1 Joon 3 - ŊWÀʼ NYÙY

Wír ve dzəə̀n wón Nyùy

¹ Vèn ku yèn búʼú mo Nyùy koŋ vèsən, yoŋ ji wón və́. A bó wù yòʼ yoŋ a dzə̀ fó shuù, vèsən dzə̀ rú wón və́. A bó wír veé nsay fène yòʼ kì, bìʼ fo bó á yòʼ kiìn sá Nyùy.

² Ŋkàr sem, vèsən dzə̀ rú wón Nyùy lèn. A bó vèsən yóʼ ne kìíy mo vèsən wíy a dzə e ghan se sí wiyì. Ke vèsən kiìn kí dzə̀ ji Jesus wíy wìy, é vèsən wáa dzə réŋréŋ moo wun, a vèsən wíy yen rú mo wù dzəə̀n.

³ Kí nén a dzə jii, wìr wo wù leey fó mbìy, shiy Jesus, yii baamè vinyo ve bi ví, ji wun fíʼ a dzə là njò, réŋréŋ mo Jesus dzəə̀n.

⁴ Wìr wáa yiì kfə́ a dzə̀ vinyo ve bi ví, bo sì ŋgaà njò, bìʼ fo wìr yii kinyo ke bi kí, bo wù lì a dzə̀ njò.

⁵ Vèn kì ji Jesus‑eè wìy é nsay fèn a ji wun laar vinyo ve bi ví ve wíri yii. A bó wun woo Jesus yòʼ yii yii vinyo ve bi ví gheéy.

⁶ Kí nén a dzə jii, wìr wo wù tíy kfə́ a dzə̀ wùn Jesus yòʼ dzə̀ á wù kfə̀n a yiì vinyo ve bi ví. A bó wìr wo wù yii kfə́ a dzə̀ vinyo ve bi ví yòʼ kì wír wo dzəə̀n Jesus, a bó wù yòʼ‑oo yií ne yèn wun.

⁷ Wòn vem, vèn wáa yen fo wìr bóʼtí ven. Vèn wáa kiíy jii, wìr wo wù yii vinyo və́ là jay dzə̀ wo wù dzəə̀n là jay, réŋréŋ mo Jesus dzəə̀n.

⁸ Á bèy, wìr wo wù yii a dzə̀ vinyo ve bi ví nén a dzə kfə́ wan Satan, bìʼ fo Satan kù‑uù siìn ŋgaà vinyò ve bi ví, a wù‑uù sí yii, e kèʼ mo vé‑eè bomen ndzə. A Jesus woo Wan Nyùy‑iì wìy é nsay fèn ji wun ndzəər á vinyo ve Satan vee shooy vidzə̀m.

⁹ Vèn wáa kiíy jii, wìr wo dzəə̀n wan Nyùy yòʼ kfə̀n dzəə́ yii vinyo ve bi ví, bìʼ fo wù sí kér liì Nyùy wo dzəə̀n Tàr wov. Mo wù siìn wan Nyùy, bó yòʼ dzə̀ wù kfə̀n a yiì vinyo ve bi ví gheéy.

¹⁰ Kinyo ke kí din jeéyjeéy fo wón Nyùy wùn à vé Satan ki dzə̀ jii, wír ve bó á yòʼ yii kinyo ke ru kí, a bó á yòʼ koŋ afə́r véví yòʼ dzə̀ á wón Nyùy gheéy. Vee shooyi dzə̀ vé Satan.

Wón Nyùyi wáa kòŋnìn

¹¹ Vèn kuúmé kinyo ke vèn‑eè sí yú, e kèʼ mo vé‑eè kèʼèn, a fìʼtì kinyo ke Nyùy e vèn kí. Kí‑iì dzə̀ ji vèsən wáa kòŋnìn.

¹² A bó kí yoʼ ghèén ji vèsən wáa yiì moo Keen. Wù‑uù dzə̀ kfə́ wan Satan woo ŋgaà vinyò ve bi ví, e nèn lò, e yùyrí wan yè wov. A yì‑iì yiì ka, bo wù wáa yuyrí fə́r və? Wù‑uù yúyri, bìʼ fo wù‑uù yii kfə́ a dzə̀ vinyo ve bi ví, a fər və yii ve juŋ vi.

¹³ Afə̀r vem, kí nén a dzə jii, wír veé ndzə fène lóo bàn sa ven, lá vèn yòʼ a ker gháʼ.

¹⁴ Á ban bèy, a vèsən kì ji vèsən bòy ne fo kpu, aá sí kér dzəʼə̀m yee là may. Vèsən kìíy bèy, bìʼ fo vèsən sí koŋ afə́r vesən. Yii bèy, wìr wo bó wù yòʼ koŋ fə́r və yòʼ dzə̀ wù bòy fó kpu gheéy.

¹⁵ A wìr ban fə́r və, bo sì yúyrí mo wù yúyri bèy, a vèn kì sá ji wìr wo kfə́ kí dzəə̀n ji wun ku yùyrí wír yòʼ dzə̀ wù kfə̀n a dzə e mvə̀m dzə̀ʼə̀m yee là may.

¹⁶ Kinyo ke kí din e vèsən mo dzə̀ wìr wàa kòŋ wír ki dzə̀ ke Jesus‑eè yiìn. Wù‑uù fò kitú kfə́, e kpù bìʼ vèsən. A dzə̀ mo vèsən kú a yiì bèy, a fo vitú vesən bìʼ afə́r vesən.

¹⁷ Yii bèy, a wìr kér kifá, e yèn fə́r və, e tèn fó sə wun, bo bó wù yòʼ koŋ wíri mo Nyùy koŋè.

¹⁸ Wòn vem, lá vèsən yòʼ a suúy a dzə̀ fó shuù ji vèsən koŋ afə́r vesən. Vèsən wáa kòŋ áwune rúrú, a sə áwune.

Wón Nyùyi lón fo Nyùy là fan

¹⁹ Vèsən lóo kòŋnìn bèy, é vèsən nèn kìíy là méŋnín ji vèsən tíy rú a dzə̀ e Nyùy kinyò ke ru kí, é kí kfə́n a yiì sa, vèsən lóo koʼtí e Nyùy si, é la melív mèsən mè yòʼ a yàʼ.

²⁰ A mè fə̀m lò, a saʼ vèsən, la vèsən yòʼ a fàn, bìʼ fo vèsən kiìn ji Nyùy kì vinyo vidzə̀m, e kfə̀n kìíy sa ji wù yòʼ dzə̀ moo melív mèsən, a dzə̀ wù kù rə̀r mendzən mèsən.

²¹ Ŋkàr sem, kí nén a dzə jii, mo bó yòʼ dzə̀ melív mèsən mè wàa yàʼ, bo dzə̀ vèsən wàa koʼtí lèn e Nyùy si là fan.

²² Lóo koʼtí, aá fə̀m lón ka, é wù ku nèn fò kíwun, bìʼ fo vèsən sí yú sáʼ rə́, yii, a wún vəə́ boŋè.

²³ A sáʼ rə́ rə́ne dzə̀ jii, vèsən wáy á shilív e Wan və Jesus Kristu wùn, e kfə̀n a kòŋnìn. Á mo wù‑uù suuyin ji vèsən wáa yiì.

²⁴ Vèn wáa kiíy jii, wìr wo wù yú sáʼ Nyùy dzə̀ á wo wù tíy kfə́ wùn Nyùy, a Nyùy tíy sa wùn ŋgaàŋ. A kinyo ke kí yii, bo vèsən wáa kiíy rú kijuŋ ji Nyùy tíy vèsən áwune kí dzə̀ Kiyoy kfə́ ke Ranén kí ke wù foon e vèsən.