy siiy, vèn wàa no bèn, a kuumé mo.»

²⁶ Vèn ku nèn a kiíy jii, ghán sidzə̀m se vèn yí kibán kìn, nó bàr və̀n, e dù, e meé e ghan se Tàr wòsən Jesus wíy kfən, bo vèn fiʼtì a dzə̀ kpú ye wun woo Jesus‑eè kpuun.

²⁷ Kí nén a dzə jii, a wìr lò, a yi kibán ke Tàr wòsən Jesus kìn, a no fo wùn bàr fèn e dzəə ye bó yì yoʼ ghèén, bo wù leey a dzə̀ á wún Tàr wòsən wùn à mensə́ mvə mè ntéŋ.

²⁸ Wìr ku nèn a sayrí kitú kfə́ ŋkuŋén, e bó a yi vifá ve yi vìn, a no fo bàr fèn,

²⁹ bìʼ fo a wìr yí, nó, a bó wù yòʼ kuúme kifá ke dzəə̀n wún Kristu, bo wù wáy a dzə̀ lòn e wùn kitu.

³⁰ A kù dzə̀ lòn woo shooy wo wú yiìn, wír ámóʼó sénkír fo věn mvəm anín, a jòykìr, aámóʼó kpùkír ne.

³¹ Yii bèy, a vèsən kì sáyri vinyo vesən, kwaŋrì, la vèsən yòʼ dzəə lì lòn gheéy.

³² Nyùy lo, wù màʼ ŋgeʼ e vèsən lèn, a wù naarì vèsən náarin, aá binkir, é la wù yòʼ dzəə wìy tàtí vèsən à wír veé ndzə fène, e wày é lòn woo là may.

³³ Afə̀r vem, ke kí dzəə̀n kí nén a dzə jii, vèn wíy lóo tarnín ji á yí vifá ve yi vìn, vèn kù shìy, é wíri báʼtí adzə̀m ŋkuŋén.

³⁴ A wìr yù, a jìŋ yár wun, wù tòmbìy yìkír fo laʼ fó wìy, e yiì kfə́ə liì wùmòʼ, é Nyùy maʼ ŋgeʼ e věn kitu. Fo vinyò ve ví berin vímóʼ ví, m wíy wìy, e bóo naàrì vee shooy.