1 Joon 1 - ŊWÀʼ NYÙY

Kinyo ke dzə̀ʼə̀m yee là may

¹ Kinyo ke m sáŋ fo vèn kin ki dzə̀ ké wìr wo wù‑uù siìn, é bo ndzə wìy a kèʼ, a kér wun ntum ye yì fó dzəʼə̀m yee là may. Vèr à wír ámóʼó‑oò lo yèn wun e sí yérí, vèr áwune wáa ghanén, vèr wáa kùm wun, e kfə̀n a yen vinyo ve wù‑uù yii.

² Á mo Nyùy‑iì yiìn, é bo wíri yén dzəʼə̀m yee là may. Mo vèr yenen wun wo wù fó dzəʼə̀m yee shoon, e nèn a fìʼtì e wíri. Ku nèn a dzə kíwun ke m fer e vèn lèn. A ŋgaà dzə̀ʼə̀m woo shooy‑iì dzə́ a dzə̀ wùn Nyùy woo Tàr wòsən. Ghán sí wìy ghèén, Nyùy dìn wun e vèr.

³ Kí nén a dzə jii, kinyo kidzə̀m ke vèr‑iì yenen, e kfə̀n yù, a dzə̀ vèr fèr sá, é vèn yú. Mo vèn yuun, é vèn nèn tàtí sa, é vèsən wáa yuurí kinyo kee shó kimòʼón. A vèr tàtí a dzə̀ vèr à Tàr wòsən Nyùy, à Wan və wo dzəə̀n Jesus Kristu.

⁴ M nén a saŋ vinyo vìn fo vèn lèn ji vèn tátí sá bèy, é vèsən wáa sheʼrí a ghán sidzə̀m.

Ndzə ye ranén

⁵ Vèr‑iì yù kinyo ke m fer e vèn kin a dzə̀ fo wun woo Wan Nyùy. A kí dzə̀ jii, bó Nyùy yòʼ yii ghán e ndzə ye sənér, yii vinyo ve bi ví. Wù dzə̀ kfə́ ji rán.

⁶ Kí nén a dzə jii, a wìr suuy ji wùn Nyùy dzə̀ kintatì, kfə̀n ghán e ndzə ye sənér, bo ŋgaàŋ bóʼti. Wù yòʼ dzəə́ yii kinyo ke Nyùy yén ji ke ru kí.

⁷ Yii bèy, mo Nyùy dzəə̀n é ndzə ye ranén, wíri lóo ghan sa e ndzə ye ranén, áwune nèn a dzə kintatì, a ghan kiwuú kév kimòʼón. Mo á ghán bèy, Nyùy nèn kfə̀n sù sa njò yev, á wàa dzə là jay. A wù su a dzə̀ e mensə́ me Wan və woo Jesus mè.

⁸ Kí kfə́n a dzə jii, a wìr lò, a kìnèn ji bó wun yòʼ kér jay, bo ŋgaàŋ bóʼti a dzə̀ kitú kfə́. Wù yòʼ tíy e kinyò ke dzəə̀n ke ru kí gheéy.

⁹ Yii bèy, a wìr tuúne vinyo ve wù jayin, Nyùy kù nèn làysìn, e sù njò rə, wù wàa dzə là jay, bìʼ fo dzəə̀n kinyo ke wù‑uù kàʼàn, a wù kù yii yii vinyo və́ réŋ.

¹⁰ Kí nen kfə̀n a dzə sa jii, wír wo wù kinèn ji bó wun yòʼ‑oo jáy ne kinyo sí yoŋ Nyùy a ji ŋgaà kimboʼtì, a bó wù yòʼ yú kinyo ke Nyùy suuyì.