1 Afòn 9 - ŊWÀʼ NYÙY

Nyùy Tàr kfən dìn kitú kfə́ e Solomon

¹ Solomon‑eè màysì kibaʼrì ke lav cù Nyùy Tàr, à kee wun ntoʼ ki, e kfə̀n màysì, e bòm kifá kidzə̀m ke wù‑uù kér shií e bom,

² Nyùy Tàr nèn kfə̀n wìy, e sùŋnín e wun mo wù‑uu wìyìn é Gibeon.

³ Nyùy Tàr suúy e wun jii, «M yù ne bunrì yé, e yù tóŋ ye à tóŋ e mò. M biìmé ne lav ye à bomen rə̀n ji lav yee jeéy ji yéem, aá kù wíy a cù mo fó e wìy dù mày. M wíy a kiyrí ghán sidzə̀m, a tiír vifií vém shó.

⁴ Fo ké ki, aà lò, a ghan e mǒ mbòv shilív shimòʼón mo Davir woo tàr won‑eè gháné, a yu sáʼ yém, a yiì mo nsər sém sí dzəə̀n, kfə̀n a ghar vinyo ve m tínen vidzə̀m,

⁵ bo m wíy yiì, é sáʼ yée wáa tiy e Isray, e wìy dù, e mày, é kinyo ke mò‑oò kàʼàn tàr won Davir sho ki gheén, a dzə̀ ke mò‑oò suuyin e wun jii, ‹Bó rám rəə́ yòʼ wíy buŋ wír wo wù wáa dzə e kàvàʼ woó Isray.›

⁶ Yii bèy, aà lò, kìn lò wón vé, e bìn ndzə̀m e mò, a ghvəm anyùy kisaŋe, a cù áwune, e làa yòʼ dzə́ə a yu sáʼ yém, e làa yòʼ dzə́ə a yunín nsər se m foon e vèn,

⁷ bo m yíi fəə́r wír veé Isray fo nsay ye m foon aáwune, é m kfən mèŋ lav cù rə̀n, ye m kì lèmèn ne ji yee jeéy ji á wíy a cù mo shó, aá nèn wìy a màʼ Isray máʼan é ŋgàn, é vitúm vidzə̀m vi wáa jàʼ áwune jáʼan.

⁸ Kí kooy bèy, é lav cù rə̀n nèn dù e vifə̀m, é shúu wáa ma wir dzə̀m wo wù shaa fo, aá wáa ndzəə, a ghay jii, ‹Nyùy Tàr yiì kee ben a dzə̀ ka é Isray, é bo lav cù rə̀n kfə́n é vifə̀m?›

⁹ Bo binèri kù yíi a dzə jii, ‹Nyùy Tàr lòvtí aáwune ben, bìʼ fo áwune bìnèn ne ndzə̀m e Nyùy Tàr woo Nyùy wov wo wù‑uù fəərin atàr vév fó Ejiv, e ghàr anyùy kisaŋe, a ghvəm, a cù áwune. Á kinyo ke kí‑iì yiìn, é bo Nyùy Tàr lóvtí aáwune ben.› »

Nsìysì Fòn Solomon wùn Fòn Hiram

¹⁰ Fòn Solomon‑eè bàʼrì lav cù wùn à ntoʼ rə kiyá mbaà, e bóo màysì.

¹¹ Yì‑iì fò Hiram woo fon woó Taya vifá ve kibàʼrì e Fòn Solomon. Wù‑uù fò vifá vidzə̀m ve wù‑uù kér shií shó, a ví dzə̀ jii, kicí ké *sidar wùn à kicí ké dzəʼə̀y kí, à *kisha ke mbàm ke baar kí. Fòn Solomon nèn bày ntèʼ símóʼ sí mbaà fó mbìv wòŋ yeé Galeli, e fò e Fòn Hiram.

¹² Fòn Hiram nèn lò fo Taya ji wun du, e yen a ntèʼ se Fòn Solomon foon e wun. Wù dù, e yèn, la sí yòʼ ghèén wun.

¹³ Wù dzə́r e Solomon jii, «Fər wòm, kfə́ə ntèʼ see ben se à foon e mò sí dzə̀ seé le?» Á bèy, á nèn a yòŋ fó ji Kabul, aá kù dzəə́ yoŋ bèy, e shem lán.

¹⁴ A kisha ke mbàm ke baar ke Fòn Hiram‑eè tsənsin e Fòn Solomon ki‑iì dzə̀ moo akilu ansə̀kì akweè bèy.

Vinyo vímóʼ ví ve Fòn Solomon‑eè yiìn

¹⁵ Fòn Solomon‑eè shòʼtí wíri ve á wáa lìm lim vitaavií, áwune wáa bàʼrì lav cù Nyùy Tàr wùn à ntoʼ rə, a bom kfə̀m woó Jerusalem, e mbìv yee fo shùy yii tó, e kfə̀n a bom kay yeé Jerusalem, à yeé Hasori, à yeé Megiddòo, e lì yeé Geser,

¹⁶ Geser wáa dzə bèy, a Farao woo fon woó Ejiv‑iì ghàn ne kòʼ, e tòn e və́yí, e seèrí wír veé Kanan ve vé‑eè dzə́ e mvə̀m ŋkàlaʼ fèy, e nèn fò ji fómo vijìn e wan və wo yì‑iì dzəə̀n wiiy Solomon.

¹⁷ Solomon nèn lò, e bàʼrì Geser, e siìr fo. Vé lìm vitaavií kfə̀n‑eè bàʼrì ŋkàlaʼ yee Bet‑Horon Tsə̀n,

¹⁸ à yeé Baalat, à yeé Tamar ye yì dzəə̀n é woʼ e nsay Juda.

¹⁹ Áwune kfən bàʼrì ŋkà se laʼ sidzə̀m see fo vitáv vé Fòn Solomon vi‑iì dzə̀kìn, à see fo wù‑uù lem *viténtén və́ vé rər, à see fo vé koʼo‑oò shiiyì. Áwune kù‑uù bòm kifá kidzə̀m ke Solomon‑eè kér shií ji á bóm é Jerusalem, e bòm é Lebanon, e kfə̀n bòm é kirə̀ʼ kidzə̀m ke Solomon‑eè sáʼa.

^20-21 Wír ve vé‑eè lim lim vitaaví víne dzə̀, a Fòn Solomon‑eè tàyrí wir dzə̀m wo wù‑uù berin é wòŋ, fo vitum ve wír veé Israyi yòʼ‑oò lo yù fóo laàr, aá may. Vé‑eè bèr fo wír veé Amori, e bèr fo veé Hiti, à veé Perisi, à veé Hivi, e lì veé Jebus. Wù‑uù yiì, áwune wáa rèŋ vikwàn, a lìm lim vitaavií, a kù dzə̀ mo áwune lim, e wìy shem lán.

²² Bó Solomon yòʼ‑oò lo yiì ji wír veé Israyi wáa lìm a vikwàn. Wù‑uù lì áwune, á wáa dzə vé rərí, ámóʼó wáa dzə wír ve kuʼkìné, ámóʼó wáa dzə amfòómé, ámóʼó wáa dzə vilìmbìy ve akáŋ rər, ámóʼó wáa saʼ wír ve á səŋ viténtén vé rər, aámóʼó dzə̀ vé koʼo.

²³ A vitú ve lìm ve Fòn Solomon‑eè lèmèn ji ví wáa leéy wír ve á lim lim vitaaví ví‑iì dzə̀ kishóv mtàn e ghiì tàn (550).

²⁴ Wiiy Solomon woo wan Farao kóʼ fó Ŋkàlaʼ Davir, e dù nə̀ə́ e wun lav ye Solomon‑eè bomen é ntoʼ, Solomon nèn lò, e bòm kfə̀m woó ŋkàlaʼ e mbìv yee fo shùy yii tó, e rùnsí nsay fo.

²⁵ Yì‑iì lóo dzə e kitu ke kiya, Solomon yiì cu akàŋ ataár e kiy cù wo wù‑uù fèrìn ji wó Nyùy Tàr. Wù lo, wù yiì cu ye tonèné wùn à yé kikòŋnìne, e kfə̀n a tòn sa kiláy e Nyùy Tǎr si. Á mo Fòn Solomon‑eè màysìn kibaʼrì ke lav cù.

²⁶ Fòn Solomon kfə̀n‑eè bàʼrì sá ŋgoo amàvìkoŋ. Vé‑eè bàʼrì vikóŋ vìn e Etsiyon‑Geber, wo wù dzəə̀n é ghaa Elat, e meshavtí me Rìbà Ndzə̀v wo Baar é nsay Edom.

²⁷ Fòn Hiram nen wìy tsə̀nsí vé lìm və́ ámóʼó ve vé‑eè kiìn ndzə́v kijuŋ, á dù, e tàtí vé kikoŋ Fòn Solomon,

²⁸ wùn áwune wáa dù e Ofir, a wìy e kisha ke mbàm ke baar kí, a fo e Fòn Solomon, a kí dzə̀ moo akilu nsə̀kì nshòv sikweè e ghvə̀m (14,000) bèy.