1 Joon 5 - ŊWÀʼ NYÙY

Wón Nyùyi shaà vitaáví vé ndzə

¹ Vèn wáa kiíy jii, wìr dzə̀m wo wù biíme ji Jesus dzə̀ *Mfə̀ə́r wo Nyùy‑iì tumen dzə̀ wo dzəə̀n wan Nyùy. Vèsən kì jii, wìr lóo kòŋ wír, bo wù koŋ saa wan wìr woo shooy.

² Mo kí dzəə̀n bey, vèsən nèn a kiíy jii, a vèsən koŋ Nyùy, yú sáʼ rə́, bo vèsən koŋ saa wón və́.

³ A koŋ ye vèsən koŋ Nyùyi dzə̀ mó a yu sáʼ rə́. A bó sáʼ rə́ rə́ne yoʼ ghàʼ fo vèsən wáa yiì gheéy,

⁴ bìʼ fo wír ve dzəə̀n wón Nyùy adzə̀me shaàn ne vitaáví vé vinyò veé ndzə fèn. Aá sò ne ndzə, bìʼ fo á wayin shilív e Jesus wùn.

⁵ A bó yòʼ dzə̀ wìr wùmòʼ sò, kù mày wo wù biimen ji Jesus dzə̀ rú á Wan Nyùy.

Visəəm ve ví din kinyo ke Jesus Kristu

⁶ Jesus Kristu və̀n‑eè lo wìy, a dzə e nsay fèn, e dù, á wáy wun e ndzəv. Wù kfən dù, á yúyrí wun, mensə́ mvə mè cùrkìr. Mo wù wìyìn bey, e làa yòʼ dù a dzə̀ é ndzəv cáʼcáʼ. Wù‑uù dù sá, á yúyrí wun, mensə́ mvə mè cùrkìr. A Kiyoy ke Ranén kí bínsi sa ji kinyo kee shooy ki‑iì lo kòóy a bèy, a kí yii suuy kfə́ a dzə̀ kinyo ke ru kí.

⁷ Vifá vi nén a dzə vitaár ve ví din ji Jesus‑eè ló a dzə e nsay fèn,

⁸ a ví dzə̀ jii, Kiyoy ke Ranén kí, ndzə́v ye vé‑eè wayin wun sho, e lì mensə́ mvə me mè‑eè cùrkìn. A vifá vee vitaár vìn vi shèmsín, a dìn a dzə̀ kinyo kimòʼón.

⁹ Vèsən kì ji kinyo ke Nyùy suuy ki shaà ké wìr. Wìr yii lóo fèr kinyo ke wù kì yenen, á kù nèn biìmé. Vinyo vee vitaár vìn vi nén a dzə bèn, a din Nyùy e wíri e Wan və́ kitu.

¹⁰ Kí nén a dzə jii, a wìr wày shilív e Wàn Nyùy woo shoon wùn, bo vinyo vee shoon vi wíy a lùm e wùn shiliv ghán sidzə̀m. Wìr wo wù kinèn vinyo vee shoon nén a yòŋ Nyùy ji ŋgaà kimboʼtì, bìʼ fo wù tenen fó biimé kinyo ke Nyùy dìnèn e Wan və́ kitu.

¹¹ A kisəəm ke Nyùy‑iì dìnèn e Wan və́ kitu kìn ki dzə̀ dzəʼə̀m yee là may ye wù‑uù foon e vèsən, a yí lo a dzə̀ fo Wan və.

¹² Kí nén a dzə jii, wìr wo wù táti wùn Wàn Nyùy sí kér dzəʼə̀m yee shoon, a bó yòʼ dzə̀ wír wo wù tén fó tatí wàa ker gheéy.

Dzəʼə̀m yee là may

¹³ Mo m sáŋ vinyo vìn vidzə̀m bèn, m sáŋ a dzə̀ fo vèn ve á wayin ne shilív e Wàn Nyùy wùn, é vèn fíʼ kiíy ji vèn sí kér dzəʼə̀m yee là may.

¹⁴ A bó vèsən yòʼ kfə̀n dzəə́ fan sa fó a koʼtí e Nyùy si, a lon kifá, bìʼ fo vèsən kiìn jii, a vèsən fèn lón ka fo wun, a bèn dzə̀ kifá ke wù koŋè, bo wù yuúri a kinyo késən.

¹⁵ Mo vèsən kiìn ji vèsən yíi lòo lon kifá, é wù ku nèn yù, bo vèsən kìíy ne sa ji á yíi a ker a kifá kee shooy.

¹⁶ Kí nén a dzə jii, vèn lóo yen, a fər won wùmòʼ jáy kinyo, vèn wàa lon ji Nyùy sə́ á wun. Vèn lóo lon, a bó wù yoʼ jày kinyo ke dzə̀ kí yiì, wù kpù, é Nyùy ku nèn sə̀ wun, é wù luŋ. Yii bèy, a dzə̀ wìr jày kinyo ke dzə̀ kí yiì, wù kpù, a bó m yòʼ suuy ji vèn wáa lon a ji Nyùy sə́ vee shooy vee wír.

¹⁷ Ajay ve wíri yii adzə̀me dzə̀ kinyo ke bi kí fo Nyùy, a bó yòʼ dzə̀ vinyo vidzə̀m ve dzə̀ ví yiì, wìr kpù.

¹⁸ Vèsən kì ji wìr wo siìn wan Nyùy yòʼ kfə̀n dzə̀ wù wàa yiì vinyo ve bi ví, bìʼ fo Jesus woo Wan Nyùy sí shiy wun. A bó yòʼ dzə̀ Satan woo ŋgaà vinyò ve bi ví kfə̀n kùm wun gheéy.

¹⁹ Vèsən kì sá ji vèsən dzə̀ á wón Nyùy, yii bèy, a wír ve dzəə̀n veé ndzə fèn adzə̀me dzə̀ kév e ŋgaà vinyò ve bi ví və̀y kiwo.

²⁰ Wàn Nyùy‑iì lo wìy e nsay fèn, e mvə̀ʼ vifií vesən, vèsən wáa kiíy Nyùy woo rú, a vèsən sí dzə́ kintatì vèsən à Nyùy woo rú və̀n, bìʼ fo vèsən à Wan və Jesus Kristu suusin ne. A dzə̀ wun wo dzəə̀n Nyùy woo rú. A dzəʼə̀m yee là mayi dzə̀ a dzə̀ e wùn kiwo.

²¹ Wòn vem, kí nén a dzə jii, vèn wáa yen a fó a jùmrì anyùy kisaŋe.