1 Korin 1 - ŊWÀʼ NYÙY

¹ Sàŋ mo woo Por wo dzəə̀n ŋgaà ntum Jesus Kristu ŋwàʼ və̀n. A kù‑uù lì Nyùy mo mo wù‑uù sìysìn ji m wáa lìm a lim rə̀n. Dzə̀ vèr Sostener woo fər wòsən,

² a m sáŋ a dzə̀ fo vèn vee wír veé Korin ve vèn tatin ji wír Nyùy. Kù‑uù shàv Nyùy ven ji vèn à Jesus Kristu tátí, é vèn wáa dzə wír wun woo Nyùy, mo wír ve á yoŋ yír Tàr wòsən Jesus Kristu adzə̀me dzəə̀n virə́ʼ vidzə̀m. Wù nén a dzə Tàr wòsən réŋréŋ mo wù dzəə̀n sá wóov.

³ Vèr nén a shàʼtì ven, a lon jii, Tàr wòsən Nyùy wùn Taàtá wòsən Jesus Kristu kú a leéy fo vèn, a yiì, é melív men mè wáa dzə a nyaáŋ.

Por shéʼri mo Nyùy bùʼùn wír veé Korin

⁴ M rə́si beerì Nyùy ghán sidzə̀m fo vèn ve vèn à Jesus Kristu tatin, Nyùy búʼ ven.

⁵ Mo vèn à Kristu tatin, wù fúm afómo e věn wùn anín, taaka mo wù yiìn, vèn wáa kiíy vinyo və́ vidzə̀m, wù kfən fò ven kiliímé ke juŋ ki, vèn wáa fèr sho.

⁶ A dzə̀ sá mo vèn‑eè yuun kinyo ke Jesus Kristu, e ghàr, kí tuúy e věn meliv.

⁷ Vèn nén a dzə lèn, e kù a shìy a dzə̀ ghán se Tàr wòsən Jesus Kristu və̀n wíy kfən, é vèn yén sí rə́, a bó vèn yòʼ dzəə́ búŋ fómo Nyùy wùmòʼ gheéy.

⁸ A wun woo Jesus Kristu kù yíi a yiì, é vèn wáa tiy e wùn kinyò kitávín, e dù, e jòʼsì. Wíy lóo dzə e kishiíy ke wù wíy wìy kee shooy, é la vèn yòʼ dzəə gbù njò yìmòʼ gheéy.

⁹ A dzə̀ Nyùy kù wìy yiì kinyo kìn, bìʼ fo wù kù yii tíy e wùn jì. Yì‑iì lì wun ven, bo vèn à Wan və Jesus Kristu wo dzəə̀n Taàtá wòsən tátí ji wír amòʼón.

Wír veé Korine dìn vév vee vifií é ŋàŋ, e nèn jàvsìn

¹⁰ Afə̀r vem, m nén a lòn feyì e Tàr wòsən Jesus Kristu yir jii, vèn ku tàtí, a dzə a shuu e mòʼón, e làa yòʼ jàvsìn, a dzə jeéy jeéy. Vèn kú a sìysì kinyo kén amòʼón, a tiy a dzə̀ e kíwun ki.

¹¹ A m suuy bèn, afə̀r vem, bìʼ fo mò‑oò yuun fo wír vee Kiloy laʼa ji vèn waà seʼnìnè.

¹² A kí dzə̀ á ji wìr lo, wù wàa suúy jii, «M tíy kém vèr Por», kày wàa suúy jii, «M tíy kém a dzə̀ vèr Apolor.» Wùmòʼ jii, «M dzə̀ kém vèr Pita.» Wùmòʼ nèn kfə̀n a suúy jii, «M kù dzə̀ kém vèr Kristu.»

¹³ Mo vèn yii bèy, vèn sí tóʼti Jesus Kristu e vishev vishev. Vé‑eè kùm a dzə̀ la é kici, wù kpú fo vèn? Yì‑iì dzə̀ mo woo Por à? Vé‑eè wày ven é ndzəv ji vèn biìmé a dzə̀ fo Por à?

¹⁴ A m beerì feyì, mo bó m yòʼ‑oò lo wày wír fo vèn é ndzəv, e shaà Kiripur wùn Gayur,

¹⁵ fo wìr kfə́n a suúy ji vé‑eè wày wun e ndzəv e mǒ yir.

¹⁶ Yii bèy, mò‑oò lo wày sá wír vee Tefanar laʼ e ndzəv. A bó m yòʼ kwaʼtì ji mò‑oò lo wày á wír ámóʼó, e shaà vin.

¹⁷ Vèn wáa kiíy ji bó Jesus Kristu yòʼ‑oò lo tùm mo ji m wáa ghan, a wayrí wíri é ndzəv. Wù‑uù tùm cáʼ ji m wáa fìʼtì sáʼka Nyùy wo juŋ e wíri. A bó m yòʼ fiʼtì, nyomèr nyòmèrìn ji wù fíʼ a bòŋ a wír, fo kí wáa dzə ji m semèr vitaáví vé kpu ye Jesus Kristu‑uù kpuun é kintam, səŋrì wíri a dzə̀ e vifií ví.

Vifií vé Nyùy vi yénsin mo wù‑uù sìysìn ji Kristu kpú fo wíri

¹⁸ A m kì ji kinyo ke m fiʼtì ji Kristu‑uù kpù é kintam bìʼ ajay wíri kí shwínin vinjeenjèm ve vinyò fo wír ve á sí nəə kév a dzə̀ é lòné. Yii bèy, a dzə̀ vitaáví ve Nyùy fó vèsən ve wù sí luŋèr, aá boy fó lòn foo fèn.

¹⁹ A Nyùy‑iì lo sùúy kinyo kìn e wùn ŋwàʼ jii: «M wíy bvəə́r vifií vé wìr ve á kiìn vinyo, e ŋway vinyo ve wìr ve á din vifií.»

²⁰ Wìr wo dzə̀ wù kfə̀n a dìn vifií bèé lèn? Kìn dzə̀ ji ŋgaàŋ duŋrì ŋwàʼ, kìn dzə̀ ji wù kì mbìʼ woó ndzə yee lèn. Nyùy dìn ne ji vifií vé wìr veé ndzə fèn vìn vi dzə̀ á kiyúŋsì.

²¹ A bó wun woo Nyùy wo wù kiìn vinyo vidzə̀m yòʼ‑oò lo biìmé ji dzə̀ wíri kìíy wun a dzə̀ fo áwuné vifii. Wù‑uù sìysì ji wun luŋer a dzə̀ á wír ve á biimen kinyo ke vèr fiʼtì, aá shéʼ sheʼén ji vinjeenjèm kìn.

²² Wír veé Judàa shéʼ kév, bìʼ fo á kù rə́si taʼ ji á yén á kiŋgaʼnìn ke kinyò ke kí din vitaáví vé Nyùy, a wír veé Griki taʼ kév a dzə̀ vinyo ve ví wáa dìn vifií ve ghaʼán ví.

²³ A kér ke vèr fiʼtì ki kù dzə̀ cáʼ jii, Jesus Kristu‑uù kpù é kintam bìʼ ajay wíri, a kí nèn nyár wír veé Juda nyárín, a vitúm vímóʼ ví yoŋ kév ji vinjeenjèm ve vinyò.

²⁴ Yii bèy, a wír ve Nyùy shoʼon ji və́, kìn dzə̀ veé Juda, kìn veé Griki nèn yén kév ji kinyo kìn ki din a dzə̀ á vitaáví vé Nyùy, kfə̀n din a vifií və́ ve ghaʼán ví.

²⁵ A kí dzə̀ jii, kinyo ke Nyùy sìysìn, wíri wáa yen ji vinjeenjèm ve vinyò kìn ki shaà vifií vé wìr dzə̀m. A ke á yén ji kí‑iì gháʼ Nyùy gháʼán, bo Wan və kpú, kí yiì kinyo ke bó yòʼ jòʼsì wír wù yiì.

Nyùy li wír a dzə̀ ve bó á yòʼ din vév vee vifií

²⁶ Afə̀r vem, vèn kuúmé ji Nyùy sà‑aà lì ven ji və́ vee wír, a vèn dzə̀ kfə́ə wìr veé le á? Bó wíri yòʼ‑oò ló a dzə e věn mvəm anín ve dzə̀ wír veé ndzə fène wàa yen ji á kér vifií é ŋàŋ. A bó wír ve vé‑eè kér antaʼ ve kuʼkìné yòʼ‑oò ló a dzə sa anín. Kùʼùn wìr kù‑uù dzə̀ vee fó tèr, a bó á yòʼ‑oò fəə̀ fó kfəə vifòn.

²⁷ Nyùy ku nèn shòʼ ven vin ve wír veé ndzə fène yén ji ambuʼŋgàŋ, e fíʼ yiì, é wír ve á din vifií wáa woomé. Wù kfən shòʼ ven vee aghéʼ veé ndzə fèn, é wír ve á kér kilíŋe wáa woomé sa.

²⁸ A wù‑uù yiì bey ji wun din á ji vinyo ve wír veé ndzə fène yén ji ve ru ví dzə̀ á ve bó ví yòʼ kér ndzə̀n. Ve áwune leey ntéŋ, káy kayín ji vee là ndzə̀n ví nén a dzə a ve dzəə̀n ve ru ví.

²⁹ A bó yòʼ dzə̀ wìr wùmòʼ kfə̀n a wìy e wùn si, a sùmrì wún gheéy.

³⁰ Dzə̀ wun woo Nyùy wo wù liìn ven, e tàtí vèn à Jesus Kristu, wù wáa fo vèsən vifií ve ru ví, Nyùy kfən lì vèsən ji wír vee là jay, e fə̀ə́r vèsən fó lǒn vinyò ve bi ví, a yòŋ ji və́ vee wír.

³¹ Kí nén a dzə jii, a dzə̀ wìr kù a yiì a dzə̀ kinyo ke vé‑eè saŋen é Ŋwàʼ Nyùy jii, «A wìr taʼ ji wun wáa sùmrì wún, wù kù a sùmrì a dzə̀ é kinyò ke yiìn Nyùy Tàr.»