1 Afòn 8 - ŊWÀʼ NYÙY

Á wíy e ŋkùv mensàŋ e lav cù

¹ Fòn Solomon nèn tòóy kfə́m sé wìr veé Isray wùn aàtǎr ramé, aàtǎr kfəə véví ji á báʼtí á e wun si e Jerusalem, aá du, e lì a ŋkùv mensàŋ Nyùy Tàr fó Ŋkàlaʼ Fòn Davir, aá yoŋ sa ji Sion, e kòʼ shó e lav cù.

² Vilum veé Isray adzə̀me báʼtí e Fòn Solomon si, a dzə̀ é ghan sé ŋkàʼ é ŋwee woo Etanim wo dzəə̀n ji ŋwee woo saàmbà.

³ Kfə́m sé wìr veé Isray si báʼtí, atàá cùu nèn shùr ŋkùv mensàŋ, a koʼ sho e lav cù.

⁴ Atàá cù ámóʼó wùn à wír veé ram Levìi bèʼèy sa *kibàn ké ntàsín, à vifá vee jeéy veé mvəm wó vi vidzə̀m, a koʼ sho.

⁵ Fòn Solomon wùn à wír veé Isray adzə̀m ve vé‑eè baʼtiné‑eè du e mbìy ŋkùv mensàŋ, du bèy, yii cu aànjìi wùn aànàʼa, ve bó yòʼ dzə̀ wìr tàŋ, e tòʼ.

⁶ Atàá cùu nèn dù, e tìír ŋkùv mensàŋ e wun kirə̀ʼ, a dzə̀ kee fó mvəə́mvəm ke dzəə̀n kee jeéy kí féyì feyì. Ŋkùv mensàŋ nèn a tiy fo, e sar vàv se vifa veé yuv,

⁷ a vav sév sí násí wún é kitu ke ŋkùv mensàŋ, e kfə̀vsí ŋkùv wùn à vintoòr və́ ví.

⁸ Vintoòr vìn vi‑iì dàr é ŋàŋ, a wìr lóo tiy e mvə̀m lav cù, wù wàa yen mo ví soŋ kitú fo kirə̀ʼ kee jeéy kí féyì, ke kí dzəə̀n fó mvəə́mvəm. Wìr lóo tiy fo ndzə, la wù yòʼ a yen. Ví kù dzə̀ə́ fo, e wìy shem lán.

⁹ Kifá ki yòʼ‑oò dzə̀ é ŋkùv mensàŋ, bánlà viwaŋ ve tiy vibaà ve Mooser‑iì wayin shó e Gwan Sinay fo Nyùy Tàr‑iì gwàrìn *mensaŋ wùn à wír veé Israyi e ghan se vé‑eè fəən fó Ejiv.

¹⁰ Atàá cùu yiì lòo fəə fo lav cù, mbàʼ nèn wìy, e rùn fó,

¹¹ la áwune yòʼ kfə̀n dzəə yù fó nəə́, a yiì lim yév bìʼ rán Nyùy ye yí‑iì dzəə̀n é mvə̀m mbàʼ.

¹² Fòn Solomon nèn kà jii: «Nyùy Tàr, à lèéy ne ké jii, wo‑óò wiy, a dzə e mvə̀m mbàʼ ye sənér.

¹³ M dzə̀ a m báʼrí lav ye wiy féyì ji ye, kirə́ʼ ke a dzə̀, à wàa dzə sho ghán sidzə̀m.»

Kisúŋnìn ke Fòn Solomon

¹⁴ Fòn Solomon ló, e bìnkìr, e lèéy wír veé Isray adzə̀m, aá kù tíy fo, e nèn a lon ji Nyùy ku səə̀vì a áwune,

¹⁵ a suúy jii, «Búríi wáa dzə fo Nyùy Tàr woo Nyùy wìr veé Isray wo wù yiìn ne kinyo ke wù‑uù kàʼàn tàr wor Davir sho. Wúnwun kitú kfə́‑əə̀ lo yòŋ jii,

¹⁶ ‹Kèʼ fo ghan se wun‑eè fəərin wír veé Isray fo Ejiv, wun yòʼ‑oò lo shòʼ ŋkàlaʼ yìmòʼ fó ram seé Isray sidzə̀m ji á baʼri á lav ye á wáa ghvəm wun fo. Wun‑eè shòʼ kfə́ a dzə̀ Davir ji wáa saʼ a wun wír veé Isray.›

¹⁷ A tàr wor Davir‑iì ló a ker e shiliv ji wun‑éè baʼri á lav ye á wáa cù a Nyùy Tàr shó, wun woo Nyùy wìr veé Isray.

¹⁸ Nyùy Tàr nèn sùúy e tàr wor Davir jii, mo wù kér e wun shiliv ji wun baʼri á lav ye á wáa cù wun sho, bo dzə̀ á kwaʼtì ye juŋe.

¹⁹ Yii bèy, yòʼ wíy bàʼrì a wun. Wíy bàʼrì a wán və wo dzəə̀n vitó və́ lav ye á wáa cù wun a sho.

²⁰ Nyùy Tàr dzə̀, a wù yiì ne kinyo kee shooy lán. M lì ne kirə́ʼ ké tàr wor Davir, e kòʼ é kàvàʼ woó Isray, kù mo Nyùy Tàr‑iì kàʼàn. M bàʼrì ne lav ye á wáa cù Nyùy Tàr shó woo Nyùy wìr veé Isray.

²¹ A m nàŋsín ne kirə́ʼ, e lèm fo ji ké ŋkùv mensàŋ, ŋkùv wo wù kér ŋwàʼ mensàŋ me Nyùy Tàr‑iì gwàrìn wùn aàtàr vérí é ghan se wù‑uù fəərin áwune fó Ejiv.»

Bunrì Fòn Solomon

²² Fòn Solomon nèn dù, e tìím e mbìy kiy cù Nyùy Tàr, a wír veé Israyi yéné, e nàn wó rə́, e kìʼ yúv shó,

²³ e nèn a bùnrì jii, «Aà Nyùy Tàr, Nyùy wìr veé Isray, Nyùy wùmòʼ yòʼ kfə̀n dzə̀ moo wò, ǎ yuv, ǎ nsay. À kù yii tíy e wò ŋkàʼmé, kfə̀n din koŋ yé ye ruú aàŋgaà vé lìme, ve á yúnin wò shilív shév shidzə̀m.

²⁴ À yiì ne kinyo ke wò‑oò kàʼàn tàr wor Davir woo ŋgaà wò lìm sho. Wò kitú ké, wò‑oò kàʼ wun e kinyò fèn, e nèn yiì e vitaáví vé vi, kí koóy lán.

²⁵ Éè Nyùy Tàr, Nyùy wìr veé Isray, kii wò, ku yiì sa kinyo ke wò‑oò kàʼàn tàr wor Davir sho, a dzə̀ ke wò‑oò yòŋèn e wun woo ŋgaà lìm wò jii, wù yòʼ wíy buú wír fo wun ram wo wù wáa dzə e kàvàʼ wìr veé Isray, a wón vəə́ fen lì kinyo kfə́, a ghan e wò mbòv mo wù‑uù gháné.

²⁶ Éè Nyùy wìr veé Isray, ku yiì ji vinyo vidzə̀m ve wò‑oò kàʼàn tàr wor Davir woo ŋgaà lìm wò sho vi koóy.

²⁷ «Rúrú, Nyùy, a dzə̀ wò à dzə̀ʼə̀m é kitu ke nsay a? Yúví yoʼ fə̀m kùʼ ye dzə̀ wú keèrí wò. Bo lav cù rə̀n yòʼ fə̀m mèé e gha, ye dzə̀ yì keèrí wò.

²⁸ Yii bèy, Nyùy Tàr woo Nyùy wom, ku yù bunrì ye mo woo ŋgaà lìm wò yii e kishiíy ké lán kií. Ku yù tóŋ yémé, e fò mo kifá ke m lóné.

²⁹ Kú a leéy lav cù rə̀n ghán sidzə̀m, a kòŋ. Dzə̀ fó fo à yòŋèn ji á wáa cù a wò. Ŋgaà lìm wò lóo bùnrì, lóo leéy fó, à yù bunrì rə́.

³⁰ Ŋgaà lìm wò lóo lon wò, kìn lón wír veé Isray, lóo kìʼ lav rə̀n, à kù yù bunrì yév. Kú a yu e wòŋ woó yuv fo à dzə́. À yú bèy, à kù nèn làysìn ajay vév.

³¹ «Wìr wíy jáy kinyo e wùmòʼ, á li, wiy sho e wò lav ji wù wàá liʼ é shùu kiy cù,

³² à kù yù é yuv, e tìnén nsaʼ aŋgàa lìm vé, e fò ŋgeʼlàʼ e ŋgaà jay, e nèn bòyìr woo là jay, bìʼ fo wù yòʼ kér njò.

³³ «A wír vé veé Israyi jày e wò, aŋgàa vibàné ton áwune, á kuúmé wò, e tuùné jay wov, a bùnrì e lav cù fèn, a toŋ e wò,

³⁴ à kù yù é yuv, e làysìn jay wìr vé veé Isray, e lì áwune, e siìr e nsay ye wò‑oò foon áàtàr véví.

³⁵ «A wuú lò, e tàv é yuv, e tèn fó a lo, bìʼ fo wír vée jayin e wò, áwune maʼti jay wov, a bùnrì, a yòŋ yír yé, a leéy lav cù rə̀n,

³⁶ à kù yù é yuv, e làysìn ajay aŋgàa lìm vé vee wír veé Isray. Ku làysìn, a yeʼéy áwune mo á wáa ghan e wò mbòv, e nèn tsə̀nsí wuú é nsay ye wò‑oò foon e wír vée ji vitsə́ʼ vév.

³⁷ «A jìŋ koò é wòŋ, kìn gbù kifə̀ʼ, kìn tòn kiŋgáŋ vifá ve yi, kìn kòʼ mfə̀m, kìn gbù ŋguùmé, kìn ntèmntém, kìn aŋgàa vibàné nəə wír vé e rə́r sí aáwuné ŋkàlaʼ, kìn koò yàsí woo ka áwune,

³⁸ wìr lo, a bùnrì, kìn lò wir dzə̀m, a bùnrì, a lon wò shilív sə́ shidzə̀m, a nàsì wó, a kìʼ lav rə̀n sho,

³⁹ à kù yù é yuv fo à dzə́, e làysìn jay wov. Kù jòʼ wò cáʼ, vèn mòʼón, wo à kiìn shilív shé wìr msòŋ e dzə̀m. Kú a làʼ wir mòʼón mòʼón mo vinyo ve wù yii vi dzəə̀n,

⁴⁰ aáwune fíʼ a fàn wò ghán sidzə̀m se áwune dzə́ e nsay ye wò‑oò foon áàtàr véví.

^41-42 «Wíri wíy a yu leŋ wó wùn à viŋgaʼnìn ve vinyò ve à yii e wír vée, a wìy. Kiŋgwìy ke yòʼ dzəə̀n wir Isray ki lóo wìy fo kitum kímóʼ kí kwaʼda, bìʼ yír yé, lóo bùnrì, lóo leéy lav cù rə̀n,

⁴³ à kù yù é yuv fo à dzə́, e fò ŋgaàŋ kifá kidzə̀m ke wù lóné, é wír veé kitu ke nsay adzə̀me fiʼ kìíy wò, e nèn a fàn wò moo wír vé veé Isray. Á bèy, aáwune nèn kìíy ji lav rə̀n, ye m bàʼrìn dzə̀ rú á lav yè.

⁴⁴ «Aà yòŋ ji wír vée du, e nə̀ə́ aŋgàa vibàn vév e rə́r sí, a fə̀m dzə̀ feé, áwune wáa lon wò woo Nyùy Tàr, a lon bèy, a kìʼ ŋkàlaʼ rə̀n, ye à shoʼon, e kfə̀n a kiʼ lav rə̀n, lav ye m bomen ji ye,

⁴⁵ à kù yù bunrì yév fo à dzə́ e yuv, e màʼ rə́r sév.

⁴⁶ «Mo bó wìr woo là jay yòʼ dzəə̀n, a wír vée lòo dzə, e jày e wò, à shwiíy kilòŋ, e màʼtì aŋgàa vibàn véví koórí áwune ji akwàn, e dù sho aáwuné wòŋ kwaʼda, kìn fó mentsə̀m,

⁴⁷ aáwune dù e wòŋ foo fèy, e màʼtì jay wov, e bìnèr melív mev, a toŋ e wò, a suúy jii, ‹Vèr jày ne, vèr yiì ne yii ye bií,›

⁴⁸ á wáa toŋ bèy, a kìʼ nsay rə̀n ye wò‑oò foon aàtàr véví, a kìʼ ŋkàlaʼ ye wò‑oò shoʼon, e kfə̀n a kìʼ lav ye m bàʼrìn ji á wáa cù wò sho rə̀n, aá fen kùvsín rú kwaʼtì yév e dzə̀m, à shilív shév shí shidzə̀m e wòŋ vikwàn fóo fèy,

⁴⁹ à kù yù bunrì yév é yuv fo à dzə́, e yù tóŋ yév, e sə̀ áwune.

⁵⁰ Ku làysìn ajay ve wír vée jayin e wò, e làysìn vinyo vidzə̀m ve á yiìn, ví tén wò vi. Ku yiì, é wír ve á koon áwuneé wáa rər mendzən mev,

⁵¹ bìʼ fo kù dzəə̀n wír vé, a kfə̀n dzə̀ vitsə́ʼ vé ve wò‑oò fəərin fó kimbiirìn ke və̀y é wòŋ Ejiv.

⁵² «Éè Nyùy Tàr woo Nyùy Ndzə, kú a leéy ŋgaà lìm wò və̀n, a leéy wír vé veé Isray, a yuurí tóŋ ye á tóŋ e wòo, a sham áwune. Kú a yiì, é vituʼùr vé vi wáa yu bunrì ye áwune bunrì wò shoo.

⁵³ Wò‑oò shàv áwune fó mvə̀m vitum veé kitu ke nsay ji wáa dzə a vé vee wír réŋréŋ mo wò‑oò yòŋèn áàtàr vérí, e shaà fo ŋgaà lìm wò woo Mooser e ghan se wò‑oò fəərin áwune fó Ejiv.»

Bunrì kimàysìí

⁵⁴ Fòn Solomon màysì bunrì, e màysì lón ye wù‑uù lón Nyùy Tàr, e nèn nànèn e mbìy kiy cù fo wù‑uù tsəmen, e nàn wó, yí wáa kìʼ yúv.

⁵⁵ Wù tiím, a səə̀vì wír veé Isray adzə̀m, a yòŋ kitávín jii,

⁵⁶ «Búríi wáa dzə fo Nyùy wo wù foon meemè e wír və́ veé Israyi réŋréŋ mo wù‑uù kàʼàn. Bó jì e mòʼón yoʼ tùm fó vinyò ve juŋ ve wù‑uù kàʼàn, e shaà fo ŋgaà və lìm woo Mooser.

⁵⁷ Nyùy Tàr woo Nyùy wòsən wáa dzə vèsən áwune mo wù‑uù dzəə̀n wùn aàtàr vesəné. Lá wù yòʼ màʼtì vèsən, lá wù yòʼ màʼày vèsən.

⁵⁸ Wù ku yiì, é vèsən wáy shilív e wun wùn, a ghan e wun mbòv, a yu sáʼ rə́, a yunín nsər sə́, a ghar vinyo ve wù tínen vidzə̀m, vinyo vidzə̀m ve wù‑uù yòŋèn áàtàr vesəné.

⁵⁹ Nyùy Tàr woo Nyùy wòsən kú a kuumé jí sém se m lón wun sho sìn ghán sidzə̀m. Wù kú a sham wír veé Isray wùn à fòn wov ghán sidzə̀m, a sə áwune,

⁶⁰ é wìr dzə̀m woó kitu ke nsay wáa kiíy ji kù mày Nyùy Tàr wo dzəə̀n Nyùy, a bó wùmòʼ yòʼ kfə̀n dzə̀.

⁶¹ Vèn ku wày shilív shén shí shidzə̀m e Nyùy Tàr woo Nyùy wòsə́n wùn, a yu sáʼ rə́, a yunín nsər sə́ réŋréŋ mo vèn yii lèn.»

Á fó lav cù e Nyùy Tàr

⁶² Fòn Solomon wùn à wír veé Isray adzə̀me nèn a cù Nyùy Tàr.

⁶³ Fòn wáa yiì cu kikoŋnìn e nàʼ nsə̀kì nshòv sibaà e mbaà (22,000), bvə́y si ansə̀kì kishóv mbaà e wiì (120,000). Kù bey, fòn wùn à wìr dzə̀m woó Isray nèn fò lav cù e Nyùy Tàr.

⁶⁴ Wáa dzə e kishiíy fóo fèy, Fòn Solomon ràŋ kirə́ʼ é maàndzə ye yì‑iì dzəə̀n é mbìy shùu lav cù, e nàŋsín ji kirə́ʼ kee jeéy kí, a yiì cu ye tonèné wùn à yé vifa ve yii fó, e kfə̀n tòn fóm se nyàm se cù kikòŋnìn fo. Wù‑uù yii bèy, bìʼ fo kíy cù woo kisha kee *brons ki, wo wú‑uù tíy e shuù lav cùu yòʼ‑oò dzə̀ wú keèrí cu sìn sidzə̀m.

⁶⁵ Fòn Solomon wùn à wír veé Isray adzə̀me nèn yì ŋkàʼ kishiíy saàmbà e Nyùy Tǎr si, aá wíy virə́ʼ vidzə̀m, e kèʼ fo Hamat, e dù meé e kiwoóy keé Ejiv.

⁶⁶ Kishiíy kí meé ji waamé, Fòn Solomon siìr wíri é bàm aáwuné melaʼ. Á wáa dù, a burí wun, a wìr dzə̀m yú vijuŋ, shéʼri vinyo ve juŋ vi ve Nyùy Tàr yiìn e Davir woo ŋgaà lìm və, e yiì sa e wír və́ veé Israyi.